India vs West Indies T20: ભારત અને વેસ્ટ ઇન્ડિઝ વચ્ચે T20 શ્રેણીની અંતિમ મેચ બેંગલુરુના એમ ચિન્નાસ્વામી સ્ટેડિયમમાં રમાવાની છે. આ શ્રેણીની સૌથી નિર્ણાયક મેચ હશે. પાંચ મેચની શ્રેણી 2-2થી બરાબર છે. બેંગલુરુમાં ભારતે પોતાની છેલ્લી T20 આંતરરાષ્ટ્રીય મેચ 2024માં રમી હતી. ટીમનો મુકાબલો અફઘાનિસ્તાન સામે થયો હતો. એ મેચ જીતવા માટે રોહિત શર્માની કપ્તાની હેઠળની ભારતીય ટીમને ભારે સંઘર્ષ કરવો પડ્યો હતો.
બે સુપર ઓવર બાદ પરિણામ આવ્યું
ભારતીય ટીમે પ્રથમ બેટિંગ કરતાં ચાર વિકેટે 212 રન બનાવ્યા હતા. પાંચમી ઓવરમાં 22 રનમાં ચાર વિકેટ પડી ચૂકી હતી. ત્યાર બાદ કેપ્ટન રોહિત શર્માએ સદી ફટકારી અને 121 રન બનાવીને અણનમ રહ્યા હતા. જ્યારે રિંકુ સિંહે 69 રનની ઇનિંગ રમી હતી. બંને વચ્ચે 190 રનની અણનમ ભાગીદારી થઈ હતી.
અફઘાનિસ્તાને પણ શાનદાર બેટિંગ કરી હતી. રહમાનુલ્લાહ ગુરબાઝની સાથે કેપ્ટન ઇબ્રાહિમ ઝદરાન અને ગુલબદિન નાયબે અડધી સદી ફટકારી હતી. છેલ્લી બોલ પર અફઘાનિસ્તાનને જીતવા માટે ત્રણ રનની જરૂર હતી. તેના બેટ્સમેનો માત્ર બે રન લઈ શક્યા અને મેચ ટાઈ થઈ ગઈ.
અફઘાનિસ્તાને પ્રથમ સુપર ઓવરમાં 16 રન બનાવ્યા હતા. રોહિત શર્માએ બે છગ્ગા ફટકાર્યા, પરંતુ ભારતીય ટીમ પણ 16 રન સુધી જ પહોંચી શકી હતી. બીજી સુપર ઓવરમાં ભારતે પહેલાં બેટિંગ કરી હતી. ટીમે કુલ 11 રન બનાવ્યા હતા અને આ તમામ રન રોહિત શર્માના બેટમાંથી આવ્યા હતા. લેગ સ્પિનર રવિ બિશ્નોઈએ ત્રણ બોલમાં એક રન આપીને બે વિકેટ લીધી હતી અને ભારતીય ટીમને જીત અપાવી હતી.
બેંગલુરુની પીચ બેટ્સમેનો માટે સ્વર્ગ સમાન
બેંગલુરુના એમ ચિન્નાસ્વામી સ્ટેડિયમની પીચ હંમેશાં બેટિંગ માટે અનુકૂળ રહી છે. IPL 2026ની વાત કરીએ તો અહીં પાંચ મેચ રમાઈ હતી. તેમાં ટીમોએ છ વખત 200થી વધુનો સ્કોર બનાવ્યો હતો. બે વખત 200થી વધુના લક્ષ્યાંકનો પીછો કરીને પણ જીત મેળવી હતી. અહીં સૌથી મોટો સ્કોર 250 રનનો રહ્યો હતો. અહીંની બાઉન્ડરી પણ ઘણી નાની છે અને આ જ કારણથી બોલરોને સંઘર્ષ કરવો પડે છે.
