Nancy Grewal Canada Murder: કેનેડાના વિન્ડસરમાં મંગળવાર રાત્રે નેન્સી ગ્રેવાલની ચાકુ મારીને હત્યા કરવામાં આવી હતી. 45 વર્ષના પંજાબી મૂળના સોશિયલ મીડિયા ઇન્ફ્લુએન્સર નેન્સી ખાલિસ્તાનીઓ વિરુદ્ધ બોલવા માટે જાણીતા હતા. પોલીસે જણાવ્યું કે 4 માર્ચે રાત્રે લગભગ 9.30 વાગ્યે તેમને નેન્સી પર હુમલાના સમાચાર મળ્યા હતા. પોલીસ અધિકારી ગ્રેવાલને લઈને હોસ્પિટલ પહોંચ્યા, જ્યાં ઈજાઓને કારણે તેમનું મૃત્યુ થયું. પોલીસને ખાલિસ્તાની કટ્ટરપંથીઓ પર આ હત્યાની શંકા છે. જોકે હજુ આ મામલે કોઈ ધરપકડ થઈ નથી. પોલીસે કહ્યું છે કે તમામ પાસાઓ પર તપાસ કરવામાં આવી રહી છે.
પોલીસે જણાવ્યું કે ઘટના બાદ તપાસ ટીમે બે ઘરો, એક ખાલી પાર્કિંગ લોટ અને હર્બ ગ્રે પાર્કવે પાસેના પગપાળા ચાલવાના રસ્તાઓ પાસેના વિસ્તારને ઘેરીને પોતાની તપાસ શરૂ કરી છે. ફોરેન્સિક ટીમોએ ફૂટપાથ, સીડીઓ અને નજીકના રસ્તાઓ પરથી જરૂરી પુરાવા એકઠા કર્યા છે જેથી હુમલાખોર સુધી પહોંચી શકાય.
પોલીસે જાહેર કર્યું નિવેદન
લાસેલ પોલીસ ચીફ માઈકલ પીયર્સે બુધવાર સાંજે નિવેદન જાહેર કરતા નેન્સીની ઓળખની પુષ્ટિ કરી અને તેમના મૃત્યુ પર દુઃખ વ્યક્ત કર્યું. તેમણે કહ્યું, ‘લાસેલ પોલીસ સર્વિસ મિસ ગ્રેવાલના પરિવાર અને મિત્રો પ્રત્યે ઊંડી સહાનુભૂતિ ધરાવે છે. અમે જણાવવા માંગીએ છીએ કે ઇન્વેસ્ટિગેટર આને એક અલગ ઘટના તરીકે જોઈ રહ્યા છે.’
આ લાસેલમાં ચાર વર્ષમાં પહેલી અને વિન્ડસરમાં 2026 ની પહેલી હત્યા નોંધાયાના બે અઠવાડિયા પછી થઈ છે. ઘટનામાં પોલીસે કોઈ શંકાસ્પદનું નામ લીધું નથી અને ના તો કોઈની ધરપકડ કરી છે. પોલીસે હુમલાખોર વિશે કોઈ જાણકારી હોય તો તેને શેર કરવા માટે કહ્યું છે. પોલીસે ડિટેક્ટિવ સાર્જન્ટ જેમી નેસ્ટરનો 519-969-5210 એક્સટેન્શન 2531 પર સંપર્ક કરવા કહ્યું છે.
સોશિયલ મીડિયા પર બનાવી ઓળખ
નેન્સી ગ્રેવાલ ભારતના લુધિયાણામાં જન્મ્યા હતા. તેમનો અભ્યાસ પણ પંજાબથી જ થયો અને ત્યારબાદ તેઓ કેનેડા ચાલ્યા ગયા હતા. ઓન્ટારિયોના વિન્ડસર/લાસેલ વિસ્તારમાં જતા પહેલા નેન્સી ગ્રેવાલ કેલગરી, આલ્બર્ટામાં રહેતા હતા. નેન્સીએ એક સિંગર અને કોમેન્ટેટર તરીકે ઓનલાઇન દુનિયામાં હાજરી બનાવી હતી. તેમની યુટ્યુબ ચેનલ નેન્સી ગ્રેવાલ કેનેડા પર 8,800 સબસ્ક્રાઈબર્સ છે. તેમના 11,000 થી વધુ ફોલોઅર્સવાળા ઇન્સ્ટાગ્રામ એકાઉન્ટ છે.
