GST Collection July 2026: ભારતના કુલ ગુડ્સ એન્ડ સર્વિસિસ ટેક્સ (GST) કલેક્શનમાં જુલાઈ 2026 દરમિયાન જોરદાર વધારો નોંધાયો છે. સરકાર દ્વારા શનિવારે જાહેર કરાયેલા માસિક GST આવકના આંકડા મુજબ, જુલાઈમાં કુલ GST કલેક્શન વાર્ષિક ધોરણે 15.4 ટકા વધીને 2.11 લાખ કરોડ રૂપિયા થઈ ગયું છે. ગયા વર્ષે જુલાઈમાં આ આંકડો લગભગ 1.82 લાખ કરોડ રૂપિયા હતો.
GST કલેક્શનમાં આ વધારો મુખ્યત્વે સ્થાનિક આવક અને આયાતમાંથી મળતા કરમાં મજબૂત વૃદ્ધિના કારણે થયો છે. આંકડાઓ દર્શાવે છે કે પશ્ચિમ એશિયામાં ચાલી રહેલા ભૂરાજકીય તણાવ છતાં દેશમાં સ્થાનિક વપરાશ અને વેપારિક પ્રવૃત્તિઓ સ્થિર રહી છે.
સ્થાનિક GST માંથી જોરદાર આવક
સ્થાનિક પ્રવૃત્તિઓ અને આયાતમાંથી મળેલા કરએ કુલ GST કલેક્શનને મજબૂત બનાવવામાં મહત્વની ભૂમિકા ભજવી છે.
જુલાઈમાં સ્થાનિક GST આવક 10.1 ટકા વધીને 1.45 લાખ કરોડ રૂપિયા થઈ ગઈ, જે જુલાઈ 2025માં 1.31 લાખ કરોડ રૂપિયા હતી.
આયાતમાંથી મળતી GST આવક 28.8 ટકા વધીને 66,511 કરોડ રૂપિયા થઈ ગઈ.
રિફંડમાં 13 ટકાથી વધુનો વધારો
સરકાર દ્વારા જાહેર કરાયેલા આંકડા મુજબ, જુલાઈમાં કુલ GST રિફંડમાં પણ વધારો થયો છે. કુલ રિફંડ વાર્ષિક ધોરણે 13.1 ટકા વધીને 29,968 કરોડ રૂપિયા રહ્યું. જ્યારે ICEGATE મારફતે પ્રોસેસ કરાયેલા નિકાસ સંબંધિત GST રિફંડમાં 22.7 ટકાનો વધારો નોંધાયો અને તે 12,288 કરોડ રૂપિયા રહ્યું.
રિફંડ બાદ જુલાઈમાં શુદ્ધ GST આવક 1.81 લાખ કરોડ રૂપિયા રહી, જે ગયા વર્ષની સરખામણીએ 15.8 ટકા વધુ છે. તેમાં સ્થાનિક શુદ્ધ GST આવક 10.5 ટકા વધીને 1.27 લાખ કરોડ રૂપિયા અને કસ્ટમ્સમાંથી મળતી શુદ્ધ GST આવક 30.3 ટકા વધીને 54,223 કરોડ રૂપિયા થઈ ગઈ.
એપ્રિલ-જુલાઈ દરમિયાન રેકોર્ડ GST કલેક્શન
ચાલુ નાણાકીય વર્ષના પ્રથમ ચાર મહિના એટલે કે એપ્રિલથી જુલાઈ 2026 દરમિયાન પણ GST કલેક્શનમાં સારો વધારો નોંધાયો છે. આ સમયગાળા દરમિયાન કુલ GST કલેક્શન 10.1 ટકા વધીને 8.43 લાખ કરોડ રૂપિયા થઈ ગયું, જ્યારે અગાઉના નાણાકીય વર્ષની સમાન અવધિમાં તે 7.66 લાખ કરોડ રૂપિયા હતું. એપ્રિલ-જુલાઈ દરમિયાન શુદ્ધ GST કલેક્શન 9.2 ટકા વધીને 7.21 લાખ કરોડ રૂપિયા રહ્યું.
હરિયાણા સૌથી આગળ
જુલાઈના GST કલેક્શનની વાર્ષિક વૃદ્ધિના મામલે હરિયાણા 25 ટકાના વધારા સાથે સૌથી આગળ રહ્યું.
ત્યારબાદ ગુજરાત અને તેલંગાણામાં GST કલેક્શન 19-19 ટકા વધ્યું.
પંજાબ અને કેરળમાં 16 ટકા, ઉત્તર પ્રદેશમાં 15 ટકા, મહારાષ્ટ્રમાં 13 ટકા, કર્ણાટકમાં 12 ટકા અને દિલ્હીમાં 8 ટકાનો વધારો નોંધાયો.
મહારાષ્ટ્ર દેશમાં GST આવકમાં સૌથી મોટું યોગદાન આપતું રાજ્ય છે.
આ રાજ્યોમાં GST કલેક્શન ઘટ્યું
કેટલાક રાજ્યોમાં જુલાઈ દરમિયાન GST કલેક્શનમાં ઘટાડો પણ નોંધાયો. હિમાચલ પ્રદેશમાં GST કલેક્શન 22 ટકા, ઉત્તરાખંડમાં 18 ટકા અને પુડુચેરીમાં 17 ટકા ઘટ્યું.
આ ઉપરાંત મધ્ય પ્રદેશમાં 10 ટકા, આંધ્ર પ્રદેશમાં 5 ટકા અને તમિલનાડુમાં સામાન્ય 1 ટકાનો ઘટાડો નોંધાયો.
