Imran Khan: પાકિસ્તાનમાં નેતાઓની ધરપકડ, તેમનું જેલમાં જવું, જેલમાંથી બહાર આવવું અને ફરી વડાપ્રધાન બની જવું, બધું જ રાજકીય શતરંજ જેવું છે. ઇમરાન ખાનને પાકિસ્તાની સુપ્રીમ કોર્ટના આદેશ બાદ અદિયાલા જેલમાંથી હોસ્પિટલમાં ખસેડવામાં આવ્યા હતા અને સારવાર બાદ તેમને ફરી જેલમાં મોકલી દેવામાં આવ્યા છે. પાકિસ્તાનમાં આખી રાત ડ્રામા ચાલ્યો. 6 ડૉક્ટરોની ટીમે કહ્યું કે ઇમરાન ખાન સ્વસ્થ છે અને તેઓ જેલમાં રહી શકે છે.
લોકો વિચારી રહ્યા હશે કે પાકિસ્તાની સુપ્રીમ કોર્ટ ઘણી શક્તિશાળી છે. ત્યાં નિર્ણયોની અમલવારી કરવામાં આવે છે. પરંતુ એવું કંઈ નથી. સુપ્રીમ કોર્ટ પણ સેનાના ઇશારે નિર્ણય કરે છે અને ઇમરાન ખાનનું જેલમાંથી બહાર આવવું તથા ફરી જેલમાં જવા પાછળ પણ આવી જ કોઈ કહાની છે. આ સમગ્ર એક રાજકીય સ્ક્રિપ્ટ છે અને ખૂબ મોટી સિક્રેટ ડીલની કહાનીનો ભાગ છે, જેના હેઠળ ઇમરાન ખાનને સારવાર માટે વિદેશ સુધી મોકલવામાં આવી શકે છે.
શહબાઝનું ‘ટિક-ટોક, ટિક-ટોક’ શરૂ?
યાદ કરો કે થોડા દિવસ પહેલાં જ બિલાવલ ભુટ્ટોએ એક વીડિયો બનાવ્યો હતો. પાકિસ્તાન પીપલ્સ પાર્ટીના પ્રમુખ બિલાવલ ભુટ્ટોએ તે વીડિયોમાં શહબાઝ શરીફ સરકાર અને PML-Nને ચેતવણી આપી હતી. તેમાં તેમણે PoK ચૂંટણીમાં ધાંધલીના કારણને લઈને કહ્યું હતું કે સરકારની ઊંધી ગણતરી શરૂ થઈ ગઈ છે. તેમણે સોશિયલ મીડિયા પર વીડિયો શેર કરીને કહ્યું હતું, ‘ટિક-ટોક, ટિક-ટોક… તમારું કાઉન્ટડાઉન શરૂ થઈ ગયું છે.’
એક ઇન્ટરવ્યૂમાં પાકિસ્તાનના વરિષ્ઠ જર્નાલિસ્ટ હામિદ મીરે કહ્યું કે, ‘શરીફ પરિવાર જાણે છે કે પડદા પાછળથી તેમણે વર્ષોથી કેવી રીતે ડીલ કરી છે અને તેઓ તેથી પરેશાન છે કારણ કે તેમને ખબર છે કે ઇમરાન ખાન પણ આવી જ કોઈ ડીલ હેઠળ જેલમાંથી બહાર આવ્યા છે.’ રોઇટર્સના અહેવાલ અનુસાર, ઇમરાન ખાનના એક નજીકના સહયોગીએ રોઇટર્સને જણાવ્યું કે જો તેમને મુક્ત કરવામાં આવે તો તેઓ સેના અથવા સેનાપ્રમુખ અસીન મુનીર સાથે ટકરાવ નહીં કરે. તેમણે મુનીરને એવા વ્યક્તિ તરીકે રજૂ કર્યા જે આ અઠવાડિયે કાનૂની મામલામાં થયેલી પ્રગતિ બાદ ‘સમાધાનનો હાથ’ લંબાવી શકે છે.
ઇમરાન ખાનની પાર્ટી PTIના પ્રવક્તા ઝુલ્ફિકાર બુખારીએ અત્યાર સુધીનો સૌથી મજબૂત સંકેત આપ્યો કે પાર્ટી સેના સાથે સમાધાન કરવા તૈયાર છે. આ પાર્ટીના વલણમાં મોટો ફેરફાર છે અને આ વાતનો સંકેત છે કે ઇમરાન ખાન અને અસીન મુનીર વચ્ચે કોઈ સમજૂતી થઈ ગઈ છે.
ઇમરાન ખાન અને અસીન મુનીર વચ્ચે સમજૂતી?
પાકિસ્તાની સેના સાથે નજીકના સૂત્રોએ ગુરુવારે ન્યૂઝ-18ને જણાવ્યું છે કે એક ‘યોગ્ય સમજૂતી’ બાદ ઇમરાન ખાન ખરેખર જેલમાંથી બહાર આવી ચૂક્યા છે અને ટૂંક સમયમાં તેમની રાજકીય વાપસી થઈ શકે છે. સૂત્રોનું કહેવું છે કે તેમનું જેલમાંથી હોસ્પિટલ જવું લગભગ જેલમાંથી બહાર આવવા જેવું જ માનવામાં આવે છે. આ સંકેત આપે છે કે આ ઘટનાક્રમ ઇમરાન ખાનને રાજકીય વ્યવસ્થામાં પાછા લાવવાની એક મોટી પ્રક્રિયાનો ભાગ હોઈ શકે છે. સૂત્રે કહ્યું, ‘આ એક સંપૂર્ણ પ્રક્રિયા છે જેમાં તેમને ફરી મુખ્યધારામાં લાવવામાં આવશે અને તેઓ વર્તમાન વ્યવસ્થાને મજબૂત કરશે.’
