Rail Madad App: ટ્રેનથી મુસાફરી કરતી વખતે ક્યારેક અચાનક અનેક પ્રકારની સમસ્યાઓ આવી જાય છે. ક્યારેક તમારા કોચનું AC યોગ્ય રીતે ચાલતું હોતું નથી તો ઘણી વખત ખૂબ ગંદકી હોય છે. આ ઉપરાંત, ટ્રેન મુસાફરી દરમિયાન સુરક્ષા સાથે જોડાયેલી સમસ્યાઓનો સામનો પણ કરવો પડે છે. આવી સ્થિતિમાં લોકો શક્ય તેટલી ઝડપથી મદદ મેળવવા માગે છે. પરંતુ ફરિયાદ વગેરે કરવામાં ઘણો સમય પસાર થઈ જાય છે અને મુસાફરોની વાત સાંભળવા માટે કોઈ હાજર હોતું નથી. પરંતુ તમે તમારી સીટ પરથી ઊભા થયા વિના ફોનથી જ મુસાફરી દરમિયાન આવતી આવી સમસ્યાઓ માટે મદદ મેળવી શકો છો. તમે Rail Madad એપ અને પોર્ટલનો ઉપયોગ કરી શકો છો. માત્ર થોડા જ ટૅપ કરીને મુસાફરો ફરિયાદો નોંધાવી શકે છે, PNR અથવા ફોટો જેવી જરૂરી માહિતી અપલોડ કરી શકે છે અને ઑનલાઇન પોતાની ફરિયાદ પર થઈ રહેલી કાર્યવાહી પણ ટ્રૅક કરી શકે છે. આવો, જાણીએ કેવી રીતે.
Rail Madad એપ શું છે?
ભારતીય રેલવેની ઑફિશિયલ એપ Rail Madad Google Play Store અને Apple App Store પર ડાઉનલોડ કરવા માટે ઉપલબ્ધ છે. આ એપ માત્ર મુસાફરોને ફરિયાદ કરવાની સુવિધા જ આપતી નથી, પરંતુ ભારતીય રેલવેને વધુ ઝડપથી કાર્યવાહી કરવામાં પણ મદદ કરે છે, જેના કારણે મુસાફરી સરળ બને છે. સુરક્ષા અથવા મેડિકલ સાથે જોડાયેલી જરૂરી સમસ્યાઓ માટે મુસાફરોએ હજુ પણ હેલ્પલાઇન નંબર 139નો જ ઉપયોગ કરવો જોઈએ, પરંતુ સામાન્ય ફરિયાદો માટે Rail Madad સૌથી ઝડપી અને શ્રેષ્ઠ રીત છે.
આ ફરિયાદો કરી શકો છો
આ એપ દ્વારા ખરાબ કોચ, ટ્રેનમાં વિલંબ અથવા સુરક્ષા સાથે જોડાયેલી સમસ્યાઓની ફરિયાદ કરી શકો છો. મુસાફરો ઘણી વખત યોગ્ય અધિકારી સુધી પહોંચવાનો પ્રયાસ કરવામાં પોતાનો ઘણો સમય બરબાદ કરી દે છે. Rail Madad એપ આ પ્રક્રિયાને સરળ બનાવે છે અને ફરિયાદ નોંધાવવા તથા તેને ટ્રૅક કરવા માટે સીધી અને ડિજિટલ રીત આપે છે. મુસાફરોની ફરિયાદોને એક જ જગ્યાએ લાવીને, આ એપ ઝડપથી ઉકેલ લાવવામાં મદદ કરે છે.
કેવી રીતે ઉપયોગ કરવો?
- Android યુઝર Google Play Store પરથી અને iPhone ચલાવતા યુઝર Apple App Store પરથી એપ ડાઉનલોડ કરી શકે છે. અથવા પોર્ટલ પર પણ જઈ શકે છે.
- એપ ઓપન કર્યા પછી ફરિયાદનો પ્રકાર એટલે કે કયા પ્રકારની ફરિયાદ કરવી છે, તે પસંદ કરો.
- તમને ત્યાં અનેક ઑપ્શન જેમ કે કોચની સમસ્યાઓ, વિલંબ, સુરક્ષા સંબંધિત ચિંતાઓ અથવા સૂચનો મળશે.
- ત્યારબાદ તમારી મુસાફરીની માહિતી જેવી કે તમારો PNR નંબર, ટ્રેન નંબર અથવા સ્ટેશનની માહિતી દાખલ કરો.
- ત્યારબાદ તમારી ફરિયાદના આધારે ફોટો અપલોડ કરો. તેનાથી રેલવે કર્મચારીઓને સમસ્યાઓ સમજવામાં અને તેની પુષ્ટિ કરવામાં મદદ મળશે.
- ફરિયાદ નોંધાવ્યા બાદ તમે ઑનલાઇન ફરિયાદને ટ્રૅક પણ કરી શકો છો. તમને તમારી ફરિયાદની ID મળી જશે.
