Ukraine Russia War: યુક્રેન સામે ચાલી રહેલા યુદ્ધમાં રશિયાને મોટો ફટકો પડ્યો છે. યુક્રેને રશિયાની સંરક્ષણ શક્તિને મોટું નુકસાન પહોંચાડ્યું છે. યુક્રેનની સેનાએ ચોક્કસ અને ખતરનાક ડ્રોન હુમલામાં રશિયાની અત્યંત આધુનિક અને મોંઘી S-400 એર ડિફેન્સ સિસ્ટમના રડારને નષ્ટ કરી દીધો છે. આ ઝડપી હુમલાથી રશિયન સેનાની હવાઈ સુરક્ષાને મોટો ફટકો પડ્યો છે. આ રડારની કિંમત 50 મિલિયન ડૉલર એટલે કે આશરે ₹415 કરોડ હોવાનું જણાવવામાં આવે છે. 96L6 રડાર હવાઈ જોખમો, મિસાઇલો અને ડ્રોનની ઓળખ કરીને S-400 અને S-300 સિસ્ટમને લક્ષ્યનું ચોક્કસ સ્થાન આપતો હતો. આ ફૂટેજ થોડા દિવસ પહેલાંની છે.
શું છે સમગ્ર મામલો?
યુક્રેનની સેનાએ રશિયા સામે વધુ એક સફળ ઑપરેશન હાથ ધરતાં તેના 96L6 રડાર સ્ટેશનને નિશાન બનાવ્યું. આ રડાર રશિયાની સૌથી શક્તિશાળી અને અચૂક માનવામાં આવતી S-400 ટ્રાયમ્ફ એર ડિફેન્સ સિસ્ટમનો મહત્ત્વનો ભાગ છે. આંતરરાષ્ટ્રીય બજારમાં આ અદ્યતન રડારની કિંમત આશરે 50 મિલિયન ડૉલર એટલે કે લગભગ ₹415 કરોડ આંકવામાં આવી છે.
યુક્રેનની બ્લૅક ફૉરેસ્ટ એટલે કે 15મી અલગ આર્ટિલરી રેકોનિસન્સ બ્રિગેડે આ ઑપરેશનનાં રોમાંચક ફૂટેજ પણ જાહેર કર્યાં છે. તેના વીડિયોમાં સ્પષ્ટપણે જોઈ શકાય છે કે કેવી રીતે યુક્રેનનાં ડ્રોન ભાગી રહેલા અથવા તહેનાત થવાની તૈયારી કરી રહેલા રશિયન રડારનો પીછો કરે છે અને તેના પર ચોક્કસ હુમલો કરે છે.
આ 96L6 રડાર શા માટે મહત્ત્વનો છે?
સંરક્ષણ નિષ્ણાતોના જણાવ્યા અનુસાર, રડાર કોઈ પણ એર ડિફેન્સ સિસ્ટમની આંખો હોય છે. જો તેની આંખો જ નષ્ટ કરી દેવામાં આવે, તો મિસાઇલ સિસ્ટમ અંધ વ્યક્તિ જેવી બની જાય છે. આ રડાર 300 કિલોમીટરના વિસ્તારમાં આકાશમાં ઊડતાં જોખમો, જેમ કે ફાઇટર જેટ, ક્રૂઝ મિસાઇલ, બૅલિસ્ટિક મિસાઇલ અને માનવરહિત ડ્રોનને દૂરથી જ ઓળખી શકે છે.
આ રડાર એકસાથે 100 લક્ષ્યોને ટ્રૅક કરવાની ક્ષમતા ધરાવે છે. તે કમાન્ડ સેન્ટરની સાથે મિસાઇલ લૉન્ચરને પણ લક્ષ્યનું વાસ્તવિક સમયનું સ્થાન મોકલે છે. આ રડાર નષ્ટ થવાથી S-300 અને S-400 સિસ્ટમની હુમલો કરવાની ક્ષમતા પર સીધી અસર પડી છે, કારણ કે હવે રશિયન એકમો માટે આવતાં જોખમોને ઓળખવા અને તેમની વચ્ચે સંકલન સાધવું અત્યંત મુશ્કેલ બની ગયું છે.
રશિયાને એક પછી એક ફટકા
આ હુમલો એવા સમયે થયો છે, જ્યારે રશિયા પહેલેથી જ યુદ્ધના મેદાનમાં ભારે માનહાનિ અને સૈન્ય સાધનોના નુકસાનનો સામનો કરી રહ્યું છે. યુક્રેન સતત રશિયાની ઊંડા સ્તરની સંરક્ષણ વ્યવસ્થા અને એર ડિફેન્સ સ્તરોને નિશાન બનાવી રહ્યું છે.
હવે જાણકારોનું માનવું છે કે આવા હુમલાઓથી રશિયાની ડિફેન્સ સિસ્ટમની નબળાઈઓ સામે આવી રહી છે, જેના કારણે પુતિનની સેના માટે આકાશને સુરક્ષિત રાખવું વધુ પડકારજનક બની રહ્યું છે.
