Covid Vaccine Side Effects India: સુપ્રીમ કોર્ટે કેન્દ્ર સરકારને કોવિડ-19 રસીકરણ પછી થતી ગંભીર આડઅસરો (Side Effects) થી પ્રભાવિત લોકો માટે ‘નો-ફોલ્ટ વળતર નીતિ’ (No-Fault Compensation Policy) તૈયાર કરવાનો નિર્દેશ આપ્યો છે. મંગળવારે જસ્ટિસ વિક્રમ નાથની આગેવાની હેઠળની બેન્ચે જણાવ્યું હતું કે રસીકરણ પછી પ્રતિકૂળ ઘટનાઓ પર દેખરેખ રાખવા માટે જે વર્તમાન વ્યવસ્થા છે તે ચાલુ રહેશે.
કોર્ટે એમ પણ કહ્યું કે આવા કેસો સાથે સંબંધિત આંકડા સમયાંતરે જાહેર કરવામાં આવે, જેવું 2021ના ચુકાદામાં કહેવામાં આવ્યું હતું. અદાલતે સ્પષ્ટ કર્યું કે પ્રતિકૂળ ઘટનાઓની તપાસ માટે અલગથી એક્સપર્ટ કમિટી બનાવવાની જરૂર નથી. સાથે જ ‘નો-ફોલ્ટ વળતર નીતિ’ બનાવવી એ સરકારની ભૂલનો સ્વીકાર ગણવામાં આવશે નહીં. આ ચુકાદો રચના ગંગૂ અને વેણુગોપાલન ગોવિંદનની અરજી પર આવ્યો છે.
આ બંનેનો આરોપ છે કે તેમની પુત્રીઓનું અવસાન કોવિડ વેક્સિનની ખોટી અસરથી થયું હતું. આ મામલામાં કેરળ હાઈકોર્ટના આદેશને પડકારતી કેન્દ્રની અરજી પણ સામેલ હતી. અગાઉ કેન્દ્રએ કહ્યું હતું કે કોવિડ રસીકરણ સ્વૈચ્છિક હતું, તેથી વળતર આપવાની કોઈ જવાબદારી નથી.
પુત્રીઓના મોત પર માંગ્યું હતું વળતર
આ ચુકાદો રચના ગંગૂ અને વેણુગોપાલન ગોવિંદન દ્વારા દાખલ કરવામાં આવેલી રિટ પિટિશન પર આવ્યો છે. અરજદારોનો આરોપ હતો કે તેમની પુત્રીઓના મોત કોવિડ વેક્સિનની આડઅસરને કારણે થયા હતા. તેમણે કોવિડ-19 રસીઓને કારણે થયેલા કથિત મૃત્યુ માટે કેન્દ્ર સરકાર પાસે વળતરની માંગ કરી હતી. સાથે જ તેમણે રસીકરણની આડઅસરોની તપાસ માટે નિષ્ણાત સમિતિની પણ માંગણી કરી હતી.
કેન્દ્રએ દાખલ કરી હતી અલગ અરજી
આ મામલે એક અન્ય અરજી કેન્દ્રએ દાખલ કરી હતી, જેમાં કેરળ હાઈકોર્ટના આદેશને પડકારવામાં આવ્યો હતો. હાઈકોર્ટમાં દાખલ કરવામાં આવેલી અરજીમાં એક મહિલાએ આરોપ લગાવ્યો હતો કે તેના પતિનું મૃત્યુ રસીકરણને કારણે થયું હતું. કેન્દ્રએ કહ્યું હતું કે તે વળતર આપવા માટે બંધાયેલ નથી કારણ કે રસીકરણ સ્વૈચ્છિક હતું.
વ્યાપક સુનાવણી માટે તૈયાર થયું હતું SC
ગયા વર્ષે 13 નવેમ્બરે વિગતવાર દલીલો સાંભળ્યા બાદ જસ્ટિસ વિક્રમ નાથે કહ્યું હતું કે કોર્ટ તમામ રજૂઆતો પર વિચાર કરશે અને સુધારા અરજી (જેમાં રસીકરણ અભિયાન દરમિયાન ડેટા છુપાવવાનો આરોપ મૂકવામાં આવ્યો હતો) ની સાથે સાથે વ્યાપક મુદ્દાઓ પર પણ નિર્ણય લેશે.
