US 800 Million Dollar Damage: ઈરાન સાથે મિડલ ઈસ્ટમાં ટકરાવ અમેરિકા માટે ખૂબ મોંઘો સાબિત થઈ રહ્યો છે. એક નવા વિશ્લેષણથી જાણવા મળ્યું છે કે યુદ્ધના પહેલા બે અઠવાડિયામાં મિડલ ઈસ્ટમાં અમેરિકી સૈન્ય મથકો પર ઈરાનના હુમલાથી લગભગ 800 મિલિયન ડોલર એટલે કે અંદાજે ₹7523.88 કરોડનું નુકસાન થયું છે. વિશ્લેષણમાં જણાવવામાં આવ્યું છે કે આ નુકસાનનો મોટો હિસ્સો અમેરિકા અને ઈઝરાયેલ દ્વારા યુદ્ધ શરૂ કર્યા બાદ ઈરાનના શરૂઆતી જવાબી હુમલાને કારણે થયો છે.
અમેરિકાને ભારે પડી રહ્યું છે યુદ્ધ
સેન્ટર ફોર સ્ટ્રેટેજિક એન્ડ ઇન્ટરનેશનલ સ્ટડીઝ (CSIS) ના રિપોર્ટ અને વિશ્લેષણ મુજબ, 800 મિલિયન ડોલરનો આ આંકડો અમેરિકાને થઈ રહેલા ભારે નુકસાનનું ચિત્ર રજૂ કરે છે, ખાસ કરીને જ્યારે યુદ્ધનો વ્યાપ સતત વધી રહ્યો છે. શનિવારે માહિતી સામે આવી કે ઈરાને બે બેલિસ્ટિક મિસાઈલોથી હિંદ મહાસાગરમાં અમેરિકી બેઝ ડિએગો ગાર્સિયા પર હુમલો કર્યો. જોકે, મિસાઈલો બેઝ સુધી પહોંચવામાં નિષ્ફળ રહી હતી, પરંતુ હિંદ મહાસાગર સુધીના હુમલાએ યુદ્ધના વિસ્તરણને લઈને ચિંતા વધારી દીધી છે.
CSIS ના વરિષ્ઠ સલાહકાર માર્ક કેન્સિયને જણાવ્યું કે, આ વિસ્તારમાં અમેરિકાના ઠેકાણાઓને થયેલા નુકસાન વિશે ઓછું જણાવવામાં આવ્યું છે. જોકે આ નુકસાન ઘણું વધારે લાગે છે, પરંતુ જ્યાં સુધી વધુ માહિતી ન મળે ત્યાં સુધી પૂરા નુકસાનનો અંદાજ લગાવી શકાય તેમ નથી.
અમેરિકી રક્ષા વિભાગના અધિકારીઓએ આ નુકસાન અંગે ટિપ્પણી કરવાનો ઇનકાર કર્યો છે. જોકે, અહેવાલો સૂચવે છે કે ઈરાને જવાબી હુમલામાં જોર્ડન, સંયુક્ત આરબ અમીરાત (UAE), સાઉદી અરેબિયા અને મધ્ય પૂર્વના અન્ય દેશોમાં અમેરિકાના એર-ડિફેન્સ, સેટેલાઇટ-કોમ્યુનિકેશન સિસ્ટમ અને એરક્રાફ્ટ સહિતની સૈન્ય સંપત્તિઓને નિશાન બનાવી છે.
THAAD ડિફેન્સ સિસ્ટમનું રડાર બરબાદ
અમેરિકાને સૌથી મોટું નુકસાન જોર્ડનના હવાઈ મથક પર થયું છે, જ્યાં ઈરાને THAAD મિસાઈલ ડિફેન્સ સિસ્ટમ ના રડારને નિશાન બનાવ્યું હતું. અમેરિકાના બજેટ દસ્તાવેજો મુજબ, AN/TPY-2 રડાર સિસ્ટમ ની કિંમત એકલી અંદાજે 485 મિલિયન ડોલર છે. આ સિસ્ટમનો ઉપયોગ બેલિસ્ટિક મિસાઈલોને લાંબા અંતરથી રોકવા માટે કરવામાં આવે છે.
ઈન્ફ્રાસ્ટ્રક્ચર પર 310 મિલિયન ડોલરનું નુકસાન
આકલન મુજબ, ઈરાની હુમલાથી આ વિસ્તારમાં અમેરિકાના ઠેકાણાઓ અને ઈમારતો જેવી સુવિધાઓને અંદાજે 310 મિલિયન ડોલરનું વધારાનું નુકસાન થયું છે. સેટેલાઇટ તસવીરો દર્શાવે છે કે ઈરાને ઓછામાં ઓછા ત્રણ હવાઈ મથકો પર એકથી વધુ વખત હુમલો કર્યો છે. આ ત્રણ ઠેકાણા કુવૈતમાં અલી અલ-સલીમ, કતારમાં અલ-ઉદીદ અને સાઉદી અરેબિયામાં પ્રિન્સ સુલતાન બેઝ છે.
ઈરાનને રશિયાની મદદ
અમેરિકી મીડિયા રિપોર્ટ મુજબ, સાઉદી અરેબિયાના પ્રિન્સ સુલતાન એરબેઝ પર થયેલા હુમલામાં અમેરિકાના પાંચ FC-135 એર ફ્યુઅલ ટેન્કરને નુકસાન પહોંચ્યું છે. રિપોર્ટ જણાવે છે કે રશિયાએ આ વિસ્તારમાં હાજર અમેરિકી સૈન્ય દળોના ઠેકાણાઓ વિશે તેહરાન સાથે ગુપ્ત માહિતી શેર કરી છે. બીજી બાજુ, ઈરાન પર હુમલો શરૂ કર્યા પછી અત્યાર સુધીમાં અમેરિકાના 13 સૈનિકો માર્યા ગયા છે.
