Patadi Counting Center Clash: સુરેન્દ્રનગર જિલ્લાના પાટડીમાં સ્થાનિક સ્વરાજ્યની ચૂંટણીની મતગણતરી દરમિયાન ભારે હોબાળો મચ્યો છે. ભાજપ અને કોંગ્રેસના કાર્યકરો વચ્ચે શરૂ થયેલી ઉગ્ર બોલાચાલીએ જોતજોતામાં હિંસક સ્વરૂપ ધારણ કર્યું હતું. બંને પક્ષના કાર્યકરો જાહેરમાં એકબીજા સાથે બાખડ્યા હતા અને સામસામે ઝપાઝપીના દ્રશ્યો સર્જાયા હતા. પોલીસની હાજરી હોવા છતાં સ્થિતિ બેકાબૂ બનતા મતગણતરી કેન્દ્ર પર ભય અને તંગદિલીનો માહોલ વ્યાપી ગયો હતો. આ ઘટનાને કારણે પ્રશાસન અને સુરક્ષા વ્યવસ્થા સામે પણ સવાલો ઉભા થયા છે.
પૂર્વ ધારાસભ્ય અને પોલીસ વચ્ચે ઉગ્ર બોલાચાલી
ઘટનાની ગંભીરતા ત્યારે વધી જ્યારે કોંગ્રેસના પૂર્વ ધારાસભ્ય નૌશાદ સોલંકી અને ફરજ પરના પોલીસ અધિકારીઓ વચ્ચે તીખી તકરાર થઈ. નૌશાદ સોલંકીએ પોલીસની નિષ્પક્ષતા પર શંકા વ્યક્ત કરતા ગંભીર આક્ષેપો કર્યા છે. તેમણે દાવો કર્યો છે કે મતગણતરી કેન્દ્ર પર સુરક્ષામાં મોટી ખામી છે અને કોઈ અજાણ્યા શખ્સે છરી બતાવીને ડરાવવાનો પ્રયાસ કર્યો છે. પોલીસ દ્વારા યોગ્ય રીતે ચેકિંગ કરવામાં આવતું નથી તેવા આક્ષેપો સાથે પૂર્વ ધારાસભ્યએ હોબાળો કરતા ગણતરીની પ્રક્રિયામાં પણ વિક્ષેપ પડ્યો હતો.
ચુસ્ત બંદોબસ્ત વચ્ચે સુરક્ષા વ્યવસ્થાના ધજાગરા
પાટડીમાં પરિસ્થિતિ વણસતી જોઈને ઉચ્ચ પોલીસ અધિકારીઓ સહિત ૨ Dy.S.P અને વધારાનો પોલીસ કાફલો ઘટનાસ્થળે ઉતારી દેવામાં આવ્યો છે. આટલી મોટી સંખ્યામાં પોલીસ જવાનો અને અધિકારીઓ તૈનાત હોવા છતાં રાજકીય પક્ષના કાર્યકરો કેવી રીતે સામસામે આવી ગયા અને મારામારી સુધી વાત પહોંચી, તે ચર્ચાનો વિષય બન્યો છે. પોલીસ અત્યારે ભીડને વિખેરવા માટે બળપ્રયોગ કરી રહી છે અને સમગ્ર વિસ્તારને પોલીસ છાવણીમાં ફેરવી દેવામાં આવ્યો છે જેથી વધુ કોઈ હિંસા ન થાય.
મતગણતરી કેન્દ્રની આસપાસ લોખંડી બંદોબસ્ત
હાલમાં પાટડીમાં સ્થિતિ નિયંત્રણમાં લેવા માટે પોલીસે પેટ્રોલિંગ તેજ કરી દીધું છે. મતગણતરી કેન્દ્રની અંદર અને બહાર ચુસ્ત બંદોબસ્ત ગોઠવી દેવાયો છે અને બિનજરૂરી અવરજવર પર પ્રતિબંધ મૂકવામાં આવ્યો છે. રાજકીય વિવાદોને કારણે જનતામાં પણ ઉત્તેજના જોવા મળી રહી છે. પોલીસ અધિકારીઓ હવે બંને પક્ષના આગેવાનો સાથે વાતચીત કરીને શાંતિ જાળવવા અપીલ કરી રહ્યા છે. આ સંઘર્ષની અસર આગામી કલાકોમાં જાહેર થનારા ચૂંટણીના પરિણામો પર પણ પડી શકે છે.
