Iran Attack 13 US Bases: ઈરાનના ભીષણ હુમલામાં મિડલ ઈસ્ટમાં આવેલા અમેરિકાના ઓછામાં ઓછા 13 સૈન્ય ઠેકાણાઓ પૂરી રીતે તબાહ થઈ ગયા છે. ઈરાની મિસાઈલોએ અમેરિકી સૈન્ય મથકોને ખંડેરમાં ફેરવી દીધા છે. જેના કારણે અમેરિકી સૈનિકોને હોટલોમાં કે ક્યાંક દૂર જઈને લડાઈનું પ્લાનિંગ કરવું પડી રહ્યું છે. રિપોર્ટ મુજબ હાલત હવે એ થઈ ગઈ છે કે અમેરિકી સૈનિકો માટે યુદ્ધનું મેદાન અનેક ટુકડાઓમાં વહેંચાઈ ગયું છે. સૈન્ય અધિકારીઓએ આ સ્થિતિને ‘રિમોટ વોર’ એટલે કે દૂરથી લડવામાં આવતું યુદ્ધ ગણાવ્યું છે.
અમેરિકાના સૈન્ય અધિકારીઓનો હવાલો આપીને ન્યૂયોર્ક ટાઈમ્સે જણાવ્યું છે કે ‘ઈરાને મધ્ય પૂર્વમાં અમેરિકાના સૈન્ય ઠેકાણાઓને નિશાન બનાવીને ભીષણ મિસાઈલ હુમલા કર્યા છે. જેના કારણે સૈન્ય ઠેકાણાઓને એટલું બધું નુકસાન પહોંચ્યું છે કે હવે ત્યાંથી સૈનિકો યુદ્ધ સંબંધિત કામ નથી કરી શકતા. તેઓ હવે આ ક્ષેત્રમાં આવેલા બીજા હોટલો કે બીજી ઓફિસોમાં જઈને યુદ્ધ સંબંધિત ઓપરેશનને અંજામ આપી રહ્યા છે.’
મિડલ ઈસ્ટમાં અમેરિકાના 13 સૈન્ય ઠેકાણા તબાહ
મુખ્ય સૈન્ય મથકો ખંડેર બની જવાના કારણે અથવા ઈરાની મિસાઈલોના ચોક્કસ નિશાન પર હોવાને લીધે હજારો અમેરિકી સૈનિકો આખા ક્ષેત્રમાં વિખેરાઈ ગયા છે. કેટલાક સૈનિકોને યુરોપ સુધી મોકલી દેવામાં આવ્યા છે જ્યારે અન્ય મધ્ય-પૂર્વમાં જ છે પરંતુ હવે તેઓ પોતાના મૂળ ઠેકાણા પરથી કામ નથી કરી રહ્યા. રિપોર્ટમાં કહેવામાં આવ્યું છે કે ‘હવે જમીન પર હાજર સેનાનો એક મોટો હિસ્સો અસલમાં દૂરથી કામ કરતા જ યુદ્ધ લડી રહ્યો છે.’
જોકે પેન્ટાગોનનું છતાં પણ કહેવું છે કે ઓપરેશન ઝડપથી આગળ વધી રહ્યા છે. અમેરિકાના રક્ષા સચિવ પીટ હેગસેથે કહ્યું કે ‘અમેરિકાએ ઈરાની ઠેકાણાઓ પર 7,000 થી વધુ હુમલા કર્યા છે.’ તેમણે કહ્યું કે ‘અત્યાર સુધી અમે ઈરાન અને તેના સૈન્ય માળખામાં 7,000 થી વધુ ઠેકાણાઓ પર હુમલા કર્યા છે.’ તેમણે આગળ ઉમેર્યું કે ‘આજનો હુમલો અત્યાર સુધીનો સૌથી મોટો હુમલો હશે બિલકુલ તેવી જ રીતે જેમ ગઈકાલનો હુમલો હતો.’
