Pakistan Water Crisis: ભારતના સિંધુ જળ સંધિને (Indus Waters Treaty) મોકૂફ રાખવાના નિર્ણય બાદ પાકિસ્તાનમાં પાણીને લઈને ચિંતા વધી ગઈ છે. પાકિસ્તાનના કેટલાય વિસ્તારો પાણીની તંગીનો સામનો કરી રહ્યા છે. પરિસ્થિતિ એટલી ખરાબ થઈ ગઈ છે કે દેશની આર્થિક રાજધાની કહેવાતા કરાચીમાં કાળઝાળ ગરમી દરમિયાન પાણીની ભારે અછત સર્જાઈ છે. આ બાબતને લઈને સિંધ પ્રાંત પર શાસન કરનારી પાકિસ્તાન પીપલ્સ પાર્ટી (PPP) રાજકીય વિરોધીઓના નિશાના પર છે.
કરાચીમાં પાણીની અછત અંગે જમાત-એ-ઇસ્લામી પાકિસ્તાનના પ્રમુખ હાફિઝ નઈમ-ઉર-રેહમાને PPP પર આકરા પ્રહારો કર્યા. તેમણે કથળતી જતી જળ કટોકટી માટે PPP ના ગેરવહીવટને જવાબદાર ઠેરવ્યો. જમાતે આરોપ લગાવ્યો કે PPP ની સરકાર વર્ષો સુધી સત્તામાં રહેવા છતાં કરાચીમાં પાણીની અછતને દૂર કરવામાં સંપૂર્ણપણે નિષ્ફળ રહી છે.
સિંધુ જળ સંધિને લઈને દબાણમાં પાકિસ્તાન
કરાચીમાં પાણીની કટોકટી એવા સમયે આવી છે, જ્યારે સિંધુ જળ સંધિ અંગે ભારતના નિર્ણયથી પાકિસ્તાન પહેલેથી જ ભારે દબાણનો સામનો કરી રહ્યું છે. ભારતે ગયા વર્ષે એપ્રિલમાં થયેલા પહલગામ આતંકવાદી હુમલા બાદ સિંધુ જળ સંધિ પર અસ્થાયી રોક (Held in Abeyance) લગાવી દીધી હતી. પાકિસ્તાને વારંવાર આરોપ લગાવ્યો છે કે ભારત નદીઓના પ્રવાહને અવરોધિત કરી રહ્યું છે, જેના કારણે જળ સંકટનો ખતરો વધી રહ્યો છે.
કરાચીમાં ઘેરાયેલું પાણીનું સંકટ
આ દરમિયાન કરાચીમાં પાણીનું સંકટ સતત ઘેરાતું જઈ રહ્યું છે. પાકિસ્તાની Media Outlet ‘ARY ન્યૂઝ’ અનુસાર, શહેરના અંદાજે ૭૦ ટકા ભાગોમાં પાણીનો પુરવઠો લાંબા સમય સુધી ખોરવાયેલો હોવાના અહેવાલ છે. કેટલાય વિસ્તારોમાં લોકો હવે પાણી માટે મોંઘા ખાનગી ટેન્કરો પર નિર્ભર છે. ગુલિસ્તાન-એ-જૌહર, ગુલશન-એ-ઇકબાલ, અઝીઝાબાદ, લિયાકતાબાદ, નાઝિમાબાદ અને ઉત્તરી કરાચીમાં બે અઠવાડિયાથી વધુ સમયથી પાણીની અછત યથાવત છે.
જમાત-એ-ઇસ્લામી પ્રમુખે જળ કટોકટી પર કહ્યું કે ઈદની રજાઓ દરમિયાન હજારો લોકો પોતાની પ્રાથમિક જરૂરિયાતો પૂરી કરવા માટે સંઘર્ષ કરી રહ્યા છે. તેમણે આના માટે સિંધની PPP સરકારને જવાબદાર ઠેરવી. તેમણે સવાલ ઉઠાવ્યો કે PPP ના ૧૮ વર્ષના શાસન છતાં કરાચીમાં પાણીની સમસ્યાનો ઉકેલ અત્યાર સુધી કેમ નથી આવી શક્યો?
