Iran US Conflict: હોર્મુઝ જલડમરુમધ્યમાં તાજેતરની અથડામણ બાદ અમેરિકા અને ઈરાન વચ્ચે તણાવ ફરી એકવાર વધી ગયો છે. ઈરાને તાજી ધમકી આપી છે કે જો અમેરિકાએ ફારસની ખાડીમાં ફરી પ્રવેશવાનો પ્રયાસ કર્યો તો તેને તબાહ કરી દેવામાં આવશે. ઈરાનની ધમકી બાદ આ વિસ્તારમાં ફરીથી સંઘર્ષ શરૂ થવાની શક્યતા તેજ થઈ ગઈ છે. આ દરમિયાન અમેરિકી રાષ્ટ્રપતિ ડોનાલ્ડ ટ્રમ્પે પણ ઈરાન વિરુદ્ધ પ્રોજેક્ટ ફ્રીડમને ફરી શરૂ કરવાની ધમકી આપી છે.
ઈરાનની અમેરિકાને ખુલ્લી ધમકી
ઈરાનની અર્ધ-સરકારી સમાચાર એજન્સી તસ્નીમ ન્યૂઝ દ્વારા એક ઈરાની સૈન્ય સ્ત્રોતે ઈરાની તેલ ટેન્કરો પર અમેરિકાના હુમલાને યુદ્ધવિરામનું ઉલ્લંઘન અને આતંકવાદ ગણાવ્યો. સ્ત્રોતે આગળ કહ્યું કે “હાલમાં આ વિસ્તારમાં કોઈ અથડામણ થઈ રહી નથી, પરંતુ અમેરિકાએ ફારસની ખાડીમાં ફરી ઘૂસવાની કોશિશ કરી તો તેને નિર્ણાયક જવાબ મળશે.”
આ પહેલા ઈરાનના વિદેશ મંત્રાલયના પ્રવક્તા ઈસ્માઈલ બાકેઈ એ શુક્રવારે X પર એક પોસ્ટમાં અમેરિકાને ચેતવણી આપી. તેમણે ઈરાન પરના હુમલાને પ્યાર ભરી થપકી (Love Tap) થી વધારે ગણાવ્યો. રાષ્ટ્રપતિ ટ્રમ્પે ઈરાન પર અમેરિકાના હુમલાને લવ ટેપ કહ્યો હતો.
ઈરાની સૈન્ય ઠેકાણાઓ પર અમેરિકાનો હુમલા
અમેરિકાએ ગુરુવારે ઈરાનના સૈન્ય ઠેકાણાઓ પર હુમલા કર્યા હતા. અમેરિકી સેન્ટ્રલ કમાન્ડે આ વિશે માહિતી આપતા કહ્યું હતું કે આ હુમલાઓમાં ઈરાનના એ સૈન્ય ઠેકાણાઓને નિશાન બનાવવામાં આવ્યા જે અમેરિકી જંગી જહાજો પર હુમલો કરવા માટે જવાબદાર હતા. જેમાં મિસાઈલ અને ડ્રોન લોન્ચ કરવાની જગ્યાઓ, કમાન્ડ અને કંટ્રોલ સેન્ટર સામેલ હતા. ઈરાને કહ્યું કે અમેરિકાએ નાગરિક વિસ્તારો પર હુમલા કર્યા હતા.
પ્રોજેક્ટ ફ્રીડમ ફરી શરૂ કરવાની ચેતવણી
આ દરમિયાન અમેરિકી રાષ્ટ્રપતિ ડોનાલ્ડ ટ્રમ્પે ઈરાનને તાજી ધમકી આપી છે. ટ્રમ્પે ઈરાનને જલ્દી ડીલ પર હસ્તાક્ષર કરવા કહ્યું અને ચેતવણી આપી કે “જો બધું સાઈન થઈ શકતું નથી તો અમે કોઈ બીજો રસ્તો અપનાવીશું. જો વસ્તુઓ બરાબર થઈ શકતી નથી તો અમે પ્રોજેક્ટ ફ્રીડમ પર પાછા જઈ શકીએ છીએ. પરંતુ આ પ્રોજેક્ટ ફ્રીડમ પ્લસ હશે, જેનો અર્થ છે કે પ્રોજેક્ટ ફ્રીડમની સાથે સાથે કેટલીક અન્ય વસ્તુઓ પણ હશે.”
