North Korea Launch 10 Ballistic Missiles: પશ્ચિમ એશિયામાં ચાલી રહેલા જંગ વચ્ચે હવે પૂર્વ એશિયામાં તણાવ વધવાના સમાચાર આવી રહ્યા છે. દક્ષિણ કોરિયાની સેનાએ જણાવ્યું કે શનિવારે ઉત્તર કોરિયાએ પૂર્વી સમુદ્ર તરફ લગભગ 10 બેલિસ્ટિક મિસાઈલો દાગી છે. આ શક્તિ પ્રદર્શન એવા સમયે કરવામાં આવ્યું છે જ્યારે અમેરિકી સેના દક્ષિણ કોરિયા સાથે સંયુક્ત સૈન્ય અભ્યાસ કરી રહી છે. જાપાને પણ ઉત્તર કોરિયા દ્વારા મિસાઈલ દાગવામાં આવી હોવાની પુષ્ટિ કરી છે અને જણાવ્યું છે કે તે તેના વિશેષ આર્થિક ક્ષેત્ર (EEZ) ની બહાર સમુદ્રમાં પડી છે.
જાપાન સાગરમાં પડી કિમ જોંગની મિસાઈલ
દક્ષિણ કોરિયાના જોઈન્ટ ચીફ ઓફ સ્ટાફ દ્વારા જણાવવામાં આવ્યું છે કે આ મિસાઈલો ઉત્તર કોરિયાની રાજધાની પ્યોંગયાંગ પાસેના એક વિસ્તારમાંથી દાગવામાં આવી હતી. જોકે, તેમણે એ નથી જણાવ્યું કે તે કેટલી દૂર સુધી ગઈ હતી. બીજી તરફ, જાપાનના સંરક્ષણ મંત્રાલયે કહ્યું કે મિસાઈલો દેશના એક્સક્લુઝિવ ઇકોનોમિક ઝોન (SEZ) ની બહાર સમુદ્રમાં પડી છે.
દક્ષિણ કોરિયાનું વધ્યું ટેન્શન
દક્ષિણ કોરિયાના જોઈન્ટ ચીફ દ્વારા કહેવામાં આવ્યું છે કે સેનાએ દેખરેખ વધારી દીધી છે અને સંભવિત વધારાના લોન્ચ સામે પોતાની તૈયારી જાળવી રાખી છે. સાથે જ અમેરિકા અને જાપાન સાથે માહિતી પણ શેર કરવામાં આવી રહી છે. આ લોન્ચ એવા સમયે થયું છે, જ્યારે ટ્રમ્પ પ્રશાસન ઈરાન સાથે મધ્ય પૂર્વમાં યુદ્ધમાં ગૂંચવાયેલું છે. આ યુદ્ધે દક્ષિણ કોરિયામાં સુરક્ષાની ચિંતા પેદા કરી દીધી છે, કારણ કે સ્થાનિક મીડિયાએ જણાવ્યું છે કે અમેરિકા દેશમાં તૈનાત પોતાની મિસાઈલ સંરક્ષણ પ્રણાલીઓને હટાવીને બીજી જગ્યાએ મોકલી રહ્યું છે.
અમેરિકાની THAAD બેટરી હટાવવાથી ખતરો
છેલ્લા દિવસોમાં સ્થાનિક મીડિયામાં એવી તસવીરો સામે આવી હતી જેમાં અમેરિકન THAAD બેટરીને હટાવવાની જાણકારી આપવામાં આવી હતી. એવું કહેવામાં આવ્યું હતું કે અમેરિકા મિસાઈલ સંરક્ષણ પ્રણાલીને ઈરાન સામેના યુદ્ધમાં મદદ માટે લઈ જઈ રહ્યું છે. આ અઠવાડિયે એસોસિએટેડ પ્રેસ (AP) એ રાષ્ટ્રપતિ લી જે મ્યુંગની ઓફિસને પૂછ્યું હતું કે શું અમેરિકી સેના સિયોંગજુમાં પોતાના THAAD સિસ્ટમમાંથી ઈન્ટરસેપ્ટર મિસાઈલો હટાવીને મિડલ ઈસ્ટ મોકલી રહી છે. આના પર રાષ્ટ્રપતિ કાર્યાલયે કહ્યું હતું કે તેઓ અમેરિકી સેનાના ઓપરેશન વિશેની માહિતીની પુષ્ટિ કરી શકતા નથી.
અમેરિકા અને દક્ષિણ કોરિયાના સૈન્ય અભ્યાસોને ઉત્તર કોરિયા પોતાના પર આક્રમણની તૈયારી ગણાવતું રહ્યું છે. આનું બહાનું બનાવીને તેણે પોતાની સૈન્ય શક્તિનું પ્રદર્શન તેજ કરી દીધું છે. છેલ્લા કેટલાક વર્ષોમાં ઉત્તર કોરિયાએ અનેકવાર મિસાઈલો અથવા તોપખાનાથી એકસાથે અનેક લોન્ચ કર્યા છે. તે આ લોન્ચને દક્ષિણ કોરિયામાં રહેલા ઠેકાણાઓ પર પરમાણુ હુમલાની મોક ડ્રીલ ગણાવે છે.
