Trump Putin Diesel Deal: અમેરિકાના રાષ્ટ્રપતિ ડોનાલ્ડ ટ્રમ્પે શુક્રવારે જણાવ્યું કે રશિયાના રાષ્ટ્રપતિ વ્લાદિમીર પુતિન અમેરિકા અને વૈશ્વિક બજારમાં 3,00,000 મેટ્રિક ટન ડીઝલ સપ્લાય કરવા સંમત થયા છે. પુતિન સાથેની “અત્યંત સફળ” વાતચીત બાદ ટ્રમ્પે સોશિયલ મીડિયા પર આ જાહેરાત કરી હતી. તેમણે જણાવ્યું કે ઈરાન સાથેના તણાવ વચ્ચે વધી રહેલા ઊર્જાના ભાવ ઘટાડવામાં આ પગલાથી મદદ મળશે. પુતિન સાથેના કરારને કારણે યુક્રેનના રાષ્ટ્રપતિ વોલોદિમીર ઝેલેન્સ્કી નારાજ થયા છે. તેમણે આને યુદ્ધમાં રોકાણ ગણાવ્યું છે.
3 લાખ મેટ્રિક ટનની તાત્કાલિક સપ્લાય થશે
પુતિન સાથેની વાતચીત બાદ ટ્રમ્પે ટ્રુથ સોશિયલ પર જણાવ્યું, “રશિયા તાત્કાલિક અમેરિકન અને વૈશ્વિક બજારમાં 3,00,000 મેટ્રિક ટનથી વધુ ડીઝલ ઇંધણ સપ્લાય કરશે.” અમેરિકામાં નવેમ્બરમાં યોજાનારી ચૂંટણીઓના થોડા અઠવાડિયાં પહેલાં ટ્રમ્પે રશિયા સાથે આ કરાર કર્યો છે. આ ચૂંટણીઓમાં ટ્રમ્પની રિપબ્લિકન પાર્ટી પર હારનું જોખમ છે, કારણ કે અમેરિકાના મતદારો વધતી મોંઘવારીથી પરેશાન છે.
રશિયાને ડીઝલ સપ્લાય કરવાની મંજૂરી
ટ્રમ્પે પોતાની પોસ્ટમાં આગળ જણાવ્યું કે નવેમ્બરમાં મૉસ્કો 5,00,000 મેટ્રિક ટન વધુ ડીઝલ આપશે અને તેના તરત બાદ વધુ 10,00,000 મેટ્રિક ટન ડીઝલ સપ્લાય કરશે. અમેરિકાના નાણાં વિભાગે એપ્રિલ 2027 સુધી રશિયન ડીઝલને વૈશ્વિક બજાર સુધી પહોંચવા દેવા માટે કામચલાઉ લાઇસન્સ જારી કર્યું છે.
ટ્રમ્પના નિર્ણયથી યુક્રેનના રાષ્ટ્રપતિ ઝેલેન્સ્કી નારાજ
યુક્રેનના રાષ્ટ્રપતિ વોલોદિમીર ઝેલેન્સ્કીએ ટ્રમ્પ અને પુતિન વચ્ચે થયેલા આ તેલ કરારની ટીકા કરી છે અને તેને એવા યુદ્ધમાં રોકાણ ગણાવ્યું છે, જેને સમાપ્ત કરવું જોઈએ. તેમણે આ પગલાને “નબળું” અને “અન્યાયી” ગણાવ્યું. ઝેલેન્સ્કીએ કહ્યું કે આ નિર્ણય યુક્રેન અને અન્ય ભાગીદારો સાથે અન્યાય કરે છે, કારણ કે પેટ્રોલિયમ ઉત્પાદનો વેચવાની મંજૂરી મળવાથી મૉસ્કોને યુક્રેન સામેનું યુદ્ધ ચાલુ રાખવા માટે વધારાનાં નાણાં મળશે.
ઈરાન-અમેરિકા યુદ્ધ: ટ્રમ્પે ઈરાન પર હુમલાનો આદેશ આપ્યો? ઇઝરાયલ પણ જોડાશે?
ઝેલેન્સ્કીએ X પર લખ્યું કે પુતિનને ભેટ આપવાથી સભ્ય દુનિયામાં ન તો શાંતિ આવશે કે ન તો કોઈ લાભ થશે. બાદમાં પત્રકારો સાથે વૉટ્સએપ પર વાત કરતાં તેમણે કહ્યું, “મને લાગે છે કે અમારી ટીમનો ઉપયોગ માત્ર દેખાડા માટે કરવામાં આવી રહ્યો છે અને આ બિલકુલ યોગ્ય નથી. ભાગીદારોએ પણ એકબીજા સાથે આવો વ્યવહાર ન કરવો જોઈએ.” ઝેલેન્સ્કીએ આ કરારને મજબૂત ભાગીદારો દ્વારા લેવામાં આવેલો નબળો નિર્ણય ગણાવ્યો.
