Pak Taliban War: પાકિસ્તાનની વાયુસેનાએ ગુરુવારે સવારે અફઘાનિસ્તાનની અંદર હવાઈ હુમલા કર્યા. અફઘાન મીડિયા અનુસાર, પાકિસ્તાની દળોએ સવારે લગભગ 3 વાગ્યે કંધાર શહેરના 9મા જિલ્લામાં આવેલા રણ વિસ્તારમાં બોમ્બમારો કર્યો. અફઘાન તાલિબાનના પ્રવક્તા જબીહુલ્લાહ મુજાહિદને ટાંકીને ટોલો ન્યૂઝે જણાવ્યું કે આ હુમલામાં કોઈ જાનહાનિ થઈ નથી. આ જ સપ્તાહ દરમિયાન અફઘાનિસ્તાનની અંદર પાકિસ્તાનનો આ બીજો મોટો હવાઈ હુમલો છે. આ પહેલાં 21 સપ્ટેમ્બરે પાકિસ્તાની વાયુસેનાએ કુનાર અને પક્તિકામાં બોમ્બમારો કર્યો હતો.
અફઘાન મીડિયા આઉટલેટ ટોલો ન્યૂઝે જણાવ્યું કે હુમલા બાદ ખૂબ જ જોરદાર વિસ્ફોટનો અવાજ સંભળાયો, જે સમગ્ર કંધાર શહેરમાં સાંભળી શકાયો હતો. સુરક્ષા અધિકારીઓએ લોકોને ખાતરી આપી કે ચિંતા કરવાની કોઈ વાત નથી. એક સપ્તાહમાં પાકિસ્તાનનો આ બીજો મોટો હુમલો છે.
પાકિસ્તાને 10 સ્થળોને બનાવ્યા નિશાન
પાકિસ્તાની અધિકારીઓએ પણ આ હુમલાની પુષ્ટિ કરી છે. એસોસિએટેડ પ્રેસ અનુસાર, પાકિસ્તાને ગુરુવારે સવારે જણાવ્યું કે તેણે અફઘાનિસ્તાનમાં 10 સ્થળો પર હવાઈ હુમલા કર્યા છે. પાકિસ્તાનનું કહેવું છે કે આ સ્થળોનો ઉપયોગ એક દિવસ પહેલાં તેની વિરુદ્ધ ડ્રોન હુમલા કરવા માટે કરવામાં આવ્યો હતો. આ આરોપો અંગે તાલિબાને તાત્કાલિક કોઈ પ્રતિક્રિયા આપી નથી, પરંતુ જબીહુલ્લાહ મુજાહિદે બુધવારે આ વાતનો ઇનકાર કર્યો હતો કે અફઘાન તાલિબાન દળોએ કોઈ હુમલો કર્યો હતો.
એક સપ્તાહની અંદર બીજો હુમલો
આ પહેલાં પાકિસ્તાને સોમવારે વહેલી સવારે લગભગ 3 વાગ્યે પક્તિકા અને કુનાર પ્રાંતોમાં હવાઈ હુમલા કર્યા હતા. તાલિબાનના પ્રવક્તા જબીહુલ્લાહ મુજાહિદે આ હુમલાઓ બાદ જણાવ્યું હતું કે કુનારમાં એક મહિલા સહિત ત્રણ લોકોના મોત થયા હતા, જ્યારે ચાર લોકો ઘાયલ થયા હતા. ઘાયલોમાં બે મહિલાઓ હતી. બીજી તરફ, પક્તિકામાં એક ઘર અને દુકાન પર બોમ્બમારો કરવામાં આવ્યો હતો, પરંતુ કોઈ જાનહાનિ થઈ નહોતી.
પાકિસ્તાનનો અફઘાનિસ્તાન પર ફરી હુમલો, ડુરંડ લાઇન પર તણાવ
મુજાહિદે પાકિસ્તાનના હુમલાને આક્રમકતા ગણાવીને તેની નિંદા કરી હતી. તેમણે કહ્યું હતું કે, “પાકિસ્તાનની સેનાએ પોતાની આંતરિક સુરક્ષાની નિષ્ફળતાઓ પરથી ધ્યાન હટાવવા માટે ફરી એક વખત આવો ગુનો કર્યો છે. અફઘાન લોકો આ આક્રમકતાનો યોગ્ય જવાબ આપશે.”
પાકિસ્તાન-તાલિબાન વચ્ચે તણાવ વધ્યો
પાકિસ્તાન અને અફઘાનિસ્તાન વચ્ચેના તણાવમાં તાજી વૃદ્ધિ તુર્કી, કતાર અને સાઉદી અરેબિયાની મધ્યસ્થીના પ્રયાસો માટે જોખમ ઊભું કરી રહી છે, જેનો હેતુ કાબુલ અને ઇસ્લામાબાદ વચ્ચે કાયમી શાંતિ સ્થાપિત કરવાનો છે. પાકિસ્તાને અફઘાનિસ્તાનની તાલિબાન સરકાર પર વારંવાર આરોપ લગાવ્યો છે કે તે ઉગ્રવાદીઓને પોતાની જમીન પરથી સરહદ પારના હુમલા કરવા માટે પરવાનગી આપે છે. કાબુલના તાલિબાન શાસને આ આરોપોને નકારી કાઢ્યા છે.
