Pakistan TTP Attack: પાકિસ્તાનના ખૈબર પખ્તૂનખ્વામાં TTPના ઉગ્રવાદીઓએ પોલીસ ટીમ પર મોટો હુમલો કર્યો છે. આ હુમલામાં એક ડેપ્યુટી SP અને એક સબ-ઇન્સ્પેક્ટર સહિત 11 પોલીસકર્મીઓનાં મોત થયાં છે, જ્યારે 12 ઘાયલ થયા છે. આ હુમલો કોહાટ જિલ્લાના ગાંબાટ વિસ્તારમાં કરવામાં આવ્યો હતો. પોલીસે જણાવ્યું કે પોલીસ ટીમ ગેરકાયદે સોનાના ખનન સામે દરોડો પાડવા જઈ રહી હતી, ત્યારે કોહાટ અને કરક વચ્ચે આવેલા દરબોકાઝ જાલંધર બાંદા વિસ્તારમાં તેમના પર હુમલો થયો હતો. પોલીસે વળતી કાર્યવાહીમાં 18 ઉગ્રવાદીઓને ઠાર મારવાનો દાવો કર્યો છે.
TTPએ હુમલાની જવાબદારી સ્વીકારી
હુમલાના કેટલાક કલાકો બાદ પાકિસ્તાની તાલિબાને નિવેદન જાહેર કરીને આ હુમલાની જવાબદારી સ્વીકારી હતી. પાકિસ્તાની તાલિબાનને તહરીક-એ-તાલિબાન પાકિસ્તાન અથવા TTPના નામથી પણ ઓળખવામાં આવે છે. પોલીસે જણાવ્યું કે આ દરમિયાન થયેલા ગોળીબારમાં 18 ખવારિજ માર્યા ગયા હતા. પાકિસ્તાન સરકાર TTP માટે ખવારિજ શબ્દનો ઉપયોગ કરે છે. પોલીસે કહ્યું કે આ હુમલો ગુનાહિત નેટવર્ક અને પાકિસ્તાની તાલિબાન વચ્ચેના સંબંધો દર્શાવે છે. એવું લાગે છે કે વિદેશી તાકાતોના ઇશારે બંનેએ હાથ મિલાવી લીધા છે.
હુમલો કેવી રીતે કરવામાં આવ્યો?
પાકિસ્તાની મીડિયા અહેવાલો અનુસાર, હુમલાખોરો પહાડીઓની ટોચ પર હાજર હતા અને ઉપરથી ગોળીબાર કરી રહ્યા હતા. રેસ્ક્યૂ 1122એ 11 પોલીસકર્મીઓનાં મોતની પુષ્ટિ કરી છે, જ્યારે અન્ય 12 ઘાયલ થયા છે. પોલીસ પ્રવક્તા મોહમ્મદ નૌમાન ઝેબે જણાવ્યું કે માર્યા ગયેલા પોલીસકર્મીઓમાં DSP હૈદર જમાન અને સબ-ઇન્સ્પેક્ટર મુખ્તિયારનો સમાવેશ થાય છે. હુમલા દરમિયાન હુમલાખોરોએ પોલીસનાં 5 વાહનોને આગ ચાંપી દીધી હતી.
પોલીસ પ્રવક્તાએ જણાવ્યું કે હુમલાખોરો અને પોલીસ ટીમ વચ્ચે ભારે ગોળીબાર થયો હતો. હુમલાની જાણ થતાં જ ઘટનાસ્થળે પોલીસનાં વધુ વાહનો અને મોટી સંખ્યામાં સુરક્ષાદળોને મોકલવામાં આવ્યાં હતાં. આસપાસના વિસ્તારમાં સુરક્ષાદળો તહેનાત કરવામાં આવ્યાં છે અને હાઈ એલર્ટ જાહેર કરવામાં આવ્યું છે. ખૈબર પખ્તૂનખ્વાના ગવર્નર ફૈસલ કરીમ કુંડીએ આ હુમલાની નિંદા કરતાં પોલીસકર્મીઓનાં મોત પર દુઃખ વ્યક્ત કર્યું છે. કુંડીએ હુમલા માટે જવાબદાર લોકોને ન્યાયના કઠેડામાં લાવવાનો નિર્દેશ આપ્યો હતો.
