Zimbabwe Test Record: અફઘાનિસ્તાન અને ઝિમ્બાબ્વે વચ્ચે શારજાહ ક્રિકેટ સ્ટેડિયમમાં રમાયેલી ટેસ્ટ શ્રેણીની પ્રથમ મેચ ડ્રો રહી હતી. આ ઊંચા સ્કોરવાળી મેચની ત્રણ ઇનિંગ્સમાં કુલ 1,541 રન બન્યા હતા. મેચના અંતિમ દિવસે 41 વર્ષીય ક્રેગ ઇર્વિને અણનમ બેવડી સદી ફટકારી હતી.
શારજાહમાં ટોસ જીતીને પ્રથમ બેટિંગ કરવા ઉતરેલી ઝિમ્બાબ્વેની ટીમે પ્રથમ દાવમાં 504 રન બનાવ્યા હતા. બીજા દાવમાં ટીમે 5 વિકેટે 523 રન બનાવ્યા હતા. ટેસ્ટ ક્રિકેટમાં બંને દાવમાં 500 કે તેથી વધુ રન બનાવનારી ઝિમ્બાબ્વે પ્રથમ ટીમ બની ગઈ છે.
પ્રથમ દાવમાં બ્રેન્ડન ટેલરની સદી
પ્રથમ દાવમાં બેન કરને (42) ઇનોસન્ટ કાયિયા (34) સાથે પ્રથમ વિકેટ માટે 60 રન અને બ્રેન્ડન ટેલર સાથે બીજી વિકેટ માટે 65 રન ઉમેર્યા હતા. ત્યારબાદ કેપ્ટન બ્રાયન બેનેટે મોરચો સંભાળ્યો હતો. તેમણે બ્રેન્ડન ટેલર સાથે ત્રીજી વિકેટ માટે 137 રનની ભાગીદારી કરી હતી.
ત્યારબાદ વેસ્લી મધેવેરે (54) સાથે છઠ્ઠી વિકેટ માટે 96 રન જોડીને ટીમને મોટા સ્કોર સુધી પહોંચાડી હતી. આ દાવમાં ટેલરે 18 બાઉન્ડરીની મદદથી 131 રન બનાવ્યા હતા, જ્યારે બેનેટે 128 રનની ઇનિંગ્સ રમી હતી. અફઘાનિસ્તાન તરફથી મોહમ્મદ સલીમ અને કૈસ અહમદે 3-3 વિકેટ મેળવી હતી.
RESULT | MATCH DRAWN! 🚨
After five days of highly competitive cricket, the first Test match between Afghanistan and Zimbabwe ends in a draw. 🤝
#AfghanAtalan | #AFGvZIM | #GloriousNationVictoriousTeam https://t.co/0oDfozmAFk
— Afghanistan Cricket Board (@ACBofficials) November 9, 2026
અફઘાનિસ્તાન તરફથી ત્રણ સદી
આના જવાબમાં અફઘાનિસ્તાને પ્રથમ દાવમાં 514 રન બનાવીને 10 રનની નજીવી સરસાઈ મેળવી હતી. આ ટીમને માત્ર 14 રનના સ્કોર પર અબ્દુલ મલિક (2)ના રૂપમાં પ્રથમ ઝટકો લાગ્યો હતો. ત્યારબાદ સેદીકુલ્લાહ અટલે રહમાનુલ્લાહ ગુરબાઝ સાથે બીજી વિકેટ માટે 206 રનની ભાગીદારી કરીને ટીમને મજબૂત સ્થિતિમાં પહોંચાડી હતી.
સેદીકુલ્લાહ 105 રન બનાવીને આઉટ થયા હતા, જ્યારે ગુરબાઝ 113 રન બનાવીને પેવેલિયન પરત ફર્યા હતા. ત્યારબાદ રહમત શાહે મોરચો સંભાળ્યો હતો. તે 347 બોલમાં 3 છગ્ગા અને 14 ચોગ્ગાની મદદથી 173 રન બનાવીને આઉટ થયા હતા.
વિપક્ષી ટીમ તરફથી ન્યૂમેન ન્યામહુરીએ 5 વિકેટ ઝડપી હતી, જ્યારે ગ્રેમ ક્રેમરે 3 વિકેટ મેળવી હતી.
41 વર્ષીય ક્રેગ ઇર્વિનની બેવડી સદી
ઝિમ્બાબ્વેની ટીમ મેચના ચોથા દિવસે બેટિંગ કરવા ઉતરી હતી. ટીમે 38 રનના સ્કોર સુધીમાં 2 વિકેટ ગુમાવી દીધી હતી. ત્યારબાદ બ્રાયન બેનેટે બ્રેન્ડન ટેલર (82) સાથે 82 રન અને કેપ્ટન ક્રેગ ઇર્વિન (58) સાથે 55 રનની ભાગીદારી કરીને ટીમનો સ્કોર 175 રન સુધી પહોંચાડ્યો હતો.
અહીંથી ક્રેગ ઇર્વિને અંતુમ નકવી સાથે પાંચમી વિકેટ માટે 140 રન અને વેસ્લી મધેવેરે સાથે છઠ્ઠી વિકેટ માટે અણનમ 208 રનની ભાગીદારી કરીને ટીમને 500 રનને પાર પહોંચાડી હતી.
ક્રેગ ઇર્વિન 279 બોલમાં 2 છગ્ગા અને 23 ચોગ્ગાની મદદથી 206 રન બનાવીને અણનમ રહ્યા હતા, જ્યારે મધેવેરેએ 5 બાઉન્ડરીની મદદથી અણનમ 100 રનની ઇનિંગ્સ રમી હતી.
બંને દેશો વચ્ચે શ્રેણીની બીજી અને અંતિમ મેચ 13 નવેમ્બરથી શારજાહના આ જ મેદાન પર રમાશે. આ મેચ જીતનારી ટીમ શ્રેણી પોતાના નામે કરશે.
