PhD Admission IIIT Delhi Fellowship: ઇન્દ્રપ્રસ્થ ઇન્સ્ટિટ્યૂટ ઑફ ઇન્ફોર્મેશન ટેક્નોલોજી (IIIT) દિલ્હીએ તેના PhD એડમિશન 2026 માટે અરજીઓ સ્વીકારવાનું શરૂ કર્યું છે. તેમાં 6 વિષયોમાં સંશોધન કરવાની તક આપવામાં આવી રહી છે. પોતાના સંશોધન કાર્યક્રમ ઉપરાંત સંસ્થાએ ડૉક્ટરલ સ્કૉલર્સ માટે નાણાકીય સહાય પૅકેજની પણ માહિતી આપી છે. તેમાં દર મહિને ₹60,000ની ફેલોશિપ, લૅપટૉપ ફંડ અને આંતરરાષ્ટ્રીય સંશોધન મુલાકાત માટે સહાયનો સમાવેશ થાય છે.
PhD એડમિશન અને ફેલોશિપ માટે અરજી કરવા ઉમેદવારોએ સંસ્થાની સત્તાવાર વેબસાઇટ પર જવું પડશે. ઇચ્છુક ઉમેદવારો 15 નવેમ્બર 2026 સુધી સંસ્થાની સત્તાવાર વેબસાઇટ મારફતે અરજી કરી શકે છે.
IIIT દિલ્હી PhD એડમિશન 2026 માટેની અરજી શરૂ
સંસ્થાની સત્તાવાર વેબસાઇટ iiitd.ac.in પર ઉપલબ્ધ માહિતી અનુસાર, PhD એડમિશન શરૂ થઈ ગયાં છે. આ વખતે 6 વિષયોમાં ડૉક્ટરલ સંશોધન માટે અરજીઓ મંગાવવામાં આવી છે. તેમાં કમ્પ્યુટેશનલ બાયોલોજી, કમ્પ્યુટર સાયન્સ અને એન્જિનિયરિંગ, ઇલેક્ટ્રોનિક્સ અને કમ્યુનિકેશન એન્જિનિયરિંગ, હ્યુમન સેન્ટર્ડ ડિઝાઇન, ગણિતશાસ્ત્ર અને સામાજિક વિજ્ઞાન તથા માનવવિદ્યાના વિષયોનો સમાવેશ થાય છે.
દર મહિને ₹60,000 ફેલોશિપ અને લૅપટૉપ ફંડ પણ
સંસ્થાએ જણાવ્યું છે કે એડમિશન સાથે IIIT દિલ્હી પોતાના PhD સ્કૉલર્સને ફેલોશિપની સાથે અન્ય ઘણી સુવિધાઓ પણ આપે છે. દર મહિને ફેલોશિપની રકમ ₹60,000 (HRA સહિત) નક્કી કરવામાં આવી છે. આ ઉપરાંત અન્ય સુવિધાઓ નીચે મુજબ છે.
- લૅપટૉપ ફંડ: એક વખત ₹50,000ની સહાય મળશે.
- સંશોધન સંબંધિત ખર્ચ (કન્ટિન્જન્સી): 5 વર્ષ સુધી દર વર્ષે ₹20,000 મળશે.
- આંતરરાષ્ટ્રીય સંશોધન મુલાકાત: 2 અઠવાડિયાની આંતરરાષ્ટ્રીય લૅબ મુલાકાત માટે ₹1.5 લાખની સહાય આપવામાં આવશે.
- કૉન્ફરન્સ અને વર્કશૉપ માટે સહાય: કૉન્ફરન્સ, વર્કશૉપ અને મુસાફરી માટે ₹2.5 લાખનું પ્રોફેશનલ ડેવલપમેન્ટ અલાઉન્સ (PDA) મળશે.
આ ફેલોશિપનો હેતુ સંશોધન સ્કૉલર્સને તેમના ડૉક્ટરલ અભ્યાસ દરમિયાન શૈક્ષણિક અને સંશોધન સંબંધિત ખર્ચ પૂરા કરવામાં મદદ કરવાનો છે. અરજી કરનારા ઉમેદવારોને શૉર્ટલિસ્ટ કરવામાં આવશે તો તેમને આ સુવિધાઓ મળશે.
PhD એડમિશન 2026 માટે 15 નવેમ્બર સુધી અરજી કરો
જે ઉમેદવારો IIIT દિલ્હી PhD એડમિશન અને ફેલોશિપ માટે અરજી કરવા માગે છે, તેઓ iiitd.ac.in પર જઈને સત્તાવાર એડમિશન પોર્ટલ જોઈ શકે છે અને પસંદ કરેલા વિષય માટે અરજી સંબંધિત સૂચનાઓનું પાલન કરી શકે છે. ફોર્મ સબમિટ કરતાં પહેલાં ઉમેદવારોએ વિભાગ પ્રમાણેની લાયકાતની શરતો, સંશોધનનાં ક્ષેત્રો, જરૂરી દસ્તાવેજો અને પસંદગી પ્રક્રિયા તપાસવી જોઈએ. અરજી કરવાની છેલ્લી તારીખ 15 નવેમ્બર 2026 છે.
