Kash Patel Email Hack: ઈરાન સાથે જોડાયેલા હેકર્સે અમેરિકી એજન્સી FBI ના ડાયરેક્ટર કાશ પટેલના પર્સનલ ઈમેલ ઈનબોક્સમાં સેંધ લગાવી છે. હેકર્સે પટેલના ઈમેલમાંથી તસવીરો અને અન્ય દસ્તાવેજો કાઢીને ઈન્ટરનેટ પર પબ્લિશ કરી દીધા છે. અમેરિકી ન્યાય વિભાગના એક અધિકારીએ ન્યૂઝ એજન્સી રોયટર્સને આ બાબતની પુષ્ટિ કરી છે.
હેકર્સ ગ્રુપે જાહેર કર્યું નિવેદન
ઈરાન સમર્થક હેકિંગ ગ્રુપ ‘હંડાલા હેક ટીમ’ એ શુક્રવારે દાવો કર્યો હતો કે તેણે FBI ડાયરેક્ટર કાશ પટેલનું એકાઉન્ટ હેક કરીને તેમના ઈનબોક્સ સુધી પહોંચ બનાવી છે. ગ્રુપે ઓનલાઈન તેમની વર્ષો જૂની તસવીરો, વર્ક રિઝ્યુમ અને અન્ય અંગત દસ્તાવેજો પોસ્ટ કર્યા છે, જેમાંથી ઘણા રેકોર્ડ એક દાયકા કરતા પણ વધુ જૂના છે.
હેકર્સ ગ્રુપે પોતાની વેબસાઈટ પર જણાવ્યું કે, કાશ પટેલ હવે પોતાનું નામ એવા લોકોની યાદીમાં જોશે જેમને સફળતાપૂર્વક હેક કરવામાં આવ્યા છે. હેકર્સે પટેલની એવી તસવીરો જાહેર કરી છે જેમાં તેઓ સિગાર પીતા, જૂની કન્વર્ટિબલ કારમાં સવારી કરતા અને રમની બોટલ સાથે અરીસામાં સેલ્ફી લેતા જોવા મળે છે.
કોણ છે આ ‘હંડાલા ગ્રુપ’?
હંડાલા પોતાને પેલેસ્ટાઈન સમર્થક હેકર્સનું એક જૂથ ગણાવે છે. જોકે, પશ્ચિમી સંશોધકો આ ગ્રુપને ઈરાની સરકારની સાયબર-ઈન્ટેલિજન્સ યુનિટ્સ દ્વારા ઉપયોગમાં લેવાતા વિવિધ નામોમાંનું એક માને છે. આ ગ્રુપે ૧૧ માર્ચે મિશિગન સ્થિત મેડિકલ ડિવાઈસ કંપની ‘સ્ટ્રાઈકર’ ને પણ હેક કરવાનો દાવો કર્યો હતો.
અમેરિકી ન્યાય વિભાગના અધિકારીએ પુષ્ટિ કરી છે કે કાશ પટેલ સાથે જોડાયેલી ઓનલાઈન પ્રકાશિત સામગ્રી અસલી જણાય છે. આ ઘટના એવા સમયે બની છે જ્યારે અમેરિકા અને ઈરાન વચ્ચે ૨૮ ફેબ્રુઆરીથી યુદ્ધ ચાલી રહ્યું છે અને તણાવ ચરમસીમાએ છે.
કોણ છે કાશ પટેલ?
ભારતીય મૂળના અમેરિકી કાશ પટેલ ડોનાલ્ડ ટ્રમ્પના અત્યંત વિશ્વાસુ સહયોગી માનવામાં આવે છે.
જન્મ: ૨૫ ફેબ્રુઆરી, ૧૯૮૦ ના રોજ ન્યૂયોર્કના ગાર્ડન સિટીમાં ગુજરાતી માતા-પિતા ને ત્યાં થયો હતો.
શિક્ષણ: યુનિવર્સિટી ઓફ રિચમંડમાંથી ગ્રેજ્યુએશન અને પેસ યુનિવર્સિટી સ્કૂલ ઓફ લોમાંથી જ્યુરિસ ડોક્ટરની પદવી મેળવી છે.
કરિયર: વકીલાતથી શરૂઆત કરી અને સરકારી વકીલ તરીકે લાંબો સમય કામ કર્યું. તેઓ રાષ્ટ્રપતિના નાયબ સહાયક અને નેશનલ સિક્યુરિટી કાઉન્સિલમાં વરિષ્ઠ નિર્દેશક જેવા હાઈ-પ્રોફાઈલ પદો પર રહી ચૂક્યા છે.
