Gujarat Police Dog Check Gold Medal: દુનિયાભરમાં બોમ્બ વિસ્ફોટક અને ગુનાના કેસોની તપાસમાં ડોગનો ઉપયોગ થાય છે. આના માટે તેમને વર્ષો સુધી ટ્રેન પણ કરવામાં આવે છે. ગુજરાત પોલીસને 16 વર્ષના અંતરાલ બાદ પોલીસના ‘ચેક’ નામના ડોગે ગોલ્ડ મેડલ અપાવ્યો છે. શુક્રવારે ડીજીપી ડો. કે એલ એન રાવે ડોગ ચેક અને તેના હેન્ડલર સાથે મુલાકાત કરી હતી. ડીજીપીએ આ પ્રસંગે સન્માનિત પણ કર્યા હતા. ગુજરાત પોલીસના કુતરા ‘ચેક’ એ નેશનલ પોલીસ ડ્યુટી મીટમાં ગોલ્ડ મેડલ જીત્યો છે. ઓલ ઇન્ડિયા પોલીસ ડ્યુટી મીટ (AIPDM) મહારાષ્ટ્રના નાગપુરમાં યોજાઈ હતી. ડીજીપીએ ડોગ ‘ચેક’ અને તેના હેન્ડલર રમેશ ખાંટના વખાણ કર્યા હતા.
નાગપુરની ચેમ્પિયનશિપમાં થઈ પરીક્ષા
એક સત્તાવાર નિવેદન અનુસાર મહારાષ્ટ્રના નાગપુરમાં આયોજિત 69મી ઓલ ઇન્ડિયા પોલીસ ડ્યુટી મીટ ચેમ્પિયનશિપ 2025–26 માં, ગુજરાત પોલીસના કુતરા ‘ચેક’ એ બે અલગ-અલગ કેટેગરીમાં ગોલ્ડ અને બ્રોન્ઝ મેડલ જીત્યા અને રાજ્ય પોલીસનું ગૌરવ વધાર્યું. માર્ચ–એપ્રિલ 2026 દરમિયાન નાગપુરમાં આયોજિત આ 69મી આવૃત્તિમાં દેશભરમાંથી પોલીસ K9 દળ, ફોરેન્સિક નિષ્ણાતો અને પોલીસકર્મીઓ સામેલ થયા હતા. આ સ્પર્ધામાં વિસ્ફોટક અને નશીલા પદાર્થોની શોધ કરવા, ટ્રેકિંગ, ચપળતા અને ઓર્ડર ફોલો કરવા જેવી ક્ષમતાઓની પરીક્ષા લેવામાં આવી હતી. ગુજરાત પોલીસના ડોગ ટ્રેનિંગ કન્સલ્ટન્ટ ચંદનસિંહ રાઠોડે જણાવ્યું કે ગુજરાત પોલીસના કુતરા ‘ચેક’ એ ટ્રેકિંગ કેટેગરીમાં ગોલ્ડ મેડલ જીત્યો અને ઓવરઓલ ટ્રેકિંગ કેટેગરીમાં બ્રોન્ઝ મેડલ પણ જીત્યો. આ સિદ્ધિ હાંસલ કરવા માટે અમે સખત મહેનત કરી છે.
મીટમાં કુલ કેટલા મેડલ જીત્યા
ગુજરાત પોલીસના ડીજીપી ઓફિસે એક નિવેદનમાં જણાવ્યું છે કે આ ગુજરાત પોલીસ માટે ગૌરવની ક્ષણ હતી, કારણ કે રાજ્યના પોલીસ કુતરાએ 16 વર્ષના અંતરાલ બાદ રાષ્ટ્રીય સ્તરની પોલીસ ડ્યુટી મીટમાં ગોલ્ડ મેડલ જીત્યો હતો. ત્યારે ડીજીપીએ પોલીસ કુતરા ‘ચેક’ અને તેના હેન્ડલર રમેશ ખાંટને સન્માનિત કર્યા તો પોલીસ ડોગ ટ્રેનિંગ કન્સલ્ટન્ટ કર્નલ ચંદનસિંહ રાઠોડ પણ હાજર રહ્યા હતા. ગુજરાત પોલીસના કુલ છ કુતરાઓએ ત્રણ અલગ-અલગ સ્પર્ધાત્મક કેટેગરીમાં ભાગ લીધો હતો.
ચેકે મનાવ્યો પોતાનો લોહ
ટ્રેકિંગ કેટેગરીમાં વિવિધ રાજ્યોની પોલીસ અને અર્ધલશ્કરી દળોના કુલ 45 કુતરાઓએ ભાગ લીધો હતો, જેમાં ગુજરાત પોલીસના કુતરા ‘ચેક’ એ શ્રેષ્ઠ પ્રદર્શન કરતા ગોલ્ડ મેડલ જીત્યો. આ આખા આયોજનમાં વિવિધ રાજ્યોની પોલીસ અને અર્ધલશ્કરી દળોના 200 થી વધુ કુતરાઓએ અલગ-અલગ કેટેગરીમાં ભાગ લીધો હતો. આ ચેમ્પિયનશિપ માટેની તૈયારી પોલીસ મહાનિર્દેશક (તાલીમ) ડો. નીરજા ગોત્રુની દેખરેખ હેઠળ કરવામાં આવી હતી. ગુજરાતના વિવિધ જિલ્લાઓમાં અંદાજે 160 પોલીસ કુતરા તૈનાત છે, જેમને વિસ્ફોટકની શોધ કરવા, નશીલા પદાર્થોની શોધ કરવા, ગુનાની તપાસ માટે ટ્રેકિંગ કરવા અને દારૂની શોધ કરવાના કામો માટે ટ્રેનિંગ આપવામાં આવી છે.
