Mozilla Firefox Security Alert: શુ તમે પણ ઇન્ટરનેટ ચલાવવા માટે Mozilla Firefox બ્રાઉઝરનો ઉપયોગ કરો છો? જો હા, તો સરકારની સાયબર સુરક્ષા એજન્સી CERT-In એ તમારા જેવા તમામ યુઝર્સ માટે હાઇ સિક્યોરિટી એલર્ટ જાહેર કર્યું છે. અહેવાલો અનુસાર Mozilla Firefox બ્રાઉઝરના કેટલાક વર્ઝનમાં એવી ગંભીર ખામીઓ જોવા મળી છે, જેનો ફાયદો ઉઠાવીને હેકર્સ તમારા કોમ્પ્યુટર કે ફોનમાં ઘૂસણખોરી કરી શકે છે. થોડા સમય પહેલા આ સરકારી સંસ્થા દ્વારા એન્ડ્રોઇડ અને એપલ યુઝર્સને પણ ચેતવણી આપવામાં આવી હતી. હવે તમારી પ્રાઈવસી અને ડેટાની સુરક્ષા માટે સરકારે તાત્કાલિક કેટલાક પગલાં ભરવાની સલાહ આપી છે.
Mozilla Firefox બ્રાઉઝર ચલાવનારાઓને શું છે ખતરો?
CERT-In મુજબ, મોઝિલાના પ્રોડક્ટ્સમાં મલ્ટિપલ વલ્નરેબિલિટી એટલે કે અનેક સુરક્ષા ખામીઓ જોવા મળી છે. આ ખામીઓનો ફાયદો ઉઠાવીને હેકર્સ તમારા સિસ્ટમને દૂર બેઠા પણ એક્સેસ કરી શકે છે. આ માટે Mozilla Firefox ના યુઝર્સને હેકર્સ ખાસ પ્રકારની વેબ રિક્વેસ્ટ કે લિંક મોકલી શકે છે. આના પર ક્લિક કરતા જ યુઝરનો તમામ ડેટા ચોરી થઈ શકે છે. ચિંતાની વાત એ છે કે આવો જ ખતરો ઇમેઇલ ક્લાયન્ટ થન્ડરબર્ડ (Thunderbird) પર પણ મંડરાઈ રહ્યો છે, જ્યાં હેકર્સ એન્ક્રિપ્ટેડ ઇમેઇલમાંથી પણ વિગતો કાઢી શકે છે. આવા સમયે જો તમે તમારું બ્રાઉઝર અપડેટ નથી કર્યું, તો તમારી બેંકિંગ વિગતો અને પાસવર્ડ જોખમમાં મુકાઈ શકે છે.
કયા વર્ઝન જોખમમાં છે?
અહેવાલો મુજબ, સરકારે સ્પષ્ટ કર્યું છે કે સૌથી વધુ ખતરો તે યુઝર્સને છે જેઓ Mozilla Firefox કે થન્ડરબર્ડના જૂના વર્ઝન વાપરી રહ્યા છે. જો તમારા કોઈપણ ડિવાઇસમાં Mozilla Firefox ના 147.0.2 થી જૂનું કોઈ પણ વર્ઝન મોજૂદ છે, તો તેને તરત જ અપડેટ કરો. આવું ન કરવા પર તમે હેકર્સને તમારો ડેટા ચોરી કરવાનું ખુલ્લું આમંત્રણ આપી રહ્યા હશો. તેવી જ રીતે, Mozilla Thunderbird વર્ઝન 140.7.1 અને 147.0.1 થી જૂના વર્ઝન ચલાવતા યુઝર્સને પણ તાત્કાલિક એલર્ટ થવાની જરૂર છે. સરકારે આ તમામ વર્ઝનને હાઈ રિસ્ક કેટેગરીમાં રાખ્યા છે. હેકર્સ એન્ટી-ટ્રેકિંગ અને લેઆઉટ સ્ક્રોલિંગ જેવા કમ્પોનન્ટ્સની ખામીઓનો ફાયદો ઉઠાવીને તમારા સિસ્ટમને ક્રેશ પણ કરી શકે છે.
સરકારે જણાવ્યું આવી રીતે રાખો પોતાને સુરક્ષિત
સરકારનું માનીએ તો, પોતાને કોઈપણ પ્રકારના હેકિંગના ખતરાથી સુરક્ષિત રાખવા માટે તમારા બ્રાઉઝરને તરત જ અપડેટ કરો. મોઝિલા દ્વારા તમામ ખામીઓને ઠીક કરીને પહેલાથી જ અપડેટ જાહેર કરી દેવામાં આવ્યું છે. આ અપડેટ ઇન્સ્ટોલ ન કરનારાઓ પોતાની સુરક્ષાને દાવ પર લગાવી રહ્યા છે. બ્રાઉઝરને અપડેટ કરવા માટે તમે તમારા ફોનના પ્લે સ્ટોર કે એપ સ્ટોર પર જઈને બ્રાઉઝરને અપડેટ કરી શકો છો. જ્યારે પીસી પર Mozilla Firefox વાપરતા યુઝર્સે બ્રાઉઝર સેટિંગ્સમાં જઈને About Firefox પર ક્લિક કરવાનું રહેશે અને તેને લેટેસ્ટ વર્ઝન પર અપડેટ કરવાના ઓપ્શન પર ક્લિક કરવું પડશે. આ સિવાય CERT-In એ સ્પષ્ટ સલાહ આપી છે કે લોકો કોઈપણ અજાણ્યા સોર્સથી આવતી લિંક પર ભૂલથી પણ ક્લિક ન કરે અને ન તો કોઈ થર્ડ-પાર્ટી સોર્સથી કોઈ એપ ઇન્સ્ટોલ કરે.
