અગાઉના નાણાકીય વર્ષ 2023-24ના સમાન સમયગાળામાં નેટ ડાયરેક્ટ ટેક્સ કલેક્શન રૂ. 4.80 લાખ કરોડ હતું.
અર્થવ્યવસ્થાના મોરચે સારા સમાચાર આવ્યા છે. ચાલુ નાણાકીય વર્ષ 2024-25ના સંપૂર્ણ બજેટ પહેલા કેન્દ્ર સરકારની તિજોરી ભરાઈ ગઈ છે. નેટ ડાયરેક્ટ ટેક્સ કલેક્શન અત્યાર સુધીમાં 24.07 ટકા વધીને રૂ. 5.74 લાખ કરોડ થયું છે. અગાઉના નાણાકીય વર્ષ 2023-24ના સમાન સમયગાળામાં નેટ ડાયરેક્ટ ટેક્સ કલેક્શન રૂ. 4.80 લાખ કરોડ હતું.
સેન્ટ્રલ બોર્ડ ઓફ ડાયરેક્ટ ટેક્સિસ (CBDT) દ્વારા જારી કરવામાં આવેલા આંકડા અનુસાર, 11 જુલાઈ, 2024 સુધી નેટ ડાયરેક્ટ ટેક્સ કલેક્શન 24.07 ટકા વધીને 5.74 લાખ કરોડ રૂપિયા થઈ ગયું છે. અગાઉ, અગાઉના નાણાકીય વર્ષ 2023-24ના સમાન સમયગાળામાં, નેટ ડાયરેક્ટ ટેક્સ કલેક્શન રૂ. 4.80 લાખ કરોડ હતું. CBDT મુજબ, તેમાં રૂ. 2.1 લાખ કરોડનો કોર્પોરેટ ટેક્સ અને રૂ. 3.46 લાખ કરોડનો વ્યક્તિગત આવકવેરો સામેલ છે. વ્યક્તિગત આવકવેરાના આંકડાઓમાં સિક્યોરિટીઝ ટ્રાન્ઝેક્શન ટેક્સ (STT)ની આવકનો પણ સમાવેશ થાય છે.
સીબીડીટીએ જણાવ્યું કે જૂન મહિનામાં રિફંડના એડજસ્ટમેન્ટ બાદ ડાયરેક્ટ ટેક્સ કલેક્શન રૂ. 4.62 લાખ કરોડ થયું છે, જે વાર્ષિક ધોરણે 20.99 ટકાનો વધારો છે. જેમાં રૂ. 1.8 લાખ કરોડનો કોર્પોરેટ ટેક્સ અને રૂ. 2.81 કરોડનો વ્યક્તિગત આવકવેરો સામેલ છે.
ઉલ્લેખનીય છે કે સંસદનું બજેટ સત્ર 22 જુલાઈ 2024થી શરૂ થઈ રહ્યું છે. નાણામંત્રી નિર્મલા સીતારમણ બજેટ સત્રના બીજા દિવસે 23 જુલાઈએ લોકસભામાં 2024-25નું સંપૂર્ણ બજેટ રજૂ કરવા જઈ રહ્યા છે.