મધ્ય પૂર્વમાં અમેરિકાના કયા કયા સૈન્ય ઠેકાણા થયા તબાહ?
કુવૈતમાં પોર્ટ શુએબા, અલી અલ સલેમ એર બેઝ અને કેમ્પ બ્યુહરિંગ જેવા ઠેકાણાઓને ભારે નુકસાન થયું છે.
પોર્ટ શુએબા પર થયેલા એક હુમલામાં સેનાનું એક ‘ટેક્ટિકલ ઓપરેશન્સ સેન્ટર’ તબાહ થઈ ગયું અને અમેરિકાના છ સૈનિકો માર્યા ગયા.
ઈરાની મિસાઈલો અને ડ્રોનોએ કતારના અલ ઉદીદ એર બેઝ પર પણ હુમલો કર્યો જેનાથી એક મહત્વપૂર્ણ રડાર સિસ્ટમ તબાહ થઈ ગઈ છે.
બહેરીનમાં એક ‘વન-વે’ એટેક ડ્રોને અમેરિકી ફિફ્થ ફ્લીટના મુખ્યાલયમાં સંચાર ઉપકરણોને ઘણું નુકસાન પહોંચાડ્યું છે.
સાઉદી અરેબિયાના પ્રિન્સ સુલતાન એર બેઝ પર થયેલા હુમલાથી ઈંધણ ભરનારા ટેન્કરો અને સંચાર પ્રણાલીઓને નુકસાન પહોંચ્યું છે જેનાથી ત્યાંનું કામકાજ વધુ ખોરવાઈ ગયું.
સંયુક્ત આરબ અમીરાતમાં અલ ધફરા એર બેઝ અને અલ-રુવૈસ સૈન્ય ઠેકાણાઓ પર રડાર સાઇટ્સ અને ઇમારતોને ભારે નુકસાન થયું છે.
ઇરાકમાં ઐન અલ-અસદ અને ઇરબિલ એરબેઝ અને જોર્ડનમાં મુવાફ્ફાક અલ-સાલ્તી એરબેઝ પર પણ ઈરાનની બેલેસ્ટિક મિસાઈલો પડી છે. હાલમાં નુકસાનની પૂરી જાણકારી નથી.
ન્યૂયોર્ક ટાઈમ્સે આકલનના આધારે કહ્યું છે કે આ 13 સૈન્ય મથકો પર ઈરાની મિસાઈલો પડવાને કારણે અમેરિકી સૈન્ય સંપત્તિઓને ઓછામાં ઓછું 800 મિલિયન ડોલરનું નુકસાન થયું છે. આનાથી અમેરિકી સૈનિકોના જંગ લડવાની ક્ષમતા પર ગંભીર અસર પડી છે.
ઈરાને મિડલ ઈસ્ટના સામાન્ય નાગરિકોને શું ચેતવણી આપી?
ઈરાનના ઈસ્લામિક રિવોલ્યુશનરી ગાર્ડ્સ કોર્પ્સ (IRGC) એ આ ક્ષેત્રના નાગરિકોને અપીલ કરી છે કે તેઓ અમેરિકી સૈનિકોના નવા ઠેકાણાઓની જાણકારી આપે. આનાથી તે સૈનિકોની સુરક્ષાને લઈને ચિંતા વધી ગઈ છે જે હવે હોટલો કે બીજી ઓફિસોથી જંગ લડી રહ્યા છે. ઈરાની મીડિયા દ્વારા જારી સંદેશાઓમાં IRGC એ રહીશોને ચેતવણી આપી છે કે તેઓ અમેરિકી સૈનિકોને પોતાના ત્યાં આશરો ન આપે. તેમને અપીલ કરવામાં આવી છે કે તેઓ મેસેજિંગ પ્લેટફોર્મ્સ દ્વારા અમેરિકી સૈનિકો વિશે જાણકારી આપે જેથી તેમને નિશાન બનાવી શકાય.
