Iran Missiles Hit 5 Us Kc 135 Refueling Aircraft: ઈરાન સાથેના યુદ્ધમાં અમેરિકાને મોટો ઝટકો લાગ્યો છે. અહેવાલ મુજબ, સાઉદી અરેબિયાના પ્રિન્સ સુલતાન એર બેઝ પર ઈરાનના મિસાઈલ હુમલામાં અમેરિકાના પાંચ રિફ્યુલિંગ એરક્રાફ્ટને નુકસાન પહોંચ્યું છે. બે અમેરિકી અધિકારીઓના જણાવ્યા અનુસાર, ઈરાની મિસાઈલ હુમલા દરમિયાન આ વિમાનો જમીન પર જ હતા. તેમણે જણાવ્યું કે જે વિમાનો પ્રભાવિત થયા છે, તે અમેરિકી એરફોર્સના KC-135 રિફ્યુલિંગ ટેન્કર હતા.
અમેરિકી એરટેન્કરોને નુકસાન
અધિકારીઓએ જણાવ્યું કે તાજેતરના દિવસોમાં થયેલા હુમલા દરમિયાન આ ટેન્કરો પર પ્રહાર કરવામાં આવ્યો હતો. અધિકારીઓએ સ્પષ્ટ કર્યું કે ટેન્કરો ક્ષતિગ્રસ્ત તો થયા હતા, પરંતુ પૂરી રીતે નષ્ટ થયા નહોતા અને હવે તેમનું સમારકામ કરવામાં આવી રહ્યું છે. રિપોર્ટમાં કહેવામાં આવ્યું છે કે આ હુમલાઓમાં કોઈ જાનહાનિ થઈ નથી. બીજી તરફ, અમેરિકી સેન્ટ્રલ કમાન્ડે આ અંગે ટિપ્પણી કરવાનો ઇનકાર કરી દીધો છે.
અત્યાર સુધીમાં 7 રિફ્યુલિંગ એરક્રાફ્ટ બન્યા શિકાર
આ ઘટના ગુરુવારે વાયુસેનાના બે KC-135 રિફ્યુલિંગ ટેન્કરની એકબીજા સાથે ટક્કર થયા બાદ સામે આવી છે. તે અકસ્માતમાં એક એર રિફ્યુલિંગ ટેન્કર જમીન પર પડીને ક્રેશ થઈ ગયું હતું, જ્યારે બીજું સુરક્ષિત લેન્ડ કરવામાં સફળ રહ્યું હતું. પેન્ટાગોને શુક્રવારે જણાવ્યું હતું કે પ્લેન ક્રેશમાં તેમાં સવાર ક્રૂ મેમ્બર્સના તમામ છ સભ્યોના મોત થયા હતા. હવે 5 વિમાનો પર હુમલાની માહિતી સાથે જ અમેરિકી વાયુસેનાના નષ્ટ કે નુકસાન પામેલા વિમાનોની સંખ્યા 7 થઈ ગઈ છે.
અમેરિકી સૈન્ય મથકો પર ઈરાન કરી રહ્યું છે હુમલા
અમેરિકાએ 28 ફેબ્રુઆરીએ ઈઝરાયેલ સાથે મળીને ઈરાન પર હુમલો કરી દીધો હતો. શરૂઆતી હુમલામાં જ ઈરાનના સુપ્રીમ લીડર અલી ખામેનેઈ, સંરક્ષણ મંત્રી અઝીઝ નાસેર ઝાદેહ, રિવોલ્યુશનરી ગાર્ડના વડા મોહમ્મદ પાકપોર સહિત અનેક અગ્રણી લોકો માર્યા ગયા હતા. આના જવાબમાં ઈરાન સમગ્ર મિડલ ઈસ્ટમાં હાજર અલગ-અલગ બેઝ પર અમેરિકી સૈનિકો અને સૈન્ય માળખાને નિશાન બનાવી રહ્યું છે. ઈરાનના સુરક્ષા ચીફ અલી લારીજાનીએ કહ્યું છે કે અમેરિકાએ આ હુમલા માટે પસ્તાવો કરવો પડશે. લારીજાનીએ એમ પણ કહ્યું કે અલી ખામેનેઈના લોહીની કિંમત ટ્રમ્પે ચૂકવવી પડશે.
