Flight Booking Tips: ફ્લાઇટની કિંમતો ક્યારેય નિશ્ચિત હોતી નથી. એક મિનિટે તમે કોઈ સારી ડીલ જોઈ રહ્યા હોવ છો અને બીજી જ પળે તે જતી રહે છે. જો તમે ક્યારેય વિચાર્યું હોય કે ફ્લાઇટની કિંમતો અસલમાં ક્યારે ઓછી થાય છે, તો તમે એકલા નથી. અહીં અમે તમને જણાવીએ છીએ કે ફ્લાઇટની કિંમતો પર શેની અસર પડે છે અને સૌથી ઓછું ભાડું મેળવવા માટે શું કરવું જોઈએ.
ફ્લાઇટના ભાવ ક્યારે ઓછા થાય છે?
ખરેખર, ફ્લાઇટની કિંમતો ડિમાન્ડ, સિઝન અને રૂટના હિસાબે સતત બદલાતી રહે છે. બુકિંગ કરવા માટે કોઈ એક નક્કી કરેલો સૌથી સસ્તો દિવસ નથી. ઘણીવાર તમને ટિકિટના ભાવ ઓછા પણ મળી શકે છે, જે ત્યારે થાય છે જ્યારે માંગ ઓછી હોય એટલે કે તે રૂટ પર વધુ લોકો ટિકિટ નથી ખરીદી રહ્યા. આ ઉપરાંત જો કોઈનું બુકિંગ કેન્સલ થાય અને સીટ ખાલી પડે તો કિંમત ઘટી શકે છે. એરલાઇન્સ ઘણીવાર ફેસ્ટિવ ઓફર, ફ્લેશ સેલ કે લિમિટેડ પીરિયડ ડિસ્કાઉન્ટ પણ આપે છે, જે દરમિયાન બુકિંગ ફાયદાકારક રહે છે.
ફ્લાઇટ બુક કરવાનો સૌથી સારો દિવસ
ફ્લાઇટના ભાવ રોજ બદલાતા રહે છે, પરંતુ જો તમારી પાસે પસંદગીનો મોકો હોય, તો શુક્રવારે ટિકિટ બુક કરવી સામાન્ય રીતે ફાયદાકારક માનવામાં આવે છે. Expedia ના ડેટા અનુસાર, શુક્રવારે સારી ઓફર્સ મળવાની સંભાવના વધુ હોય છે. જોકે, યાદ રાખો કે કયા દિવસે બુક કરો છો તેના કરતા વધુ જરૂરી એ છે કે તમે કેટલા દિવસ પહેલા બુક કરો છો. ફ્લાઇટની ડિમાન્ડ અને બાકી રહેલી સીટોની સંખ્યા કિંમત નક્કી કરવામાં મહત્વનો ભાગ ભજવે છે.
મુસાફરીના કેટલા સમય પહેલા બુકિંગ કરવું?
બહુ વહેલું ટિકિટ બુક કરવાની પણ જરૂર હોતી નથી. નિષ્ણાતો અને ‘Going’ જેવી વેબસાઇટ્સના જણાવ્યા મુજબ:
ડોમેસ્ટિક (સ્થાનિક) મુસાફરી: મુસાફરીના ૧ થી ૩ મહિના પહેલા ટિકિટ બુક કરવી સૌથી યોગ્ય રહે છે.
ઇન્ટરનેશનલ (આંતરરાષ્ટ્રીય) મુસાફરી: મુસાફરીના ૨ થી ૮ મહિના પહેલા બુકિંગ કરવું વધુ સારું છે.
ઉડાન ભરવા માટેનો સૌથી સસ્તો દિવસ
Expedia ના ૨૦૨૬ ના ડેટા અનુસાર, ડોમેસ્ટિક ફ્લાઇટ્સમાં મુસાફરી કરવા માટે શુક્રવાર સૌથી સસ્તો દિવસ માનવામાં આવે છે. શુક્રવારે ઉડાન ભરવી એ રવિવારની સરખામણીમાં ૮% સુધી સસ્તું પડી શકે છે. આ ઉપરાંત મંગળવારે ઉડાન ભરવી પણ ઘણી ફાયદાકારક છે, જે રવિવારની સરખામણીમાં લગભગ ૧૪% સસ્તું હોય છે.
