Rushikesh Patel Statement on Vikram Thakor Controversy : ગુજરાત વિધાનસભાની કાર્યવાહી નિહાળવા માટે રાજ્યભરના જાણીતા કલાકારોને આમંત્રિત કરવામાં આવ્યા હતા. આ કાર્યક્રમમાં અનેક જાણીતા ગાયક અને કલાકારોને બોલાવવામાં આવ્યા હતા, પરંતુ ઠાકોર સમાજના કલાકારોને આમંત્રણ ન મળતાં ગુજરાતી ફિલ્મ સ્ટાર વિક્રમ ઠાકોર નારાજ થયા હતા.
આ મામલે સરકારની પ્રથમ પ્રતિક્રિયા સામે આવી છે. ગુજરાત સરકારના પ્રવક્તા ઋષિકેશ પટેલે સ્પષ્ટતા કરતાં જણાવ્યું કે, “કલાકારોની કોઇ જાતિ હોત નથી. આ કાર્યક્રમ અચાનક આયોજન કરાયું હતું અને શક્ય છે કે અમુક કલાકારો યાદ ન રહ્યા હોય.”
ભાજપ સાંસ્કૃતિક સેલે પણ સ્નેહભર્યું નિવેદન આપ્યું
આ અંગે ભાજપના સાંસ્કૃતિક સેલ દ્વારા પણ નિવેદન આપવામાં આવ્યું, જેમાં સ્પષ્ટતા કરવામાં આવી કે, “આ કાર્યક્રમ સરકાર દ્વારા આયોજિત નહોતો, પણ વ્યક્તિગત સંબંધોના આધારે કેટલાક કલાકારોને આમંત્રણ આપવામાં આવ્યું હતું.”
વિક્રમ ઠાકોરે નારાજગી જાહેર કરી
વિક્રમ ઠાકોરે પત્રકાર પરિષદમાં પોતાની નારાજગી વ્યક્ત કરતા જણાવ્યું કે, “વિધાનસભામાં કલાકારોને બોલાવવામાં આવ્યા એનો વિરોધ નથી, પરંતુ અમારા ઠાકોર સમાજના કલાકારોને સ્થાન ન મળ્યું એ દુઃખદ છે.”
તેમણે ઉમેર્યું કે, “સરકાર દ્વારા અમારી જાતિ વિશેષની અવગણના થાય છે. વિધાનસભા અથવા અન્ય સરકારી કાર્યક્રમોમાં ઠાકોર સમાજના કલાકારોને અવગણવામાં આવે છે, જે યોગ્ય નથી.”
વિક્રમ ઠાકોરે ખાસ દાવો કર્યો કે, “મને આમંત્રણ મળ્યું હોત કે નહીં એ મહત્વનું નથી, પણ ઠાકોર સમાજના કલાકારોને પણ સ્થાન મળવું જોઈએ.”
અલ્પેશ ઠાકોર અને ગેનીબેનનું સમર્થન
આ મુદ્દે ઠાકોર સમાજના નેતા અલ્પેશ ઠાકોર અને સાંસદ ગેનીબેન વિક્રમ ઠાકોરના સમર્થનમાં આવ્યા છે. તેમણે પણ ઠાકોર સમાજના કલાકારો માટે ન્યાય માંગ્યો છે.
વિક્રમ ઠાકોરે જણાવ્યું કે, “અલ્પેશભાઈ ઠાકોરે મારા સાથે વાત કરી હતી અને તેઓ પણ સમર્થનમાં છે. ગેનીબેને પણ આ મુદ્દે મારી સાથે સહમતી દર્શાવી છે. ઠાકોર સમાજના કલાકારોને સરકારી માન્યતા અને સ્ટેજ મળવી જોઈએ.”
“તમને સુપરસ્ટાર માનો છે, પણ સરકાર નથી માનતી” – વિક્રમ ઠાકોર
વિધાયકો અને મંત્રીઓની હાજરીમાં કલાકારોના સન્માનના કાર્યક્રમમાં આમંત્રણ ન મળતા વિક્રમ ઠાકોરે વ્યંગાત્મક પ્રતિક્રિયા આપતા કહ્યું, “તમને હું સુપરસ્ટાર લાગું છું, પણ સરકાર મને એ રીતે ન ગણે.”
તેમણે કહ્યું, “મેં ક્યારેય આમંત્રણની માગણી કરી નથી, પણ મારા સમાજના નાના કલાકારો માટે અવકાશ મળવું જોઈએ. જો ઠાકોર સમાજના કલાકારોને સરકારી કામ નહીં મળે, તો તેઓ શું કરશે?”
મૂળ મુદ્દો શું છે?
ગુજરાત વિધાનસભાની મુલાકાત માટે ગીતા રબારી, કિંજલ દવે, માયાભાઈ આહીર, રાજભા ગઢવી, કિર્તીદાન ગઢવી સહિતના જાણીતા કલાકારોને આમંત્રણ આપવામાં આવ્યું હતું. જોકે, ઠાકોર સમાજના કોઈ કલાકારોને આમંત્રણ ન મળતા વિક્રમ ઠાકોરે વિરોધ નોંધાવ્યો હતો.
વિક્રમ ઠાકોરે કહ્યું કે, “મારા સમાજના કોઈ કલાકારોને બોલાવાયું નહી, જે આપત્તિજનક છે. હું ધારાસભ્યોને વિનંતી કરું છું કે આવું ફરી ન થાય.”
તેમણે વધુમાં ઉમેર્યું કે, “હું કોઈ પક્ષ માટે નથી બોલતો, પણ માત્ર એટલી માંગણી છે કે દરેક સમાજના કલાકારોને સમાન સન્માન મળે.”
સરકારનો અંતિમ જવાબ – “આયોજન અચાનક હતું, ભૂલ થઇ હશે”
વિષયને સમાપ્ત કરતાં સરકાર તરફથી કહેવામાં આવ્યું કે, “આ આખું આયોજન તાત્કાલિક હતું, તમામ કલાકારોને યાદ કરી શક્યા નહીં. આવું ફરી ન થાય તે માટે ધ્યાન રાખીશું.”
આ પ્રતિક્રિયાથી વિક્રમ ઠાકોર અને તેમના સમર્થકો સંતોષ માને છે કે નહીં તે જોવું રહ્યું!