ગવર્નર શાસન બાદ મોટો હુમલો
આ હુમલો ખૈબર પખ્તૂનખ્વા (KP)માં કટોકટી અને ગવર્નર શાસન લાગુ થયાના એક મહિના બાદ થયો છે. રાષ્ટ્રપતિ આસિફ અલી ઝરદારીએ ખૈબર પખ્તૂનખ્વામાં PTIની ચૂંટાયેલી સરકારને સ્થગિત કરી દીધી હતી. આ નિર્ણય પાછળ KPમાં વધતા આતંકવાદ અને તેનો સામનો કરવામાં પ્રાંતીય વહીવટીતંત્રની નિષ્ફળતાને કારણ ગણાવવામાં આવ્યું હતું.
KPમાં ઉગ્રવાદી હિંસામાં વધારો
પાકિસ્તાનના ખૈબર પખ્તૂનખ્વામાં છેલ્લાં કેટલાંક વર્ષોથી ઉગ્રવાદી હિંસામાં વધારો થયો છે. આ દરમિયાન પોલીસ અને સુરક્ષાકર્મીઓને નિશાન બનાવીને કરવામાં આવતા હુમલાઓ વધ્યા છે.
આ પહેલાં 8 ઑક્ટોબરે કરક-કોહાટ સરહદ નજીક પોલીસની પેટ્રોલિંગ ટીમ પર બંદૂકધારીઓએ હુમલો કર્યો હતો. આ હુમલામાં SHO દાઉદ ખાન અને તેમના બૉડીગાર્ડ માર્યા ગયા હતા.
28 સપ્ટેમ્બરે ટેન્ક જિલ્લામાં એક હુમલામાં ત્રણ પોલીસકર્મીઓ માર્યા ગયા હતા. 25 સપ્ટેમ્બરે પેશાવરમાં એક ઑપરેશન દરમિયાન એક પોલીસકર્મીનું મોત થયું હતું.
તાજેતરના મહિનાઓમાં સૌથી ઘાતક હુમલો 18 સપ્ટેમ્બરે કોહાટ પોલીસ લાઇન્સમાં થયો હતો. આ હુમલામાં 23 લોકો માર્યા ગયા હતા, જેમાં 15 પોલીસકર્મીઓ હતા.
પાકિસ્તાન અને અફઘાનિસ્તાન વચ્ચે તણાવ
પાકિસ્તાને ઉગ્રવાદી હિંસામાં વધારા માટે તહરીક-એ-તાલિબાન પાકિસ્તાન (TTP)ને જવાબદાર ઠેરવ્યું છે. ઇસ્લામાબાદનો આરોપ છે કે TTPને અફઘાનિસ્તાનના તાલિબાન શાસનનું રક્ષણ મળે છે અને ઉગ્રવાદીઓ અફઘાન ભૂમિનો આશ્રયસ્થાન તરીકે ઉપયોગ કરી રહ્યા છે. તેના કારણે ઇસ્લામાબાદ અને કાબુલ વચ્ચે પણ તણાવ વધ્યો છે અને પાકિસ્તાની દળોએ અફઘાનિસ્તાનની અંદર હવાઈ હુમલા કર્યા છે.
તાલિબાને પણ આ હુમલાઓનો જવાબ આપ્યો છે અને સરહદ પર ઘણી વખત બંને પક્ષો વચ્ચે તીવ્ર અથડામણ થઈ ચૂકી છે. તાલિબાને પાકિસ્તાનના આરોપોને નકારી કાઢ્યા છે અને કહ્યું છે કે ઇસ્લામાબાદ પોતાની સુરક્ષાની નિષ્ફળતાઓ માટે બીજાઓને જવાબદાર ઠેરવી રહ્યું છે. કાબુલના તાલિબાન શાસને TTP દ્વારા અફઘાન ભૂમિનો ઉપયોગ કરવામાં આવતો હોવાના આરોપોનો પણ ઇનકાર કર્યો છે.

