Indian consular services in Dallas: અમેરિકામાં રહેતા NRIs ને હવે ઘરની નજીક કોન્સ્યુલર સેવાઓ મળશે. હ્યુસ્ટનમાં ભારતના કોન્સ્યુલેટ જનરલે ટેક્સાસના ડલાસમાં નવા ભારતીય કોન્સ્યુલેટ એપ્લિકેશન સેન્ટર (ICAC)નું ઉદ્ઘાટન કર્યું. આ પછી, ડલાસ-ફોર્ટ વર્થ વિસ્તારમાં રહેતા હજારો ભારતીય મૂળના રહેવાસીઓ જરૂરી કોન્સ્યુલર સેવાઓ મેળવી શકશે.
8360 લિન્ડન બી જોહ્ન્સન ફ્રીવે સ્યુટ A-230 ખાતે ખુલેલા નવા સેન્ટરનું ઉદ્ઘાટન યુનાઇટેડ સ્ટેટ્સમાં ભારતના રાજદૂત વિનય ક્વાત્રા દ્વારા વર્ચ્યુઅલી કરવામાં આવ્યું હતું. તેમણે કહ્યું કે સમગ્ર અમેરિકામાં નવા કોન્સ્યુલર એપ્લિકેશન સેન્ટરનું ઉદ્ઘાટન NRIs ને તેમના ઘરની નજીક સેવાઓ પૂરી પાડીને વધુ અસરકારક રીતે સેવા આપવાના અમારા મિશનનો એક ભાગ છે. અમે ભારત અને તેના વૈશ્વિક સમુદાય વચ્ચેના સંબંધોને મજબૂત બનાવવા માટે પ્રતિબદ્ધ છીએ.
કોન્સ્યુલેટ જનરલ ડીસી મંજુનાથે જણાવ્યું હતું કે ડલાસમાં એક મોટો ભારતીય સમુદાય છે. આ ICAC ના ઉદઘાટન પછી, હવે NRIs હ્યુસ્ટન ગયા વિના તાત્કાલિક જરૂરી કોન્સ્યુલર સેવાઓનો લાભ લઈ શકે છે. તે ખરેખર કોન્સ્યુલેટને તમારા ઘરઆંગણે લાવી રહ્યું છે.
સ્થાનિક ચૂંટાયેલા અધિકારીઓએ પણ આ પગલાનું સ્વાગત કર્યું. ટેક્સાસ રાજ્યના પ્રતિનિધિ વિકી ગુડવિને જણાવ્યું હતું કે નવું કોન્સ્યુલેટ સેન્ટર આપણા ભારતીય-અમેરિકન પડોશીઓ માટે એક મહત્વપૂર્ણ સંસાધન છે, જે સરકારી સેવાઓને વધુ સુલભ અને અનુકૂળ બનાવે છે. ડલાસ ઇન્ડિયન એસોસિએશનના પ્રમુખ રાજેશ મહેતાએ જણાવ્યું હતું કે ICAC ડલાસ વિસ્તારના રહેવાસીઓ માટે એક ક્રાંતિકારી પરિવર્તન છે. તે ભારતના ડાયસ્પોરા સમુદાય પ્રત્યેના સમર્પણને પ્રતિબિંબિત કરે છે અને લોકોના જીવનમાં વાસ્તવિક પરિવર્તન લાવે છે.
નવ સ્થળોએ કેન્દ્રો ખોલવામાં આવશે
ડલાસ ICAC એ યુનાઇટેડ સ્ટેટ્સમાં કોન્સ્યુલેટ સેવાઓની પહોંચને વિસ્તૃત કરવા માટે ખોલવામાં આવતા નવ કેન્દ્રોમાંથી એક છે. આ પછી, બોસ્ટન, કોલંબસ, ડેટ્રોઇટ, એડિસન, ઓર્લાન્ડો, રેલે, સાન જોસ અને લોસ એન્જલસમાં પણ કેન્દ્રો ખોલવામાં આવશે. આ કેન્દ્રોમાં, લોકોને પાસપોર્ટ, વિઝા, ઓવરસીઝ સિટીઝન ઓફ ઇન્ડિયા (OCI) અરજી, પાવર ઓફ એટર્ની, જન્મ અને લગ્ન પ્રમાણપત્ર, ચકાસણી, વિદેશી નાગરિકો માટે પોલીસ ક્લિયરન્સ પ્રમાણપત્ર, NORI અને જીવન પ્રમાણપત્ર સહિતની સેવાઓ મળશે. જણાવવામાં આવ્યું હતું કે આ કેન્દ્ર સોમવારથી શનિવાર સુધી ખુલ્લું રહેશે.