Adani Capital Group Investment: અદાણી ગ્રુપના ચેરમેન ગૌતમ અદાણી હાલમાં રિલાયન્સ ઇન્ડસ્ટ્રીઝના ચેરમેન મુકેશ અંબાણીને પછાડીને ભારત અને એશિયાના સૌથી મોટા ધનકુબેર બન્યા છે. અમેરિકામાં અદાણી વિરૂદ્ધ દાખલ થયેલો કેસ પણ હવે બંધ થઈ ગયો છે. આની સાથે જ ભારતના આ બે દિગ્ગજ ધનકુબેરો વિશે વિદેશી રોકાણકારોનો દૃષ્ટિકોણ પણ બદલાતો દેખાઈ રહ્યો છે. દુનિયાની સૌથી મોટી ઇન્વેસ્ટમેન્ટ મેનેજમેન્ટ કંપનીઓમાંથી એક કેપિટલ ગ્રુપે હાલમાં અદાણી ગ્રુપની કંપનીઓમાં પોતાની હિસ્સેદારી વધારી છે જ્યારે રિલાયન્સમાં પોતાની હોલ્ડિંગ્સ ઓછી કરી રહ્યું છે. કેપિટલ ગ્રુપનું હેડક્વાર્ટર અમેરિકાના લોસ એન્જિલિસમાં છે.
બ્લૂમબર્ગના એક રિપોર્ટમાં સૂત્રોના હવાલાથી એવો દાવો કરવામાં આવ્યો છે કે કેપિટલ ગ્રુપે હાલમાં અદાણી ગ્રુપની ત્રણ કંપનીઓમાં ૨ અબજ ડોલર એટલે કે આશરે ૧૯,૦૦૦ કરોડ રૂપિયાથી વધારે રોકાણ કર્યું છે. ૫ મેના રોજ કેપિટલ ગ્રુપે અદાણી પોર્ટ્સ એન્ડ સ્પેશિયલ ઇકોનોમિક ઝોનમાં આશરે બે ટકા હિસ્સેદારી ૭૪.૮૬ અબજ રૂપિયામાં ખરીદી. આ ખરીદી ખુલ્લા બજારમાંથી કરવામાં આવી. કેપિટલ ગ્રુપ પૂરી દુનિયામાં ૩.૩ ટ્રિલિયન ડોલરથી વધુના રોકાણને મેનેજ કરે છે. ગ્રુપે અદાણી પાવર અને અદાણી ગ્રીન એનર્જીમાં પણ ૧.૫ ટકાથી લઈને ૨ ટકા સુધી હિસ્સેદારી ખરીદી છે.
શેરોની ચાલ
પાછલા એક વર્ષમાં અદાણી પાવરમાં ૯૪ ટકા, અદાણી ગ્રીનમાં ૩૫ ટકા અને અદાણી પોર્ટ્સમાં ૨૫ ટકા તેજી આવી છે. આ વિશે કેપિટલ ગ્રુપના એક પ્રવક્તાએ ટિપ્પણી કરવાનો ઇનકાર કરી દીધો. અદાણી ગ્રુપ તરફથી પણ કોઈ કોમેન્ટ આવી નથી. કેપિટલ ગ્રુપે રિલાયન્સમાં પોતાની હિસ્સેદારી ઓછી કરી છે. માર્ચના અંતમાં કેપિટલ ગ્રુપ પાસે રિલાયન્સ ઇન્ડસ્ટ્રીઝના આશરે ૧૪૨ મિલિયન શેર હતા. છ વર્ષ પહેલા આ આંકડો ૫૦૦ મિલિયન અને માર્ચ ૨૦૧૭માં ૭૫૫ મિલિયન હતો. રિલાયન્સના શેરોમાં પાછલા એક વર્ષમાં ૮.૩૬ ટકાનો ઘટાડો આવ્યો છે.
કેપિટલ ગ્રુપનું રોકાણ
કેપિટલ ગ્રુપે અદાણી ગ્રુપની ત્રણ કંપનીઓમાં પોતાની હિસ્સેદારી વધારી છે
અદાણી ગ્રીન, અદાણી પાવર અને અદાણી પોર્ટ્સમાં $૨ અબજથી વધારે રોકાણ
અમેરિકામાં લોસ એન્જિલિસની આ કંપનીએ રિલાયન્સમાં હિસ્સેદારી ઓછી કરી
એક વર્ષમાં અદાણી પાવરમાં ૯૪%, અદાણી ગ્રીનમાં ૩૫% અને અદાણી પોર્ટ્સમાં ૨૫% તેજી
રિલાયન્સના શેરોમાં પાછલા એક વર્ષમાં ૮.૩૬ ટકાનો ઘટાડો આવ્યો છે
શેરોની હાલત
અદાણી પોર્ટ્સનો શેર અત્યારે બીએસઈ પર મામૂલી ઘટાડા સાથે ૧૭૮૬.૮० રૂપિયા પર ટ્રેડ કરી રહ્યો છે. આનું ૫૨ અઠવાડિયાનું ઉચ્ચતમ સ્તર ૧,૮૨૩.૭૫ રૂપિયા છે. આવી જ રીતે અદાણી પાવરનો શેર મામૂલી તેજી સાથે ૨૨૦.૮૦ રૂપિયા પર અને અદાણી ગ્રીનનો શેર ૧.૨૨ ટકા તેજી સાથે ૧૩૭૫.૭૦ રૂપિયા પર છે. દેશની સૌથી વેલ્યુએબલ કંપની રિલાયન્સનો શેર પણ ૦.૪૦ ટકા તેજી સાથે ૧૩૫૫.૧૦ રૂપિયા પર છે. આનું ૫૨ અઠવાડિયાનું ઉચ્ચતમ સ્તર ૧,૬૧૧.૨૦ રૂપિયા છે.
