AI Privacy Confer: Signal ના ફાઉન્ડર Moxie Marlinspike એ AI ચેટબોટ્સની પ્રાઈવસીને લઈને ઉઠી રહેલી ચિંતાઓ વચ્ચે એક નવી સર્વિસ Confer રજૂ કરી છે. આ ચેટબોટ તે યુઝર્સ માટે બનાવવામાં આવ્યો છે જેઓ AI સાથે વાતચીત તો કરવા માંગે છે, પરંતુ એવું નથી ઈચ્છતા કે તેમની વાતો કંપનીઓના સર્વર પર વંચાય અથવા ભવિષ્યમાં તેમની વિરુદ્ધ ઉપયોગમાં લેવાય. Marlinspike ના જણાવ્યા મુજબ, “Confer એવી સર્વિસ છે જ્યાં તમે તમારા આઈડિયાઝ પર કામ કરી શકો છો, એ ડર વગર કે એક દિવસ એ જ વાતો તમારી વિરુદ્ધ વાપરવામાં આવશે.”
સામાન્ય રીતે OpenAI, Google, Meta અને Anthropic જેવા AI પ્રોવાઈડર્સના ચેટબોટ્સમાં કરવામાં આવેલી વાતચીત સર્વર સુધી જાય છે. ભલે કંપનીઓ એવો દાવો કરે કે ડેટાનો આગળ મોડલ ટ્રેનિંગમાં ઉપયોગ કરવામાં નથી આવી રહ્યો, પરંતુ અનેક રિપોર્ટ્સ દાવો કરી ચૂક્યા છે કે વાતચીત એન્ડ-ટુ-એન્ડ એન્ક્રિપ્ટેડ હોતી નથી, કારણ કે જરૂર પડ્યે પ્રોવાઈડર્સ આ ચેટ્સ વાંચી શકે છે. Confer નો દાવો છે કે તે આ જ મોડલને બદલે છે. આ સર્વિસનો ઉપયોગ કરવા માટે યુઝરે પહેલા રજિસ્ટ્રેશન કરવું પડે છે અને એક passkey બનાવવી પડે છે, જેને Face ID, ફિંગરપ્રિન્ટ અથવા ડિવાઈસ PIN થી સુરક્ષિત કરી શકાય છે.
પ્લેટફોર્મ મુજબ, ત્યારપછી બનતી તમામ ક્રિપ્ટોગ્રાફિક keys ડિવાઈસ પર જ રહે છે અને સર્વર સુધી નથી જતી. એટલે કે ચેટ રિક્વેસ્ટ લોકલી એન્ક્રિપ્ટ થાય છે અને Confer પોતે પણ તેને જોઈ શકતું નથી.
જોકે, AI મોડલને ચલાવવા માટે સર્વર અને GPU ની જરૂર હોય છે અને ત્યાં કોઈને કોઈનો એક્સેસ હોય જ છે. આ જ સમસ્યાના ઉકેલ માટે Confer એ કથિત રીતે Confidential Computing અને Trusted Execution Environment (TEE) નો સહારો લીધો છે. આમાં AI કોડ એક હાર્ડવેર-લેવલ આઈસોલેટેડ એન્વાયરમેન્ટમાં રન થાય છે. કંપનીએ તેનો સોર્સ કોડ GitHub પર પબ્લિક પણ કર્યો છે, જેથી તેને ટ્રાન્સપરન્ટ રાખી શકાય.
હાલમાં એ સ્પષ્ટ નથી કે Confer કયા AI મોડલનો ઉપયોગ કરે છે. એવું માનવામાં આવે છે કે તે કોઈ ઓપન-સોર્સ મોડલ પર આધારિત હોઈ શકે છે, જેમ કે Meta નું Llama, Google નું Gemma અથવા ફ્રાન્સની કંપની Mistral ના મોડલ્સ.
પોતાની બ્લોગ પોસ્ટમાં Marlinspike એ AI ચેટબોટ્સને લઈને એક બીજી મોટી ચેતવણી પણ આપી છે. તેમનું કહેવું છે કે યુઝર્સ અજાણતામાં પોતાના સૌથી પર્સનલ વિચારો AI સાથે શેર કરી દે છે, જેને કંપનીઓ સ્ટોર કરે છે, તેમાંથી કમાણી કરે છે અને આગળ જઈને જાહેરાતો માટે ઉપયોગ કરી શકે છે. તેમણે એવો પણ ઈશારો કર્યો કે ભવિષ્યમાં AI ચેટબોટ્સ યુઝરની વિચારસરણી, ડર અને આદતોના આધારે પર્સનલાઈઝ્ડ એડ્સ (જાહેરાતો) પુશ કરી શકે છે. Marlinspike એ આની તુલના “થેરાપિસ્ટને પૈસા આપીને કોઈને મનાવવા” જેવી સ્થિતિ સાથે કરી છે.
આ ઉપરાંત તેમણે એવી આશંકા પણ વ્યક્ત કરી છે કે માત્ર કંપનીઓ જ નહીં, પરંતુ સરકારી એજન્સીઓ અને લો એન્ફોર્સમેન્ટ પણ આ વાતચીતો સુધી પહોંચ બનાવી શકે છે. તેમના શબ્દોમાં, “તમને જવાબ મળે છે, પણ તેમને બધું જ મળી જાય છે.”
