JEE Main 2025: જોઇન્ટ એન્ટ્રન્સ એક્ઝામિનેશન (જેઇઇ મેઇન)ની જાન્યુઆરી સેશનની પરીક્ષામાં 94.4 ટકા હાજરી રહી છે. આ વખતે જેઈઈ મેઈન સેશન 1ની પરીક્ષા માટે સૌથી વધુ રજિસ્ટ્રેશન કરવામાં આવ્યા હતા. પેપર 1 (બીઇ, બીટેક) માટે કુલ 13,11,544 ઉમેદવારોએ નોંધણી કરાવી હતી અને 66,888 ઉમેદવારોએ પેપર 2 (બી.આર્ક, બી.પ્લાનિંગ) માટે નોંધણી કરાવી હતી. 2024માં કુલ 12.21 લાખ અરજીઓ આવી હતી. હવે જેઇઇ મેઇન 2025ના પરિણામનો વારો છે. પરંતુ તે પહેલા જેઇઇ મેઇન 2નું રજિસ્ટ્રેશન શરૂ કરી દેવામાં આવશે.
જેઇઇ મેઇન્સ ૧ નું પરિણામ ક્યારે આવશે?
નેશનલ ટેસ્ટિંગ એજન્સી (એનટીએ)એ પ્રથમ સત્રની પરીક્ષાનું પરિણામ 12 ફેબ્રુઆરી અથવા તે પહેલાં જાહેર કરવાનું રહેશે. જણાવવામાં આવી રહ્યું છે કે 10 ફેબ્રુઆરી સુધીમાં પ્રથમ સત્રની પરીક્ષાનું પરિણામ જાહેર કરી શકાય છે. તે મુજબ એનટીએ જેઇઇ મેઇન સેશન 1 આન્સર કી (પ્રોવિઝનલ) આજે અથવા આવતીકાલે રિલીઝ કરશે. વિદ્યાર્થીઓને આ અંગે વાંધા નોંધાવવાની તક મળશે. ત્યાર બાદ ફાઈનલ આન્સર-કી સાથે પરિણામ જાહેર કરવામાં આવશે.
જેઇઇ મેઇન 2025 માં, જે વિદ્યાર્થીઓએ બીઇ અને બીટેક પેપરમાં ટોચના અઢી લાખ રેન્ક મેળવ્યા છે, તેમને આઇઆઇટીમાં પ્રવેશ માટે જેઇઇ એડવાન્સ પરીક્ષા 2025 લેવાની તક મળશે. આ પરીક્ષા આઈઆઈટી દ્વારા લેવામાં આવે છે. એનટીએની જવાબદારી માત્ર જેઇઇ મેઇન્સ પૂરતી મર્યાદિત છે.
જેઇઇ મેઇન-2 રજિસ્ટ્રેશન, પરીક્ષાની તારીખ
એનટીએ દ્વારા જેઇઇ મેઇન અંગે જારી કરવામાં આવેલા ઇન્ફર્મેશન બુલેટિનમાં જણાવાયું હતું કે બીજા સત્રની પરીક્ષા માટે નોંધણી 31 જાન્યુઆરી 2025 થી શરૂ થશે અને વિદ્યાર્થીઓ 24 ફેબ્રુઆરી સુધી ઓનલાઇન અરજી કરી શકે છે. જો કે શુક્રવાર સવાર સુધી એનટીએએ પોતાની વેબસાઈટ પર આ વિશે કોઈ નોટિફિકેશન બહાર પાડ્યું નથી. બીજા સત્રની પરીક્ષા માટેની કામચલાઉ તારીખો ૧ થી ૮ એપ્રિલ ૨૦૨૫ સુધીની છે અને અંતિમ પરિણામ ૧૭ એપ્રિલ સુધીમાં જાહેર કરવામાં આવશે.
નેશનલ ટેસ્ટિંગ એજન્સીએ જણાવ્યું હતું કે જેઇઇ મેઇન જાન્યુઆરી 2025 ની પરીક્ષા ભારતના કુલ 284 શહેરો અને વિદેશના 15 દેશોમાં લેવામાં આવી હતી. 22 જાન્યુઆરીથી 30 જાન્યુઆરી સુધી પહેલા સત્રની પરીક્ષા સીબીટી એટલે કે ઓનલાઇન મોડમાં લેવામાં આવી છે. જોકે, જેઇઇ મેઇનમાં ડ્રોઇંગ ટેસ્ટ પેપર ઓફલાઇન મોડમાં કરવામાં આવ્યું છે.
