23 દેશોના પ્રતિનિધિઓની હાજરીમાં ‘ગ્રુપ ઑફ ફ્રેન્ડ્સ’ની પ્રથમ બેઠક, નાગરિક જહાજો પરના હુમલા રોકવા એકતાની અપીલ
India Liberia Shipping Safety: ભારતે લાઇબેરિયા સાથે મળીને ‘શિપિંગ અને નાવિકોની સુરક્ષા’ પર ‘ગ્રુપ ઑફ ફ્રેન્ડ્સ’ બનાવવા માટે હાથ મિલાવ્યો. સંયુક્ત રાષ્ટ્ર મહાસભા દરમિયાન યોજાયેલી પ્રથમ બેઠકમાં વિદેશ મંત્રી S. જયશંકરે કહ્યું કે દરિયાઈ વેપારમાં અવરોધ ઊભો કરનારા અને નિર્દોષ લોકોના જીવ લેનારા કૃત્યોને કોઈપણ રીતે યોગ્ય ઠેરવી શકાય નહીં.
આ બેઠકમાં રશિયા, જર્મની અને જાપાન સહિત 23 અન્ય દેશોના વિદેશ મંત્રીઓ અને વરિષ્ઠ રાજદ્વારીઓએ ભાગ લીધો. તેમણે કહ્યું કે અમે અહીં આ ખતરનાક પ્રવૃત્તિને ઉજાગર કરવા માટે નહીં, પરંતુ આંતરરાષ્ટ્રીય સમુદાયને એકસાથે આવવા અને આવા હુમલાઓ રોકવા માટે અપીલ કરવા માટે આવ્યા છીએ.
PM મોદીના પ્રસ્તાવનો કર્યો ઉલ્લેખ
તેમણે તાજેતરમાં BRICS શિખર સંમેલનમાં PM નરેન્દ્ર મોદીના તે પ્રસ્તાવનો પણ ઉલ્લેખ કર્યો, જેમાં જરૂરિયાતમંદ નાવિકોની મદદ માટે ‘નાવિક ઇમરજન્સી સહાયતા નેટવર્ક’ બનાવવાની વાત કરવામાં આવી હતી.
S. જયશંકરે જણાવ્યું ‘ગ્રુપ ઑફ ફ્રેન્ડ્સ’નો લાભ
જયશંકરે જણાવ્યું કે ‘ગ્રુપ ઑફ ફ્રેન્ડ્સ’માં જહાજોના માલિક એવા મુખ્ય સભ્ય દેશો, સૌથી વધુ જહાજોની નોંધણી ધરાવતા દેશો અને સૌથી વધુ નાવિકો ઉપલબ્ધ કરાવતા દેશો સામેલ છે. નાગરિક જહાજો પરના હુમલાઓ અંગે ચિંતા વ્યક્ત કરતાં તેમણે કહ્યું કે મજબૂત આંતરરાષ્ટ્રીય સહયોગની જરૂર છે.
તાજેતરમાં બંને દેશો વચ્ચે અનેક કરારો પણ થયા
જણાવી દઈએ કે તાજેતરમાં લાઇબેરિયાની સેન્ટ્રલ એગ્રીકલ્ચરલ રિસર્ચ ઇન્સ્ટિટ્યૂટ અને ભારતીય કૃષિ સંશોધન પરિષદ (ICAR) વચ્ચે કૃષિ સંશોધન અને ખાદ્ય સુરક્ષાને પ્રોત્સાહન આપવા માટે પણ કરાર થયો હતો. આ ઉપરાંત બંને દેશો ટેક્નોલોજી, નવીનીકરણીય ઊર્જા અને આરોગ્ય ક્ષેત્રે પરસ્પર સહયોગ સતત વધારી રહ્યા છે. ભારતીય કંપનીઓ લાઇબેરિયાના ખનન અને માળખાગત વિકાસ પર પણ કામ કરી રહી છે.
