Illegal Sand Mining Maliya: ખનન માફિયાઓ પર તવાઈ, માળિયામાં રેન્જ આઈજીની ટીમે કરોડોનું રેતી ખનન ઝડપી પાડ્યું

કરોડોની મશીનરી અને 10 ડમ્પર જપ્ત

આ દરોડા દરમિયાન પોલીસને સ્થળ પરથી રેતી ખનન માટે વપરાતું અત્યંત કિંમતી હીટાચી મશીન અને 2 હુડકા બોટ મળી આવી હતી, જેને તાત્કાલિક અસરથી જપ્ત કરી લેવામાં આવી છે. એટલું જ નહીં, પોલીસે નદીના પટમાંથી રેતી ભરીને રવાના થયેલા 10 જેટલા ડમ્પરને પણ ફિલ્મી ઢબે રસ્તામાં જ આંતરીને ઝડપી પાડ્યા છે. આ સમગ્ર ઓપરેશનમાં કુલ 2.64 કરોડ રૂપિયાનો મુદ્દામાલ જપ્ત કરવામાં આવ્યો છે. રાતના અંધારામાં મશીનો લગાવીને થતી આ ચોરીને અટકાવીને પોલીસે પર્યાવરણને નુકસાન પહોંચાડતા તત્વો સામે લાલ આંખ કરી છે.

ખાણ ખનીજ વિભાગ દ્વારા તપાસ અને દંડકીય કાર્યવાહી

પોલીસની આ સફળ કામગીરી બાદ ખાણ ખનીજ વિભાગના અધિકારીઓને તાત્કાલિક સ્થળ પર બોલાવીને આગળની કાર્યવાહી સોંપવામાં આવી છે. હાલમાં તંત્ર દ્વારા જપ્ત કરાયેલા મુદ્દામાલ પર કાયદેસરની દંડકીય કાર્યવાહી હાથ ધરવામાં આવી છે અને અધિકારીઓ દ્વારા નદીના પટમાં થયેલા ખનન અને રેતીના જથ્થાની ચોક્કસ માપણી કરવામાં આવી રહી છે. આગામી દિવસોમાં આ ગેરકાયદે પ્રવૃત્તિ પાછળ કોનો હાથ છે તે દિશામાં તપાસ તેજ કરવામાં આવશે. પોલીસની આ આક્રમક કામગીરીથી સમગ્ર પંથકમાં ગેરકાયદે ખનન કરતા માફિયાઓમાં ભારે ફફડાટ ફેલાયો છે.

આ પણ વાંચો: Amul Milk Price Hike: મોંઘવારીનો ડામ, અમૂલ દૂધના ભાવમાં પ્રતિ લિટર 2 રૂપિયાનો વધારો ઝિંકાયો – Newz Cafe