ATM Metal Keypad Security: શું તમે ધ્યાન આપ્યું છે કે દરેક ATM મશીનના બટન અથવા કીપેડ ધાતુના હોય છે? કોઈપણ ATM મશીનમાં જ્યાં તમે તમારો ATM PIN દાખલ કરો છો, ત્યાં તમને રબર અથવા પ્લાસ્ટિકના બટન જોવા મળતા નથી. આવું તમારા ATM PINને સુરક્ષિત રાખવાના હેતુથી કરવામાં આવે છે.
મોટાભાગના લોકો આ બાબત પર ધ્યાન પણ આપતા નથી. જોકે, હકીકતમાં જો ATM મશીનમાં પ્લાસ્ટિક અથવા રબરના બટન લગાવવામાં આવે, તો છેતરપિંડી કરનારા તમારા ATM PINનો સરળતાથી અંદાજ લગાવી શકે છે. આવું એટલા માટે થાય છે, કારણ કે રબર અથવા પ્લાસ્ટિકના બટન તમારી આંગળીઓમાંથી નીકળતી ગરમીને પકડીને રાખી શકે છે. જ્યારે ધાતુના બટન ખૂબ ઝડપથી સામાન્ય તાપમાને આવી જાય છે.
આવી સ્થિતિમાં ધાતુના બટન થર્મલ કેમેરાની મદદથી તમારા ATM PINનો ભેદ ખૂલતો અટકાવે છે.
ATM મશીનમાં રબર અથવા પ્લાસ્ટિકના બટન કેમ નથી હોતા?
માણસોની આંગળીઓમાં શરીરની ગરમી હોય છે, જેને બૉડી હીટ પણ કહેવામાં આવે છે. જ્યારે આપણે કોઈ સપાટીને સ્પર્શ કરીએ છીએ, ખાસ કરીને પ્લાસ્ટિક અથવા રબરની સપાટીને, ત્યારે આપણા શરીરની ગરમી થોડા સમય માટે તે સપાટી પર રહી જાય છે.
જો ATM મશીનમાં પ્લાસ્ટિકનું કીપેડ હોય, તો તમે ત્યાંથી દૂર જતાં જ સ્કેમર થર્મલ કેમેરાની મદદથી તમારો PIN શું હતો તેનો અંદાજ લગાવી શકે છે.
ATM PIN ચોરાઈ જવાનું જોખમ
– હવે સવાલ થાય છે કે આખરે બૉડી હીટની મદદથી ATM PIN કેવી રીતે ચોરી શકાય છે. હકીકતમાં, આ માટે થર્મલ કેમેરાની મદદ લેવામાં આવે છે, જે ગરમીના નિશાનને સરળતાથી પકડી શકે છે.
– તેને તમે એવા કેમેરા તરીકે સમજી શકો છો, જે ગરમીને સરળતાથી પકડી શકે છે અને તેને સ્ક્રીન પર લાલ રંગમાં દર્શાવે છે. જ્યાં જેટલી વધારે ગરમી હોય છે, તે જગ્યા એટલી જ ઘેરા લાલ રંગમાં દેખાય છે.
– આવી સ્થિતિમાં જે બટન વધારે લાલ દેખાય છે, તે સૌથી છેલ્લે દબાવવામાં આવ્યું હોવાની શક્યતા હોય છે. આ આધારે તમારો ATM PIN ચોરી શકાય છે અને પળવારમાં બેંક ખાતું ખાલી થઈ શકે છે. આ રીતે ગરમીનાં નિશાનો દ્વારા તમારા ATM PINનો ક્રમ સમજી શકાય છે.
ધાતુના બટન છેતરપિંડી કેવી રીતે અટકાવે છે?
ગરમીનાં નિશાનોની સમસ્યાનો ઉકેલ મેટલ એટલે કે ધાતુના બટનથી મળે છે. હકીકતમાં, ધાતુ ગરમીની ઉત્તમ વાહક હોય છે, જેના કારણે તે ગરમીને પોતાની અંદર રોકીને રાખતી નથી. જ્યારે તમે મેટલના બટન પર તમારો PIN દાખલ કરો છો, ત્યારે ધાતુ હાથની ગરમીને પકડીને રાખતી નથી, પરંતુ તેને ફેલાવીને સપાટીને ઠંડી કરી દે છે.
આવી સ્થિતિમાં મેટલના બટન પરથી આંગળી હટાવતાં જ તે ગરમીનાં નિશાનને ઝડપથી શૂન્યની નજીક લાવી દે છે અને થર્મલ કેમેરો એનો અંદાજ લગાવી શકતો નથી કે તમે કયા બટનને સ્પર્શ કર્યો હતો અને કયા ક્રમમાં કર્યો હતો. આ જ કારણ છે કે દુનિયાભરના ATMમાં મેટલના કીપેડ લગાવવામાં આવે છે, જેથી તમારો PIN અને પૈસા સંપૂર્ણપણે સુરક્ષિત રહે.
