Kryvyi Rih Drone Attack: ઝેલેન્સ્કીના ગૃહનગરમાં રશિયાનો ભીષણ હુમલો, 22 બાળકો સહિત 130થી વધુ લોકો ઘાયલ
Kryvyi Rih Drone Attack: રશિયન સેનાએ મધ્ય યુક્રેનના એક શહેરમાં આવેલા શોપિંગ મોલ પર અનેક ડ્રોનથી હુમલો કર્યો છે. આ હુમલાઓમાં 16 લોકોનાં મોત થયા છે અને 130થી વધુ લોકો ઘાયલ થયા છે. અધિકારીઓએ જણાવ્યું કે ક્રિવી રિહ શહેરના શોપિંગ સેન્ટર પર શુક્રવારે દિવસ દરમિયાન હુમલો કરવામાં આવ્યો હતો. ક્રિવી રિહ યુક્રેનના રાષ્ટ્રપતિ વોલોદિમિર ઝેલેન્સ્કીનું ગૃહનગર છે. ઝેલેન્સ્કીએ તેને બર્બર હુમલો ગણાવીને જવાબી કાર્યવાહીનું વચન આપ્યું છે.
ઘાયલોમાં 22 બાળકો સામેલ
પ્રાદેશિક ગવર્નર ઓલેક્સાન્ડ્ર હાન્ઝાએ જણાવ્યું કે ઘાયલ થયેલા લોકોમાં 22 બાળકો પણ સામેલ છે. તેમણે કહ્યું કે ઘાયલોમાં 29 લોકોની સ્થિતિ ગંભીર છે, જેમાં 5 બાળકો પણ સામેલ છે. અધિકારીઓએ જણાવ્યું કે દિવસના અજવાળામાં થયેલા આ હુમલામાં શહેરના સૌથી મોટા શોપિંગ કોમ્પ્લેક્સને નિશાન બનાવવામાં આવ્યું, જેના કારણે ત્યાં આગ લાગી ગઈ. ક્રિવી રિહ ડિફેન્સ કાઉન્સિલના પ્રમુખ ઓલેક્સાન્ડ્ર વિલકુલે ટેલિગ્રામ પર કહ્યું કે શોપિંગ કોમ્પ્લેક્સ પર વારંવાર હુમલો કરવામાં આવ્યો.
ઝેલેન્સ્કીએ હુમલાને બર્બર ગણાવ્યો
યુક્રેનના રાષ્ટ્રપતિ વોલોદિમિર ઝેલેન્સ્કીએ પોતાના ગૃહનગર પરના હુમલાની નિંદા કરતા તેને બર્બર અને ઘૃણાસ્પદ ગણાવ્યો. ઝેલેન્સ્કીએ કહ્યું કે પ્રથમ હુમલો થયા બાદ 30 મિનિટ પછી બીજા રશિયન ડ્રોને શોપિંગ સેન્ટરને નિશાન બનાવ્યું. તેમણે ટેલિગ્રામ પર લખ્યું, આ પ્રકારના હુમલા આતંકવાદી પ્રવૃત્તિઓથી ઓછા નથી.
યુક્રેનના રાષ્ટ્રપતિએ આ હુમલા માટે રશિયાને જવાબદાર ઠેરવવાની અપીલ કરી. તેમણે કહ્યું, “હુમલાખોર પર વાસ્તવિક દબાણ લાવીને દુનિયાએ તેનો યોગ્ય જવાબ આપવો જોઈએ. શાંતિ ત્યારે જ શક્ય છે જ્યારે રશિયાને તેની દરેક હરકત માટે વાસ્તવમાં જવાબદાર ઠેરવવામાં આવે.”
યુક્રેન પર રશિયાએ હુમલા તેજ કર્યા
ક્રિવી રિહ યુક્રેનનું ઔદ્યોગિક શહેર છે, જે ફ્રન્ટલાઇનથી 60 કિલોમીટરના અંતરે આવેલું છે. યુદ્ધ દરમિયાન આ શહેર સતત રશિયન હુમલાઓનું નિશાન બન્યું છે. તાજેતરના મહિનાઓમાં રશિયાએ યુક્રેનના શહેરો પર બોમ્બમારો તેજ કરી દીધો છે. UNની માનવાધિકાર એજન્સીએ જણાવ્યું કે જુલાઈમાં રશિયન હુમલાઓમાં યુક્રેનમાં ઓછામાં ઓછા 437 સામાન્ય નાગરિકો માર્યા ગયા અને 2610 ઘાયલ થયા. મે 2022 બાદ એક મહિનામાં સામાન્ય નાગરિકોના મોતનો આ સૌથી મોટો આંકડો છે.
