Jaishankar Russia Visit: વિદેશ મંત્રી એસ. જયશંકર ત્રણ દિવસની રશિયાની મુલાકાતે આવશે. આ મુલાકાતની માહિતી એવા સમયે સામે આવી છે જ્યારે રશિયાના રાષ્ટ્રપતિ વ્લાદિમીર પુતિને એક દિવસ પહેલા જ વડાપ્રધાન નરેન્દ્ર મોદી સાથે ફોન પર વાત કરી હતી. પુતિને પીએમ મોદીને અલાસ્કામાં અમેરિકન રાષ્ટ્રપતિ ડોનાલ્ડ ટ્રમ્પ સાથેની તેમની મુલાકાત વિશે માહિતી આપી હતી.
દરમિયાન, વિદેશ મંત્રાલયે જણાવ્યું હતું કે રશિયાના પ્રથમ નાયબ વડા પ્રધાન ડેનિસ મન્ટુરોવના આમંત્રણ પર, વિદેશ પ્રધાન ડૉ. એસ. જયશંકર 19-21 ઓગસ્ટ 2025 દરમિયાન રશિયાની સત્તાવાર મુલાકાત લેશે અને 20 ઓગસ્ટના રોજ નિર્ધારિત IRIGC-TEC ના 26મા સત્રની સહ-અધ્યક્ષતા કરશે. વિદેશ પ્રધાન મોસ્કોમાં ભારત-રશિયા બિઝનેસ ફોરમની બેઠકને સંબોધિત કરશે.
વિદેશ મંત્રાલયના જણાવ્યા અનુસાર, આ મુલાકાત દરમિયાન, વિદેશ પ્રધાન રશિયન ફેડરેશનના વિદેશ પ્રધાન સેરગેઈ લવરોવને પણ મળશે. તેઓ દ્વિપક્ષીય કાર્યસૂચિની સમીક્ષા કરશે. બંને પ્રાદેશિક અને વૈશ્વિક મુદ્દાઓ પર પોતાના વિચારો શેર કરશે.