Agniveer Scheme Extension: ભારતીય સેનાના ઇતિહાસમાં અત્યાર સુધીના સૌથી મોટા ફેરફારવાળી અગ્નિવીર યોજનામાં ફેરફાર થઈ શકે છે. સૂત્રોના જણાવ્યા અનુસાર, અગ્નિવીરોને બે વર્ષનું એક્સટેન્શન આપવાની તૈયારી કરવામાં આવી રહી છે. અગ્નિવીરોની પ્રથમ બેચ 21 નવેમ્બરે સેવા પૂર્ણ કરી રહી છે. એક્સટેન્શન યોજનાની જાહેરાત 21 નવેમ્બર પહેલાં થવાની શક્યતા છે.
ભારતીય સેનામાં ભરતીની નવી યોજના અગ્નિવીર વર્ષ 2022માં અમલમાં મૂકવામાં આવી હતી. આ અંતર્ગત આર્મી, નેવી અને એરફોર્સમાં અગ્નિવીરોની ભરતી શરૂ કરવામાં આવી હતી, જે ચાર વર્ષ માટે હોય છે. ચાર વર્ષ પૂર્ણ થવા પર 25% અગ્નિવીરો સેનામાં કાયમી થઈને સૈનિક બનશે. બાકીના 75%માંથી કેટલાકને એક્સટેન્શન આપવાની તૈયારી છે. કઈ સર્વિસમાં કેટલા અગ્નિવીરોને એક્સટેન્શન મળશે તેની પુષ્ટિ થઈ શકી નથી.
એક્સટેન્શન બાદ ત્રણ પ્રકારના સૈનિકો હશે
સૂત્રોના જણાવ્યા અનુસાર, એક્સટેન્શન આપ્યા બાદ સેનામાં ત્રણ પ્રકારના સૈનિકો હશે. અગ્નિવીર, એક્સટેન્શન ધરાવતા અગ્નિવીર અને કાયમી સૈનિકો. ભારતીય નેવીના અગ્નિવીરોની પ્રથમ બેચના ચાર વર્ષ 21 નવેમ્બરે, ભારતીય આર્મીના અગ્નિવીરોના 31 ડિસેમ્બરે અને એરફોર્સના અગ્નિવીરોની પ્રથમ બેચના ચાર વર્ષ 21 ડિસેમ્બરે પૂર્ણ થઈ રહ્યા છે.
હાલમાં અગ્નિવીર યોજનામાં શું વ્યવસ્થા છે?
– કેન્દ્ર સરકારે અગ્નિવીર યોજનાની શરૂઆત 14 જૂન 2022ના રોજ કરી હતી. આ યોજના હેઠળ થલસેના, નેવી અને એરફોર્સમાં અગ્નિવીરોની ભરતી કરવામાં આવે છે. અગ્નિવીરોનો સેવા સમયગાળો ચાર વર્ષનો હોય છે, જેમાં તાલીમનો સમયગાળો પણ સામેલ છે.
– ચાર વર્ષ પૂર્ણ થયા બાદ કામગીરી, લાયકાત અને સેનાની જરૂરિયાતોના આધારે વધુમાં વધુ 25% અગ્નિવીરોને નિયમિત કેડરમાં સામેલ કરી શકાય છે. બાકીના 75% અગ્નિવીરોને સેવામુક્ત કરવામાં આવે છે. જોકે, કેન્દ્ર સરકાર સેવામુક્ત થનારા આ અગ્નિવીર સૈનિકો માટે રાજ્ય સરકારમાં નોકરી અપાવવા કામ કરી રહી છે.
સેવા પૂર્ણ થવા પર આ અગ્નિવીરોને સેવા નિધિ પેકેજ તરીકે આશરે 11.71 લાખ રૂપિયા (વ્યાજ સહિત) એકસાથે આપવામાં આવે છે. તેમાં અગ્નિવીરના પગારમાંથી જમા થતું યોગદાન અને સરકાર તરફથી એટલું જ યોગદાન સામેલ હોય છે. આ ઉપરાંત તેમને સ્કિલ સર્ટિફિકેટ આપવામાં આવે છે, જે આગળ રોજગાર મેળવવામાં મદદરૂપ થાય છે. ચાર વર્ષની સેવા દરમિયાન તેમને 48 લાખ રૂપિયાનું જીવન વીમા કવચ પણ મળે છે. જોકે, સેવામુક્ત થનારા અગ્નિવીરોને નિયમિત પેન્શન અને ગ્રેચ્યુઇટીનો લાભ મળતો નથી.
