Running Club Business Success: સામાન્ય રીતે લોકો મિત્રો સાથે મળવા અને ફિટ રહેવા માટે રનિંગ ક્લબમાં જોડાય છે. પરંતુ શું તમે વિચાર્યું છે કે મફત ક્લબ પણ કરોડો રૂપિયાનો બિઝનેસ બની શકે છે? અમેરિકાના ન્યૂયોર્કમાં રહેતા ઓવેન અખિબીએ આવું જ કરી બતાવ્યું છે. તેમણે નોકરીની સાથે એક રનિંગ ક્લબ શરૂ કરી, જ્યાં લોકો મફતમાં દોડે છે. આ ક્લબ દ્વારા તેમણે વર્ષ 2025માં આશરે 6 કરોડ રૂપિયાની આવક મેળવી.
અહેવાલ અનુસાર, અખિબીએ જુલાઈ 2024માં Peak and Pace નામથી આ સમુદાયની શરૂઆત કરી હતી. તે સમયે તેઓ જે.પી. મોર્ગનમાં અલ્ગોરિધમિક ટ્રેડિંગ સેલ્સના ક્ષેત્રમાં કામ કરતા હતા. લંડનથી ન્યૂયોર્ક આવ્યા બાદ તેઓ નવા મિત્રો બનાવવા માગતા હતા. આ જ વિચારથી તેમને રનિંગ ક્લબ શરૂ કરવાનો વિચાર આવ્યો.
તક બિઝનેસમાં બદલાઈ ગઈ
શરૂઆતમાં અખિબીનો હેતુ લોકોને દોડવાના બહાને એકબીજા સાથે જોડાવાની તક આપવાનો હતો. પરંતુ ધીમે ધીમે આ પહેલ એક મોટા સામાજિક ફિટનેસ બિઝનેસમાં બદલાઈ ગઈ. વર્ષ 2025માં ક્લબના વિવિધ કાર્યક્રમોમાં આશરે 30,000 લોકોએ ભાગ લીધો.
વિચાર કેવી રીતે આવ્યો?
ઓવેન અખિબીએ પોતાની ક્લબમાં દોડવા માટે લોકો પાસેથી કોઈ ફી લીધી નહોતી. તેમને સમજાયું કે લોકોને એકસાથે જોડ્યા બાદ તેમના માટે બીજા સામાજિક કાર્યક્રમો પણ યોજી શકાય છે, જેમાં ભાગ લેવા માટે લોકો પૈસા ચૂકવવા તૈયાર થશે. આ જ વિચાર સાથે તેમણે રનિંગ ક્લબ ઉપરાંત પાર્ટીઓ, કોમેડી નાઇટ્સ અને બીજી પ્રવૃત્તિઓ યોજવાનું શરૂ કર્યું.
પીક એન્ડ પેસના રનિંગ સેશન આજે પણ મફત છે, પરંતુ તેના પેઇડ કાર્યક્રમોમાં ભાગ લેવા માટે લોકોએ ટિકિટ ખરીદવી પડે છે. આ કાર્યક્રમોની ટિકિટની કિંમત 15થી 25 ડૉલર (1,434થી 2,391 રૂપિયા) વચ્ચે હોય છે. આ બિઝનેસ મોડલનો ફાયદો એ થયો કે લોકોને ક્લબની મુખ્ય પ્રવૃત્તિ એટલે કે દોડવા માટે પૈસા ચૂકવવા પડતા નથી, જ્યારે કાર્યક્રમો દ્વારા કમાણીનો માર્ગ ખુલ્લો થઈ ગયો.
ક્લબમાં 150 લોકો જોડાયા
પીક એન્ડ પેસની લોકપ્રિયતા ધીમે ધીમે વધવા લાગી. અહેવાલો અનુસાર, ક્લબના પાંચમા રનિંગ સેશન સુધીમાં આશરે 150 લોકો તેમાં જોડાવા પહોંચી ગયા હતા. સોશિયલ મીડિયાએ પણ ક્લબની પ્રવૃત્તિઓને વધુ લોકો સુધી પહોંચાડવામાં મહત્ત્વની ભૂમિકા ભજવી.
