Radhanpur Encroachment Removal: પાટણ જિલ્લાના રાધનપુર શહેરમાં ગેરકાયદેસર બાંધકામો અને દબાણો સામે વહીવટી તંત્ર દ્વારા કડક કાર્યવાહી હાથ ધરવામાં આવી છે. રાજ્ય સરકારની સૂચના મુજબ, સરકારી જમીન પચાવી પાડનારા તત્વો સામે ‘બુલડોઝર’ અભિયાન તેજ બનાવવામાં આવ્યું છે. રાધનપુરના વોર્ડ નંબર 5 માં આવેલા સિટી સર્વે નંબર 1701 ની જમીન પર વર્ષોથી થયેલા બિનઅધિકૃત દબાણોને હટાવવા માટે તંત્રની ટીમ કામે લાગી હતી. આ કાર્યવાહીના ભાગરૂપે મકાનો સહિતના પાકા બાંધકામો તોડી પાડવામાં આવ્યા છે અને લાખોની કિંમતની સરકારી મિલકતને ખુલ્લી કરાવવામાં આવી છે.
5734 ચોરસ મીટર જમીન દબાણમુક્ત કરવામાં આવી
આરોગ્ય અને મહેસૂલ વિભાગના સંકલન સાથે કરવામાં આવેલી આ કામગીરીમાં કુલ 5734 ચોરસ મીટર જેટલી વિશાળ જમીન દબાણમુક્ત કરવામાં આવી છે. તંત્રના જણાવ્યા અનુસાર, આ જમીન પર અનેક વર્ષોથી ગેરકાયદેસર રીતે મકાનો બનાવીને રહેઠાણ જમાવવામાં આવ્યું હતું. સિટી સર્વેના ચોપડે આ જમીન સરકારી હોવા છતાં ખાનગી વ્યક્તિઓએ તેનો ઉપયોગ કર્યો હતો. લાંબા સમયની કાયદાકીય પ્રક્રિયા બાદ, આખરે ભારે પોલીસ બંદોબસ્ત સાથે તંત્રએ અહીં તોડફોડ શરૂ કરી હતી અને સરકારી માલિકીની જમીન પર પોતાનો કબજો પરત મેળવ્યો છે.
તંત્રનો નોટિસનો દાવો અને સ્થાનિકોનો આક્રોશ
આ કાર્યવાહી દરમિયાન સ્થળ પર ભારે હોબાળો અને અફરાતફરીનો માહોલ જોવા મળ્યો હતો. તંત્રનો દાવો છે કે દબાણકર્તાઓને આ અંગે અગાઉથી કાયદેસરની નોટિસ આપવામાં આવી હતી અને તેમને સ્વેચ્છાએ દબાણ હટાવવા માટે પૂરતો સમય પણ અપાયો હતો. જોકે, બીજી તરફ સ્થાનિકોએ ગંભીર આરોપ લગાવ્યા છે કે તેમને કોઈ પણ પ્રકારની આગોતરી જાણ કર્યા વગર જ સીધા બુલડોઝર ફેરવી દેવામાં આવ્યા છે. અંદાજે 40 વર્ષથી ત્યાં રહેતા પરિવારોએ રોષ સાથે જણાવ્યું હતું કે, અચાનક મકાનો તોડી પાડતા તેઓ રસ્તા પર આવી ગયા છે અને હવે તેમના બાળકોને લઈને ક્યાં જવું તે મોટો પ્રશ્ન છે.
મકાનો તોડી પાડવાની આ કાર્યવાહીથી અસરગ્રસ્ત થયેલા પરિવારોમાં અત્યારે ભારે શોક અને ચિંતાની લાગણી છે. સ્થાનિકોનું કહેવું છે કે સરકાર એક તરફ આવાસની યોજનાઓ ચલાવે છે અને બીજી તરફ દાયકાઓથી રહેતા ગરીબ પરિવારોના છત છીનવી રહી છે. રડતા અવાજે એક મહિલાએ વિનંતી કરી હતી કે સરકાર તેમને રહેવા માટે કોઈ વૈકલ્પિક વ્યવસ્થા કરી આપે, જેથી તેઓ પોતાના પરિવાર સાથે સુરક્ષિત રહી શકે. હાલમાં રાધનપુરમાં આ ઘટનાને લઈને મિશ્ર પ્રતિસાદ જોવા મળી રહ્યો છે; કેટલાક લોકો તેને કાયદાનું પાલન ગણાવી રહ્યા છે, જ્યારે કેટલાક લોકો તેને માનવીય દ્રષ્ટિકોણથી અયોગ્ય ગણાવી રહ્યા છે.