સૂત્રોના જણાવ્યા અનુસાર સેના અને સત્તા પ્રતિષ્ઠાનને એ અહેસાસ થઈ ગયો છે કે ઇમરાન ખાન હજુ પણ એક ‘મોટી રાજકીય તાકાત’ બની રહ્યા છે. તેમનું માનવું છે કે તેમને બહાર આવવા દેવામાં અને વર્તમાન શાસન વ્યવસ્થાને સમર્થન આપવા દેવામાં કોઈ નુકસાન નથી. તેમને ફરી જેલમાં મોકલવામાં આવવું પણ એ જ ડ્રામાનો ભાગ છે. આ જનતાની આંખોમાં ધૂળ નાખવા જેવું જ છે.
ઇમરાન ખાન શું અસીન મુનીર વિરુદ્ધ નહીં બોલે?
સૂત્રોના જણાવ્યા અનુસાર પાકિસ્તાનના ફીલ્ડ માર્શલ અસીન મુનીરની વ્યૂહરચના એ છે કે જ્યારે પાકિસ્તાન પોતાની આંતરરાષ્ટ્રીય ભૂમિકા પર ધ્યાન આપી રહ્યું છે ત્યારે તમામ લોકો ‘આંતરિક રીતે સાથે મળીને’ કામ કરે. જ્યારે ઇમરાન ખાનના નજીકના સૂત્રોએ કહ્યું કે તેઓ પાકિસ્તાન છોડશે નહીં. તેમણે કહ્યું કે જો તેમને વિદેશ જવું હોત તો તેઓ ઘણા સમય પહેલાં જ જતા રહ્યા હોત.
જોકે પાકિસ્તાનના કેટલાક પત્રકારોનું કહેવું છે કે અસીન મુનીર પાકિસ્તાનના ચાર પ્રાંતોને 12 અલગ-અલગ ભાગોમાં વહેંચવા માંગે છે. પરંતુ ન તો શહબાઝ શરીફ અને ન તો બિલાવલ ભુટ્ટો તેના માટે તૈયાર છે. ખાસ કરીને બિલાવલ ભુટ્ટો, જેમની પાર્ટીની સરકાર સિંધમાં છે, તેમને ખબર છે કે જો સિંધના ત્રણ ભાગ કરવામાં આવ્યા તો પાર્ટી હંમેશા માટે જ ખતમ થઈ જશે.
પ્રાંતોના વિભાજન માટે સંસદમાં બે તૃતીયાંશ બહુમતીની જરૂર છે અને જો શહબાઝ શરીફને વડાપ્રધાન તરીકે ચાલુ રહેવું હોય તો તેમને પ્રાંતોનું વિભાજન કરવું જ પડશે. આવી સ્થિતિમાં ઇમરાન ખાનને જેલમાંથી બહાર લાવવામાં આવ્યા છે જેથી બિલાવલ ભુટ્ટો જો સંસદમાં બિલનું સમર્થન ન કરે તો ઇમરાન ખાનની પાર્ટીના સાંસદો બિલનું સમર્થન કરે.
શહબાઝ શરીફના કેમ છૂટી રહ્યા છે પરસેવા?
શરીફ પરિવારનો સેના સાથે સમજૂતીઓનો લાંબો ઇતિહાસ રહ્યો છે. શહબાઝ જાણે છે કે ઇમરાન ખાનના માધ્યમથી અસીન મુનીર હવે તેમના પર દબાણ બનાવશે. શહબાઝ એ પણ જાણે છે કે ઇમરાન ખાનની રાજકીય વાપસી તેમની સત્તામાંથી વિદાયનો માર્ગ ખોલી શકે છે. અહેવાલ અનુસાર સંભવિત સમજૂતી હેઠળ ઇમરાન ખાનને સૌથી પહેલાં મેડિકલ અને જેલ સાથે જોડાયેલી રાહત મળી શકે છે.
ત્યારબાદ ધીમે ધીમે પ્રતિબંધો ઘટાડવામાં આવી શકે છે અને બાદમાં કેટલાક કેસ પાછા ખેંચવામાં આવી શકે છે અથવા તેમાં નરમાઈ રાખવામાં આવી શકે છે. સૂત્રે આગળ જણાવ્યું કે ત્યારબાદ ઇમરાન ખાનને રાજકારણમાં પાછા ફરવાની મંજૂરી આપવામાં આવી શકે છે, પરંતુ આવું ત્યારે જ થશે જ્યારે તેઓ જાહેરમાં અથવા ખાનગી રીતે એવો સંકેત આપે કે તેઓ અસીન મુનીર અથવા સેના સાથે તરત કોઈ નવો ટકરાવ શરૂ નહીં કરે.