ત્યારબાદ અખિબીએ મેનહટનના એક બારમાં પાર્ટી યોજી, જેની ટિકિટની કિંમત 20 ડૉલર રાખવામાં આવી હતી. આ પ્રયોગથી તેમને સમજાયું કે રનિંગ ક્લબ સાથે જોડાયેલો સમુદાય બીજા કાર્યક્રમોમાં પણ રસ ધરાવે છે. ત્યારબાદ તેમણે ક્લબની પ્રવૃત્તિઓનો વ્યાપ વધાર્યો. પાર્ટીઓ ઉપરાંત લોકો માટે હાઇકિંગ ટ્રિપ અને ન્યૂયોર્કની બહાર સ્કીઇંગ ટ્રિપ જેવા કાર્યક્રમો પણ યોજાવા લાગ્યા. આ રીતે મફત રનિંગ ક્લબ લોકોનો સંપર્ક વધારવાનું માધ્યમ બની, જ્યારે પેઇડ કાર્યક્રમો કમાણીનું સાધન બન્યા.
6 કરોડ રૂપિયાની આવક
પીક એન્ડ પેસે વર્ષ 2025માં 6.40 લાખ ડૉલર એટલે કે આશરે 6 કરોડ રૂપિયાની આવક મેળવી. તેની લગભગ સંપૂર્ણ કમાણી ટિકિટવાળા કાર્યક્રમોમાંથી થઈ. જોકે, આવકનો અર્થ સંપૂર્ણ નફો થતો નથી. કાર્યક્રમો યોજવામાં પણ ખર્ચ થાય છે. અખિબીના જણાવ્યા અનુસાર, કેટલીક પાર્ટીઓમાં નુકસાન પણ થાય છે, પરંતુ સમગ્ર બિઝનેસનો પ્રોફિટ માર્જિન આશરે 15% છે.
આ ગણતરી પ્રમાણે, 6.40 લાખ ડૉલરની આવક પર 15% માર્જિન ગણીએ તો નફો આશરે 96,000 ડૉલર એટલે કે લગભગ 92 લાખ રૂપિયા થાય છે. આ અંદાજિત રકમ છે, કંપની દ્વારા અલગથી જાહેર કરવામાં આવેલો વાસ્તવિક નફાનો આંકડો નથી.
દરરોજ 18 કલાક સુધી કામ કર્યું
નોકરીની સાથે બિઝનેસ ચલાવવો અખિબી માટે સરળ નહોતો. ફાઇનાન્સ ક્ષેત્રમાં પોતાની જવાબદારીઓ નિભાવવાની સાથે તેઓ રનિંગ ક્લબના કાર્યક્રમોનું આયોજન કરતા અને તેનું સંચાલન પણ કરતા હતા. તેમણે જણાવ્યું કે ધીમે ધીમે ક્લબ ચલાવવાનું કામ બીજી ફુલ-ટાઇમ નોકરી જેવું બની ગયું હતું. લગભગ એક વર્ષ સુધી તેમણે દરરોજ 18 કલાક સુધી કામ કર્યું.
હવે 9 લોકોની ટીમ સંભાળે છે કામ
પીક એન્ડ પેસનો વિસ્તાર એટલો વધી ગયો છે કે હવે તેના કાર્યક્રમોનું સંચાલન કરવા માટે 9 કોન્ટ્રાક્ટરની ટીમ છે. અખિબીની દરરોજ હાજરી વિના પણ આ ટીમ મોટાભાગના કાર્યક્રમો સંભાળી લે છે. અખિબી દર મહિને ન્યૂયોર્ક જઈને ક્લબની પ્રવૃત્તિઓની સમીક્ષા કરે છે. તેઓ એક હેડ ઑફ ઑપરેશન્સની નિમણૂક કરવાની યોજના પણ બનાવી રહ્યા છે, જેથી રોજિંદા કામની જવાબદારી અન્ય વ્યક્તિને સોંપી શકાય.
