Election Commission Action: પશ્ચિમ બંગાળમાં મતદાર યાદી સઘન પુનરીક્ષણ (SIR) ના કામમાં લાગેલા સાત અધિકારીઓને સસ્પેન્ડ કરવામાં આવ્યા છે. ચૂંટણી પંચે ગંભીર ગેરવર્તણૂકના આરોપી આ અધિકારીઓને તાત્કાલિક અસરથી હટાવી દીધા છે. રાજ્યના મુખ્ય સચિવને શિસ્તભંગના પગલાં લેવા માટે પણ સૂચના આપવામાં આવી છે. દોષિત જાહેર થયેલા તમામ અધિકારીઓ SIR પ્રક્રિયામાં મદદનીશ મતદાર નોંધણી અધિકારી (AERO) તરીકે કાર્યરત હતા. ચૂંટણી પંચે લોકપ્રતિનિધિત્વ અધિનિયમ, 1950 ની કલમ 13CC હેઠળ આ કાર્યવાહી કરી છે.
બૂથ લેવલ ઓફિસર (BLO) અને મતદાર નોંધણી અધિકારીઓ સામાન્ય રીતે રાજ્ય સરકારના કર્મચારીઓ હોય છે, જેમને મતદાર યાદી અપડેટ કરવા અને ચૂંટણી પ્રક્રિયામાં સહકાર માટે પંચમાં ડેપ્યુટેશન પર મોકલવામાં આવે છે.
પંચના આદેશને ટાંકીને અધિકારીઓએ જણાવ્યું કે પશ્ચિમ બંગાળના મુખ્ય સચિવ નંદિની ચક્રવર્તીને સૂચના આપવામાં આવી છે કે સંબંધિત અધિકારીઓ સામે તેમના કેડર કંટ્રોલિંગ ઓથોરિટી દ્વારા વિલંબ કર્યા વગર શિસ્તભંગની કાર્યવાહી શરૂ કરવામાં આવે.
સસ્પેન્ડ કરાયેલા અધિકારીઓની યાદી
ડૉ. સફી ઉર્રહેમાન – AERO, મુર્શિદાબાદ જિલ્લો.
નીતીશ દાસ – મહેસૂલ અધિકારી અને AERO, ફરક્કા.
ડાલિયા રે ચૌધરી – AERO, મૈનાગુડી.
એસકે મુર્શિદ આલમ – ADA અને AERO, સૂતી બ્લોક.
સત્યજીત દાસ – સંયુક્ત BDO અને AERO, કેનિંગ પુરબો.
જોયદીપ કુંડુ – FEO અને AERO, કેનિંગ પુરબો.
દેબાશીષ બિસ્વાસ – સંયુક્ત BDO અને AERO, ડેબરા.
