EPFO Inactive Account Refund: નોકરી બદલ્યા પછી અવારનવાર કર્મચારીઓ પોતાના જૂના પીએફ ખાતાને ભૂલી જાય છે. ઘણીવાર ખાતામાં થોડી ઘણી રકમ જમા રહી જાય છે, પરંતુ વર્ષો સુધી કોઈ લેનાર હોતું નથી. આવા ઇનએક્ટિવ (નિષ્ક્રિય) ખાતાઓ વિશે હવે મોટું અપડેટ સામે આવ્યું છે. હકીકતમાં EPFO એ આવા ખાતાઓમાં પડેલી નાની રકમ પરત કરવાની પ્રક્રિયા શરૂ કરવાનો નિર્ણય લીધો છે. કેન્દ્રીય શ્રમ મંત્રાલયના નિર્દેશ પર લેવામાં આવેલા આ પગલાથી લાખો ખાતાધારકોને ફાયદો મળવાની આશા છે. ખાસ વાત એ છે કે જે ખાતાઓમાં ખૂબ ઓછું બેલેન્સ બચ્યું છે, તેમાં પૈસા પરત કરવા માટે ખાતાધારકે અલગથી અરજી કરવાની જરૂર રહેશે નહીં. પૈસા સીધા આધાર સાથે લિંક બેંક ખાતામાં ટ્રાન્સફર કરવામાં આવશે. એવામાં ચાલો હવે તમને જણાવીએ કે PF ખાતામાં જમા રૂપિયા કયા લોકોના બેંક એકાઉન્ટમાં આવશે અને તમે તમારું સ્ટેટસ કેવી રીતે ચેક કરી શકો છો.
કયા ખાતામાં આવશે પૈસા?
દેશભરમાં લગભગ ૩૧ લાખ એવા પીએફ ખાતા ચિહ્નિત કરવામાં આવ્યા છે જે લાંબા સમયથી નિષ્ક્રિય છે. આમાંથી આશરે ૬ લાખ ખાતાઓમાં ૧૦૦૦ કે તેથી ઓછી રકમ જમા છે. સૌથી પહેલા આ જ ખાતાઓમાં પૈસા પરત કરવામાં આવશે. એવામાં જો તમારું જૂનું ખાતું ઘણા વર્ષોથી વપરાશમાં નથી અને તેમાં ૧૦૦૦ થી ઓછું બેલેન્સ છે તો આ રકમ સીધી તમારા આધાર સાથે લિંક બેંક ખાતામાં મોકલવામાં આવશે. ધ્યાન રાખજો કે જે લોકોના બેંક ખાતા અને આધાર વિગતો અપડેટ અને લિંક હશે તે જ ખાતાઓમાં પૈસા ટ્રાન્સફર થશે.
શું હોય છે ઇનએક્ટિવ પીએફ ખાતું?
જો કોઈ પીએફ ખાતામાં સતત ૩ વર્ષ સુધી ન તો કોઈ પેમેન્ટ જમા થાય અને ન તો કોઈ પણ પ્રકારનો ઉપાડ થાય તો તેને ઇનઓપરેટિવ એટલે કે ઇનએક્ટિવ ખાતું માનવામાં આવે છે. જોકે આવું ખાતું હંમેશા માટે બંધ થતું નથી. નવી નોકરી મળવા પર જૂના UAN ને નવા એમ્પ્લોયર સાથે લિંક કરી ફરીથી એક્ટિવ કરી શકાય છે. બીજી તરફ ઘણીવાર ફરિયાદો મળે છે કે કેટલીક કંપનીઓ કર્મચારીઓના પગારમાંથી પીએફ કાપી તો લે છે પરંતુ તેને સમયસર જમા કરાવતી નથી. આના પર દેખરેખ મજબૂત કરવા માટે EPFO પોતાના ડેટાબેઝને સરકારી ખરીદ પોર્ટલ GeM, GST વિભાગ અને અન્ય એજન્સીઓ સાથે જોડી રહ્યું છે. આનાથી એ જાણી શકાશે કે કઈ કંપનીઓ નિયમોનું પાલન નથી કરી રહી.
કેવી રીતે ચેક કરશો તમારું સ્ટેટસ?
જો તમારું ખાતું ઇનએક્ટિવ છે અને તમે સરકારની આ પહેલ હેઠળ તમારા ખાતામાં બેલેન્સ ચેક કરવા માંગો છો તો તમે EPFO પોર્ટલ પર લોગિન કરી બેલેન્સ જોઈ શકો છો.
આ ઉપરાંત UMANG એપ દ્વારા ‘View Passbook’ ઓપ્શનથી પણ તમને માહિતી મળે છે.
તેમજ રજિસ્ટર્ડ મોબાઈલ નંબર પરથી મિસ્ડ કોલ આપીને પણ બેલેન્સની જાણકારી મેળવી શકાય છે.
આ સિવાય SMS મોકલીને પણ પીએફ બેલેન્સ ચેક કરી શકાય છે.
