અજાણ્યા કાર ચાલકે બાઇકને ટક્કર મારી
રાજ્યમાં સતત વધી રહેલા અકસ્માતો અને હિટ એન્ડ રનની ઘટનાઓ વચ્ચે, રાજકોટના જસદણથી વધુ એક હિટ એન્ડ રનની ઘટના પ્રકાશમાં આવી છે. જેમાં જસદણમાં મોડી રાત્રે એક કાર ચાલકે બાઇક ચલાવતા દંપતીને ટક્કર મારી હતી, જેના પરિણામે બંનેના મોત થયા હતા. આ ઘટનાને કારણે પરિવારમાં શોકનું વાતાવરણ છે.
પ્રાપ્ત માહિતી અનુસાર, મંગળવારે મોડી રાત્રે જસદણના બાયપાસ રોડ પર જુગાભાઈ પોપટભાઈ શાપારા (ઉંમર 70) અને સમુબેન જુગાભાઈ શાપારા (ઉંમર 60) બાઇક પર જઈ રહ્યા હતા. બાઇક પર રસ્તો ક્રોસ કરતી વખતે, એક અજાણ્યા કાર ચાલકે બાઇકને ટક્કર મારી. આ અકસ્માતમાં બાઇક ચલાવી રહેલા જુગાભાઈ શાપરાનું ઘટનાસ્થળે જ મોત નીપજ્યું હતું. જ્યારે પાછળ બેઠેલા તેમના પત્ની સમુબેન શાપરા ગંભીર રીતે ઘાયલ થયા હતા અને તેમને હોસ્પિટલમાં લઈ જવામાં આવ્યા હતા. જ્યાં તેનું પણ સારવાર દરમિયાન મોત નીપજ્યું હતું.
મૃતક દંપતી જસદણના લખવાડના રહેવાસી હતા અને ચોકીદાર તરીકે કામ કરીને પરિવારનું ગુજરાન ચલાવતા હતા. સ્થાનિક લોકોએ જણાવ્યું કે કાર પૂરપાટ ઝડપે આવી રહી હતી અને બાઇક ચાલકને ટક્કર મારીને ઘટનાસ્થળેથી ભાગી ગઈ હતી. અકસ્માતને કારણે ત્યાં લોકોની ભીડ એકઠી થઈ ગઈ હતી અને ટ્રાફિક જામ થઈ ગયો હતો. પોલીસે અજાણ્યા વાહન ચાલક વિરુદ્ધ ગુનો નોંધી વધુ તપાસ હાથ ધરી છે. પોલીસ કાર ચાલકને પકડવા માટે સીસીટીવી ફૂટેજની તપાસ કરી રહી છે.