ITR Filing: ટેક્સ રિટર્ન ભરનારાઓ માટે ખાસ સૂચના: સમયમર્યાદા ચૂકી ગયા તો ભરવો પડશે દંડ, જાણો તમામ વિગતો
ITR Filing: ઈન્કમ ટેક્સ રિટર્ન એટલે કે ITR ભરવાની પ્રક્રિયા શરૂ થઈ ચૂકી છે અને મોટાભાગના નોકરીયાત લોકો માટે ITR ફાઈલ કરવાની છેલ્લી તારીખ ૩૧ જુલાઈ ૨૦૨૬ છે પરંતુ શું તમે જાણો છો કે દરેક કરદાતા માટે આ સમયમર્યાદા સમાન નથી. આવકવેરા વિભાગે અલગ-અલગ શ્રેણીના કરદાતાઓ માટે અલગ-અલગ ITR ફાઈલિંગની અંતિમ તારીખો નક્કી કરી છે. આવામાં આજે અમે તમને આ સમયમર્યાદાઓ વિશે જણાવવાના છીએ.
જો તમે બિઝનેસ કરો છો, પ્રોફેશનલ છો, ટેક્સ ઓડિટના દાયરામાં આવો છો અથવા ટ્રાન્સફર પ્રાઈસિંગ નિયમો હેઠળ આવો છો, તો તમારી ITR જમા કરવાની અંતિમ તારીખ અલગ હોઈ શકે છે. આવામાં સાચી સમયમર્યાદા જાણવી અત્યંત જરૂરી છે, જેથી દંડ અને અન્ય મુશ્કેલીઓથી બચી શકાય.
નાણાકીય વર્ષ ૨૦૨૬-૨૭ માટે ITR ફાઈલિંગ સમયમર્યાદા
નોકરીયાત અને પેન્શનભોગી કરદાતા
જેમની આવકનું ઓડિટ જરૂરી નથી અને જેઓ ITR-૧ અથવા ITR-૨ ભરે છે, તેમના માટે અંતિમ તારીખ ૩૧ જુલાઈ ૨૦૨૬ છે.
બિન-ઓડિટવાળા બિઝનેસ અને પ્રોફેશનલ્સ
જે કરદાતાઓ ITR-૩ અથવા ITR-૪ ભરે છે અને જેમના ખાતાઓનું ઓડિટ આવશ્યક નથી, તેમને આ વખતે વધારાનો સમય આપવામાં આવ્યો છે. તેમના માટે સમયમર્યાદા ૩૧ ઓગસ્ટ ૨૦૨૬ છે.
ટેક્સ ઓડિટવાળા કરદાતા
જેમના ખાતાઓનું ટેક્સ ઓડિટ જરૂરી છે, તેમના માટે અંતિમ તારીખ ૩૧ ઓક્ટોબર છે.
ટ્રાન્સફર પ્રાઈસિંગ નિયમો હેઠળ આવતા કરદાતા
કલમ ૯૨E હેઠળ આવતા કરદાતાઓ માટે અંતિમ તારીખ ૩૦ નવેમ્બર ૨૦૨૬ છે.
લેટ (Late) રિટર્ન
જો નિર્ધારિત સમયમર્યાદાની અંદર ITR દાખલ કરવામાં ન આવે, તો ૩૧ ડિસેમ્બર ૨૦૨૬ સુધી બિલેટેડ રિટર્ન ફાઈલ કરી શકાય છે.
સંશોધિત (Revised) રિટર્ન
જો રિટર્ન ભર્યા પછી કોઈ ભૂલ જણાય, તો તેને સુધારવા માટે ૩૧ માર્ચ ૨૦૨૭ સુધી સંશોધિત રિટર્ન ફાઈલ કરી શકાય છે.
કયા લોકો માટે ITR ફાઈલ કરવું જરૂરી છે?
આવકવેરાના નિયમો અનુસાર કેટલીક પરિસ્થિતિઓમાં ITR દાખલ કરવું અનિવાર્ય છે, ભલે તમારી ટેક્સ જવાબદારી ન બનતી હોય. જેમાં-
નાણાકીય વર્ષ દરમિયાન વિદેશ યાત્રા પર ૨ લાખ કે તેથી વધુ રૂપિયા ખર્ચવા.
એક વર્ષમાં વીજળી બિલ પર ૧ લાખ કે તેથી વધુ રૂપિયા ખર્ચવા.
એક કે એકથી વધુ ચાલુ ખાતામાં કુલ ૧ કરોડ કે તેથી વધુ રૂપિયા જમા કરાવવા.
આવકવેરા વિભાગ દ્વારા નિર્ધારિત અન્ય શરતો.
આવકવેરા અધિનિયમની કલમ ૨૩૪F હેઠળ સમયમર્યાદા પછી ITR દાખલ કરવા પર દંડ ભરવો પડી શકે છે. સામાન્ય કિસ્સાઓમાં મહત્તમ ૫૦૦૦ રૂપિયા સુધી દંડ ભરવો પડે છે. તેમજ જો ટેક્સપાત્ર આવક ૫ લાખ રૂપિયા સુધી હોય, તો દંડ ૧૦૦૦ રૂપિયા હશે.
