Muscle Building Research: ઉભરેલી ચેસ્ટ, ફૂલેલા બાઈસેપ્સ, વી-શેપ બેક અને પહોળા ખભા, એક સામાન્ય માણસની વિશ-લિસ્ટમાં આ બધું સામેલ હોય છે. આજકાલ મહિલાઓ પણ મસ્ક્યુલર બોડીની ઈચ્છા રાખવા લાગી છે. પરંતુ અડધા લોકોની આ ઈચ્છા જીમનું નામ સાંભળતા જ અને ત્યાં ભારે-ભરખમ ડંબેલ, બારબેલ, કેટલબેલ ઉઠાવવાના નામથી જ ખતમ થઈ જાય છે. તે પણ ત્યારે, જ્યારે ૨૦૧૬માં જ મેકમાસ્ટર યુનિવર્સિટીના રિસર્ચર્સ દ્વારા મસ્ક્યુલર બોડી માટે ભારે-ભરખમ વેઈટ લિફ્ટિંગની જગ્યાએ સરળ રીત બતાવી દેવામાં આવી હતી.
આ રીત પહેલા કરતા વધુ સરળ છે અને ‘નો પેઈન નો ગેઈન’ વાળા આઈડિયાથી પણ બચાવે છે. પરંતુ વાત એ છે કે આખરે લોકો મેકમાસ્ટર યુનિવર્સિટીના રિસર્ચર્સની આ વાતને ક્યારે માનશે. ધ્યાન રાખો કે ક્ષમતા કરતા વધુ વજન ઉઠાવવાથી શરીરને ઈજા થવાનું જોખમ પણ રહેલું છે.
દાયકાઓ જૂની પદ્ધતિથી અલગ રસ્તો
શરીરને તગડું બનાવવા માટે તમામ લોકો એક બેઝિક આઈડિયા પાછળ ભાગી રહ્યા છે. જીમ ટ્રેનરથી લઈને જીમ કરનારાઓ સુધી દરેક વ્યક્તિ દરરોજ પહેલા કરતા વધુ ભારે વજન ઉઠાવવાનો પ્રયત્ન કરે છે. પરંતુ મેકમાસ્ટર યુનિવર્સિટીનું આ રિસર્ચ દાયકાઓ જૂના આ આઈડિયાથી અલગ છે.
શું છે સરળ રીત?
રિસર્ચ મુજબ, તમને હળવું વજન ઉઠાવવાથી પણ ભારે વજન ઉઠાવવા જેટલો જ ફાયદો મળે છે. તમે જીમમાં તમારી પૂરી તાકાતના અડધા જેટલું વજન ઉઠાવીને પણ મસ્ક્યુલર બોડી મેળવી શકો છો. મતલબ સાફ છે કે ભારે અને ઉભરેલી ચેસ્ટ માટે હવે તમારે ૫૦-૫૦ કિલોની વેઈટેડ બારબેલ ઉઠાવવાની જરૂર નથી. આ કામ ૧૦ કિલોની વેઈટેડ બારબેલથી પણ થઈ શકે છે.
હળવું વજન ઉઠાવવાથી મસલ્સ બિલ્ડિંગ?
આ સ્ટડીના સીનિયર ઓથર અને ડિપાર્ટમેન્ટ ઓફ કાઈન્સિયોલોજીના પ્રોફેસર સ્ટુઅર્ટ ફિલિપ્સે જણાવ્યું હતું કે અહીં મસલ્સ ફટીગનો નિયમ લાગુ પડે છે. એટલે કે તમારે વજન ત્યાં સુધી ઉઠાવવાનું છે, જ્યાં સુધી સ્નાયુઓ જવાબ ન આપી દે. જ્યારે તમે છેલ્લા ૨-૩ રેપ્સ જબરદસ્તી લગાવો છો ત્યારે મસલ્સ ફાઈબર એવી જ રીતે તૂટે છે, જેમ ભારે વજનના રેપ્સ લગાવ્યા પછી થાય છે.
બે ગ્રુપ પર થયું સંશોધન
રિસર્ચર્સે અનુભવી વેઈટ લિફ્ટર્સ પુરુષોના બે ગ્રુપ પર અભ્યાસ કર્યો. એક ગ્રુપે હળવું વેઈટ (પોતાની પૂરી તાકાતના ૫૦ ટકા સુધી) ઉઠાવીને ૨૦ થી ૨૫ રેપ્સના સેટ લગાવ્યા. બીજા ગ્રુપે ભારે વેઈટ (પોતાની પૂરી તાકાતના ૯૦ ટકા સુધી) ઉઠાવીને ૮ થી ૧૨ રેપ્સના સેટ લગાવ્યા. બંનેએ ફેલિયરના પોઈન્ટ સુધી એક્સરસાઈઝ કરી. પરિણામમાં બંનેના મસલ્સ માસ અને મસલ્સ ફાઈબરમાં સમાન વધારો જોવા મળ્યો હતો.
