સુરતઃ ‘જેને તમે બચાવી શકો તેને બચાવો’, VR મોલને ધમકીભર્યો મેલ મળ્યો
પોલીસે સુરતના સૌથી મોટા VR મોલને ખાલી કરાવ્યો છે. મોલમાં બોમ્બ બ્લાસ્ટની ધમકી મળ્યા બાદ પોલીસ તરત જ એક્શન મોડમાં આવી ગઈ હતી. સુરત VR મોલને એક મેઈલ મળ્યો હતો જેમાં લખ્યું હતું કે, ‘જેટલું બચાવી શકો તેટલું બચાવો, તમને બ્લાસ્ટ થશે.’ આ ધમકીભર્યો મેઈલ મળતાની સાથે જ ઉમરા પોલીસ ક્રાઈમ બ્રાન્ચ, એસઓજી અને બોમ્બ સ્કવોડ સાથે ઘટનાસ્થળે પહોંચી ગઈ હતી. મેઈલ મળતાની સાથે જ મેનેજમેન્ટ દ્વારા દરેકને જાણ કરવામાં આવી હતી. જે બાદ બહાર નીકળવા માટે મોલની અંદર લોકોની ભીડ જોવા મળી હતી.
એડિશનલ સીપી કે.એન. ડામોરે કહ્યું, આ મેઈલ આજે ચાર વાગ્યે આવ્યો. જેમાં લખવામાં આવ્યું હતું કે આ મોલમાં બોમ્બ રાખવામાં આવ્યો છે અને તે સવારે વિસ્ફોટ થશે. અમે બધાને મોલમાંથી કાઢી મૂક્યા છે. ક્રાઈમ બ્રાન્ચ, એસઓજી, બોમ્બ સ્કવોડની ટીમ મોલની અંદર તપાસ કરી રહી છે. દેશભરમાં 52 સ્થળોએ બોમ્બ વિસ્ફોટની ધમકી આપતા મેલ મળ્યા છે.
વીઆર મોલમાં કામ કરતા એક યુવકે કહ્યું કે, મેનેજમેન્ટે આવીને અમને કહ્યું કે મોલમાં કોઈએ બોમ્બ રાખ્યો છે, તમે તમારો સ્ટોર બંધ કરી દો. તે સમયે હંગામો થયો હતો, ત્યાં આવેલા ગ્રાહકોને બહાર આવવા માટે કહેવામાં આવ્યું હતું, 10-15 મિનિટમાં પોલીસ આવી ગઈ, ડોગ સ્કવોડ અને બોમ્બ સ્કવોડ પણ આવી ગઈ. મોલની અંદરથી 2 થી 3 હજાર લોકોને બહાર કાઢવામાં આવ્યા છે.
વીઆર મોલમાં ફાયર બ્રિગેડની બે ગાડીઓને સ્ટેન્ડબાય રાખવામાં આવી છે. આ સાથે ફાયર વિભાગના ઉચ્ચ અધિકારીઓ પણ ઘટના સ્થળે પહોંચી ગયા હતા. ફાયર વિભાગ દ્વારા તમામ પ્રકારના સાધનો લાવવામાં આવ્યા છે. કોઈપણ જગ્યાએ મોટી દુર્ઘટના સર્જાય તો જરૂરી તમામ સાધનો અહીં લાવવામાં આવ્યા છે.બોમ્બ ડિટેક્ટરની ત્રણ ટીમ મોલમાં તપાસ કરી રહી છે. ત્રણ કલાકની તપાસ દરમિયાન પોલીસને કોઈ શંકાસ્પદ વસ્તુ મળી ન હતી.
