નવી દિલ્હી, 5 ફેબ્રુઆરી: પ્રધાનમંત્રી ગતિ શક્તિ અને રાષ્ટ્રીય લોજિસ્ટિક્સ નીતિ જેવી પહેલ દ્વારા મજબૂત માળખાગત સુવિધાઓનો વિકાસ ભારતને 2030 સુધીમાં વિશ્વ બેંક લોજિસ્ટિક્સ પર્ફોર્મન્સ ઇન્ડેક્સમાં ટોચના 25 દેશોમાં સ્થાન મેળવવામાં મદદ કરશે. એક રિપોર્ટમાં આ અંદાજ લગાવવામાં આવ્યો છે.
વિશ્વ બેંક લોજિસ્ટિક્સ પર્ફોર્મન્સ ઇન્ડેક્સ (LPI) માં ભારત 139 દેશોમાંથી 38મા ક્રમે છે અને 2030 સુધીમાં ટોચના 25 દેશોમાં સ્થાન મેળવવાનું લક્ષ્ય રાખે છે.
EAC ઇન્ટરનેશનલ કન્સલ્ટિંગ સાથે ભાગીદારીમાં વૈશ્વિક પ્રદર્શક મેસ્સે સ્ટુટગાર્ટ ઇન્ડિયા દ્વારા હાથ ધરવામાં આવેલ આ અભ્યાસ મંગળવારે આંતરરાષ્ટ્રીય લોજિસ્ટિક્સ પ્રદર્શન લોગીમેટ ઇન્ડિયા-2025 પહેલા પ્રકાશિત કરવામાં આવ્યો હતો. આ પ્રદર્શન ૧૩-૧૫ ફેબ્રુઆરી દરમિયાન બોમ્બે એક્ઝિબિશન સેન્ટર ખાતે યોજાવાનું છે.
આ અહેવાલમાં ભાર મૂકવામાં આવ્યો છે કે પ્રધાનમંત્રી ગતિશક્તિ યોજના અને રાષ્ટ્રીય લોજિસ્ટિક્સ નીતિ જેવી પહેલ હેઠળ મજબૂત માળખાગત વિકાસ 2030 સુધીમાં વિશ્વ બેંકના લોજિસ્ટિક્સ પર્ફોર્મન્સ ઇન્ડેક્સ (LPI) માં ટોચના 25 દેશોમાં સ્થાન મેળવવાના ભારતના લક્ષ્યને પ્રાપ્ત કરવામાં મુખ્ય ભૂમિકા ભજવશે.
ભારતીય માલસામાન અને લોજિસ્ટિક્સ બજાર વાર્ષિક 8.8 ટકાના દરે વૃદ્ધિ પામીને 2029 સુધીમાં US$484.43 બિલિયન સુધી પહોંચવાનો અંદાજ છે, જે 2024 માં US$317.26 બિલિયન હતું.
