Elon Musk Net Worth: વિશ્વના સૌથી ધનિક ઉદ્યોગપતિ ઈલોન મસ્ક (Elon Musk Net Worth)ની સંપત્તિ છેલ્લા કેટલાક દિવસોથી ઝડપી ગતિએ વધી રહી છે. ટેસ્લા (Tesla)ના શેરોમાં સતત ઉછાળો આવતા તેમની સંપત્તિમાં અદભૂત વધારો નોંધાયો છે. પરિણામે તેઓ 500 અબજ ડૉલર નેટવર્થ ધરાવનાર વિશ્વના પ્રથમ વ્યક્તિ બની ચૂક્યા છે.
ફોર્બ્સ ઇન્ડેક્સમાં મોટું સ્થાન
ફોર્બ્સની રિયલ ટાઇમ બિલિયોનેર્સ ઇન્ડેક્સ મુજબ, બુધવારે ટેસ્લાના શેરોમાં આશરે 4% ઉછાળો આવ્યા બાદ મસ્કની કુલ સંપત્તિ 500.1 અબજ ડૉલર સુધી પહોંચી ગઈ. માત્ર એક જ દિવસમાં 7 અબજ ડૉલરનો વધારો થવાથી મસ્કે ઇતિહાસ રચ્યો છે.
સ્પેસએક્સ અને xAIનો ફાળો
ટેસ્લા ઉપરાંત, તેમની સ્પેસએક્સ (SpaceX) અને નવી એઆઇ કંપની xAIના વધતા મૂલ્યાંકનનો પણ મસ્કની સંપત્તિમાં મહત્વનો ફાળો રહ્યો છે. રોકેટ જેવી ઝડપે વધતા આ મૂલ્યાંકનને કારણે તેઓ દુનિયાના સૌથી શક્તિશાળી બિઝનેસમેન તરીકે ફરી ચર્ચામાં આવ્યા છે.
રોકાણકારો માટે સંકેત
ઈલોન મસ્ક પાસે ટેસ્લાના 12.4% કરતાં વધુ શેર છે. થોડા દિવસો પહેલા જ તેમણે પોતાની કંપનીમાં 1 અબજ ડૉલરના શેર ખરીદ્યા હતા. આ નિર્ણય બાદ રોકાણકારોમાં વિશ્વાસ વધ્યો અને ટેસ્લાના શેરોએ જોરદાર તેજી પકડી.
