Microwave Cleaning Mistakes: શિયાળાની ઋતુમાં ગરમ ખોરાક સૌને ગમે છે. આ માટે ઘરોમાં માઇક્રોવેવનો ઘણો ઉપયોગ થાય છે. દરેક પ્રકારની વાનગી માઇક્રોવેવમાં ગરમ કરવામાં આવે છે. ખોરાક ગરમ કરવો તો ખૂબ જ સરળ છે, પરંતુ ઘણીવાર ખોરાક માઇક્રોવેવમાં ઢોળાય છે અને તે ખૂબ જ ગંદુ થઈ જાય છે. માઇક્રોવેવમાં ખોરાક ગરમ કરવો જેટલું સરળ છે, તેની સફાઈ કરવી તેટલી જ કઠિન હોય છે. ઘણા લોકો તો માઇક્રોવેવ સાફ કરતી વખતે એવી ભૂલો પણ કરી બેસે છે, જેનાથી તેની કોટિંગ અને અંદરના પાર્ટ્સ ખરાબ થઈ જાય છે. અહીં અમે તમને જણાવીશું કે માઇક્રોવેવની સફાઈ કરતી વખતે કઈ વસ્તુઓનો ઉપયોગ ન કરવો જોઈએ જેથી માઇક્રોવેવને કોઈ નુકસાન ન પહોંચે.
સૌથી પહેલા માઇક્રોવેવ વિશે જાણો
માઇક્રોવેવની સફાઈ ખૂબ જ જરૂરી છે. દરેક માઇક્રોવેવના અંદરનો ભાગ અલગ-અલગ મટીરિયલનો બનેલો હોય છે. કેટલાક માઇક્રોવેવમાં સ્ટેનલેસ સ્ટીલ હોય છે, જે ડાઘ-ધબ્બાઓને સરળતાથી લાગવા દેતું નથી અને તેને સાફ કરવું પણ સરળ હોય છે. બીજી તરફ, જૂના મોડેલોમાં પેઇન્ટેડ અથવા ઇનેમલવાળી સપાટી હોઈ શકે છે. પહેલા એ જાણો કે તમારા માઇક્રોવેવમાં અંદર શું આપવામાં આવ્યું છે અને પછી સમજો કે કઈ રીતે તમે માઇક્રોવેવને નુકસાન પહોંચાડ્યા વગર તેને સાફ કરી શકો છો.
આ વસ્તુઓને બહાર કાઢીને સાફ કરો
માઇક્રોવેવમાં ઘણી એવી વસ્તુઓ હોય છે, જેને બહાર કાઢીને સાફ કરી શકાય છે. જેમાં ટર્નટેબલ (ફરતી પ્લેટ), સપોર્ટ રિંગ અથવા રોલર અને રેક સામેલ છે. આ તમામને બહાર કાઢો અને અલગથી ધોવો. સામાન્ય રીતે, ટર્નટેબલને ડિશવોશરમાં ધોઈ શકાય છે. માઇક્રોવેવ ઓવનની દીવાલો, છત અને દરવાજાને પણ સાફ કરવા જરૂરી છે. ધ્યાન રાખો કે ટર્નટેબલ વગર ક્યારેય માઇક્રોવેવનો ઉપયોગ કરશો નહીં. સફાઈ અને સૂકવ્યા પછી તેને તરત જ પાછું લગાવી દો.
ઓવન ક્લીનરથી ખરાબ થઈ શકે છે કોટિંગ
જો તમે ઓવન કે માઇક્રોવેવને સાફ કરવા માટે ઓવન ક્લીનરનો ઉપયોગ કરો છો તો તેનાથી બચો. તે ખૂબ જ કઠોર હોય છે અને તેને ઊંચા તાપમાન માટે બનાવવામાં આવે છે. આ ક્લીનરમાં સામાન્ય રીતે એવા કેમિકલ્સ હોય છે, જે તમારા માઇક્રોવેવની અંદરની કોટિંગને નુકસાન પહોંચાડી શકે છે અને ઝેરી અવશેષો છોડી શકે છે.
સ્ક્રબર્સથી ઓવન પર આવી શકે છે ઉજરડા
ખરબચડા સ્ક્રબર્સને બદલે નરમ કાપડ, સ્પોન્જ અથવા માઇક્રોફાઇબર ટુવાલનો ઉપયોગ કરો. સ્ક્રબર્સ તમારું માઇક્રોવેવ ડેમેજ કરી શકે છે. બ્લીચ કેટલીક સપાટી પરથી કીટાણુઓનો નાશ કરી દે છે, પરંતુ તે માઇક્રોવેવ માટે ખૂબ જ કઠોર છે અને તેમાંથી તીવ્ર ગંધ આવી શકે છે. એમોનિયા બેઝ્ડ ક્લીનર પણ કેટલીક માઇક્રોવેવ ફિનિશને નુકસાન પહોંચાડી શકે છે.
સીધો સ્પ્રે કરવાથી ખરાબ થઈ જાય છે વીજળીના પાર્ટ્સ
કોઈ પણ વસ્તુને સીધી વેન્ટ અથવા કંટ્રોલ પેનલવાળા ભાગ પર સ્પ્રે ન કરવી જોઈએ, કારણ કે પાણી અંદર જઈને વીજળીના પાર્ટ્સને નુકસાન પહોંચાડી શકે છે. આ તમામ બાબતોનું ધ્યાન રાખીને તમે ઓવનને સુરક્ષિત રીતે સાફ કરી શકો છો.
