PM Modi Mann Ki Baat: વડાપ્રધાન નરેન્દ્ર મોદીએ રવિવારે નવેમ્બર મહિનામાં દેશની ‘મોટી ઉપલબ્ધિઓ’ ની વાત કરી. તેમણે કહ્યું કે આ સિદ્ધિઓથી લોકોને ઘણી પ્રેરણા મળી છે. તેમના માસિક રેડિયો કાર્યક્રમ ‘મન કી બાત’ના ૧૨૮મા એપિસોડ માં વડાપ્રધાન મોદીએ કહ્યું કે, “નવેમ્બરનો મહિનો ખૂબ જ પ્રેરણા લઈને આવ્યો. થોડા દિવસો પહેલાં જ ૨૬ નવેમ્બરના રોજ ‘સંવિધાન દિવસ’ પર સેન્ટ્રલ હૉલમાં વિશેષ કાર્યક્રમનું આયોજન થયું.”
પીએમ મોદીએ કહ્યું કે ‘વંદે માતરમ્’ના ૧૫૦ વર્ષ પૂરા થવા પર આખા દેશમાં યોજાનારા કાર્યક્રમોની શાનદાર શરૂઆત થઈ. ૨૫ નવેમ્બરના રોજ અયોધ્યામાં રામ મંદિર પર ધર્મધ્વજાનું આરોહણ થયું. આ જ દિવસે કુરુક્ષેત્રના જ્યોતિસર ખાતે પાંચજન્ય સ્મારકનું લોકાર્પણ થયું. તેમણે હૈદરાબાદમાં દુનિયાની સૌથી મોટી લીપ એન્જિન ‘MRO ફેસિલિટી’ ની પ્રશંસા કરી અને કહ્યું કે ભારતે એરક્રાફ્ટના મેન્ટેનન્સ, રિપેર અને ઓવરહૉલ સેક્ટરમાં એક મોટું પગલું ભર્યું છે.
વડાપ્રધાન મોદીએ ભારતીય નૌસેનામાં ‘આઇએનએસ માહે’ ના સમાવેશ થવા અને સ્કાઇરૂટના ઇન્ફિનિટી કેમ્પસનો પણ ઉલ્લેખ કર્યો. તેમણે કહ્યું કે આ ઉપલબ્ધિઓ ‘ભારતની નવી વિચારસરણી, ઇનોવેશન અને યુવા શક્તિની ઝલક બની ગઈ છે’. કૃષિ ક્ષેત્રનો ઉલ્લેખ કરતાં પીએમ મોદીએ કહ્યું કે ભારતે ૩૫૭ મિલિયન ટન ના ખાદ્યાન્ન ઉત્પાદન સાથે એક ઐતિહાસિક રેકોર્ડ બનાવ્યો છે. ૧૦ વર્ષ પહેલાંની તુલનામાં ભારતનું ખાદ્યાન્ન ઉત્પાદન ૧૦૦ મિલિયન ટન વધુ વધ્યું છે.
પીએમ મોદીએ આગળ કહ્યું કે, “રમતોની દુનિયામાં પણ ભારતનો પરચમ લહેરાયો છે.” થોડા દિવસો પહેલાં જ ભારતને કૉમનવેલ્થ રમતોની યજમાની નું પણ એલાન થયું. આ ઉપલબ્ધિઓ દેશની છે, દેશવાસીઓની છે. વડાપ્રધાન મોદીએ કહ્યું કે ‘મન કી બાત’ દેશના લોકોની આવી ઉપલબ્ધિઓને, લોકોના સામૂહિક પ્રયાસોને જન-સામાન્યની સામે લાવવા માટેનું, એક ઉત્તમ મંચ છે.
