મુંબઈ સેન્ટ્રલ ડિવિઝનમાં TCને બોડી વૉર્ન કેમેરાવાળી ખાસ બ્લેક જેકેટ, ટિકિટ તપાસની સમગ્ર પ્રક્રિયા થશે રેકોર્ડ
Railway Body Worn Camera Jacket: રેલવે સ્ટેશનો અને દોડતી ટ્રેનોમાં ટિકિટ તપાસ દરમિયાન મુસાફરો અને ટિકિટ તપાસ સ્ટાફ (TC/TTE) વચ્ચે થતા વિવાદોને ઘટાડવા માટે વેસ્ટર્ન રેલવેએ નવી પહેલ શરૂ કરી છે. મુંબઈ સેન્ટ્રલ ડિવિઝનમાં ટિકિટ તપાસ સ્ટાફને બોડી વૉર્ન કેમેરાવાળી વિશેષ બ્લેક જેકેટ આપવામાં આવી છે. આ કેમેરાથી ટિકિટ તપાસની સમગ્ર પ્રક્રિયા અવાજ સાથે રેકોર્ડ થશે, જેથી મુસાફરો અને રેલવે કર્મચારીઓ બંનેની જવાબદારી વધશે.
રેલવે બોર્ડના અધિકારીઓ અનુસાર, લગભગ બે મહિના પહેલાં આ પાઇલટ પ્રોજેક્ટ હેઠળ બે TCને આવી જેકેટ પહેરાવીને ફરજ પર મૂકવામાં આવ્યા હતા. સારા પરિણામ મળ્યા બાદ મંગળવારે વધુ 30 TCને કેમેરાવાળી જેકેટ આપવામાં આવી છે. ટિકિટ તપાસ દરમિયાન મુસાફરોને પણ જણાવવામાં આવી રહ્યું છે કે સમગ્ર કાર્યવાહી કેમેરામાં રેકોર્ડ થઈ રહી છે.
વિસ્તરણની યોજના
અધિકારીઓનું કહેવું છે કે રેકોર્ડિંગ અંગેની માહિતી મળ્યા બાદ મુસાફરો તપાસમાં વધુ સહકાર આપી રહ્યા છે. બીજી તરફ ટિકિટ તપાસ સ્ટાફના વ્યવહારમાં પણ સુધારો જોવા મળ્યો છે. તેનાથી લાંચ માંગવા અથવા ગેરવર્તણૂક જેવા આક્ષેપોની સ્થિતિમાં પણ રેકોર્ડિંગ મહત્વપૂર્ણ પુરાવા તરીકે કામ કરશે.
રેલવે હવે આ પાઇલટ પ્રોજેક્ટને સફળ માનીને તેને દેશના અન્ય વ્યસ્ત રેલવે સ્ટેશનો સુધી વિસ્તરણ કરવાની તૈયારી કરી રહ્યું છે. ભવિષ્યમાં દોડતી ટ્રેનોમાં ફરજ બજાવતા TTEને પણ આવી બોડી વૉર્ન કેમેરા જેકેટ આપવામાં આવી શકે છે. આ જેકેટોને લાંબી ફરજને ધ્યાનમાં રાખીને તૈયાર કરવામાં આવી છે. તેમાં એવું કાપડ વાપરવામાં આવ્યું છે, જેથી કર્મચારીઓને ઓછી ગરમી અનુભવાય. સાથે જ મોટા ખિસ્સા આપવામાં આવ્યા છે, જેથી સામાન પણ રાખી શકાય.
