Impact of Smartphones on Children: આજકાલ નાના બાળકો પણ સ્માર્ટફોનનો ઉપયોગ કરે છે, પરંતુ ૧૩ વર્ષની ઉંમર પહેલા બાળકોને સ્માર્ટફોન આપવો ખતરનાક સાબિત થઈ શકે છે. એવું અમે નથી કહી રહ્યા, પરંતુ એક સ્ટડી કહી રહી છે. અમેરિકન એકેડેમી ઓફ પીડિયાટ્રિક્સ (AAP) માં પ્રકાશિત એક નવા સ્ટડી મુજબ, સ્માર્ટફોનનો ઉપયોગ કરવાથી બાળકોની ઊંઘ બગડી શકે છે અને મેદસ્વીપણું (મૂટાપો) પણ વધી શકે છે. એટલું જ નહીં, સ્માર્ટફોનનો ઉપયોગ કરવાથી બાળકો ડિપ્રેશનનો પણ શિકાર બની શકે છે. આ સ્ટડીમાં સ્માર્ટફોન જેવા ગેજેટ્સની બાળકો અને યુવાનોના સ્વાસ્થ્ય પર પડતી અસરોની તપાસ કરવામાં આવી છે. આ દિવસોમાં વિશ્વભરમાં બાળકો પર ટેકનોલોજી અને સોશિયલ મીડિયાની અસરને લઈને ચિંતાઓ વધી રહી છે, ત્યારે આ સ્ટડીએ ઘણું બધું સ્પષ્ટ કરી દીધું છે.
સ્ટડીમાં ૨૧ જગ્યાઓના બાળકો થયા સામેલ
ફિલાડેલ્ફિયાની ચિલ્ડ્રન્સ હોસ્પિટલમાં મનોચિકિત્સાના પ્રોફેસર અને બાળ-કિશોર મનોચિકિત્સક રાન બારઝિલાયના નેતૃત્વમાં AAP સ્ટડી થયો હતો. સ્ટડીમાં અમેરિકાની ૨૧ જગ્યાઓના ૧૦,૫૦૦ થી વધુ બાળકોના ડેટાનું વિશ્લેષણ કરવામાં આવ્યું હતું. સ્ટડીમાં ૧૩ વર્ષની ઉંમરના બાળકોની તુલનામાં સ્માર્ટફોનનો ઉપયોગ કરનારા ૧૩ વર્ષથી ઓછી ઉંમરના બાળકોમાં ઊંઘની સમસ્યાનું જોખમ ૬૦% થી વધુ અને મેદસ્વીપણાનું જોખમ ૪૦% થી વધુ જોવા મળ્યું હતું.
બાળકો થઈ શકે છે ડિપ્રેશન, મેદસ્વીપણું અને ઓછી ઊંઘનો શિકાર
રિસર્ચરે એવું તારણ કાઢ્યું છે કે શરૂઆતી કિશોરાવસ્થામાં સ્માર્ટફોનનો ઉપયોગ કરવાથી ડિપ્રેશન, મેદસ્વીપણું અને અપૂરતી ઊંઘ જેવી મુશ્કેલીઓ આવી શકે છે. તેમણે યુવાનોની સુરક્ષા માટે સાર્વજનિક નીતિ વિકસાવવાની સલાહ આપી છે. બારઝિલાયે વોશિંગ્ટન પોસ્ટને જણાવ્યું હતું કે, “આ એવી બાબત છે જેને તમે ચોક્કસપણે અવગણી શકો નહીં.”
ઓસ્ટ્રેલિયાએ બાળકો માટે સોશિયલ મીડિયા બેન કર્યું
તમારી જાણકારી માટે જણાવી દઈએ કે તાજેતરમાં ઓસ્ટ્રેલિયાએ ૧૬ વર્ષથી ઓછી ઉંમરના બાળકો માટે ટિકટોક અને ઇન્સ્ટાગ્રામ જેવા સોશિયલ મીડિયા પ્લેટફોર્મ પર પ્રતિબંધ મૂક્યો છે. આવું કરનારો તે વિશ્વનો પ્રથમ દેશ બની ગયો છે. ઓસ્ટ્રેલિયા દ્વારા બાળકો માટે સોશિયલ મીડિયા બેન કર્યા બાદ હવે મલેશિયા અને અન્ય દેશો પણ આ અંગે વિચારી રહ્યા છે. આવતા વર્ષે વધુ ઘણા દેશો આવા પગલાં લઈ શકે છે જેથી બાળકોને સોશિયલ મીડિયા, સ્માર્ટફોન અને ઈન્ટરનેટથી થતા નુકસાનથી બચાવી શકાય.
