SAVE America Act: અમેરિકામાં મતદાર ID નો વિવાદ, ટ્રમ્પે ભારતની ચૂંટણી વ્યવસ્થાનું આપ્યું ઉદાહરણ
SAVE America Act: સેફગાર્ડ અમેરિકન વોટર એલિજિબિલિટી (SAVE America) એક્ટ લાંબા સમયથી ચર્ચામાં છે. ટ્રમ્પે આ એક્ટ માટે સમર્થન મેળવવાના પ્રયાસમાં ભારતીય ચૂંટણીઓનો ઉલ્લેખ કર્યો છે. તેથી ભારતમાં પણ તેની ચર્ચા થઈ રહી છે. ટ્રમ્પે પ્રશ્ન કર્યો છે કે ભારતની જેમ આપણે આપણા મતદારો માટે ફોટાવાળું ઓળખપત્ર કેમ બનાવી શકતા નથી. તેમણે મતદાર નોંધણી વખતે નાગરિકતાનો દસ્તાવેજી પુરાવો અને મતદાન વખતે ફોટો ID ફરજિયાત બનાવતા SAVE America એક્ટને સંસદમાંથી પસાર કરવા પર ભાર મૂક્યો છે.
SAVE America એક્ટને US House of Representatives (અમેરિકી સંસદના નીચલા ગૃહ) દ્વારા આ વર્ષે પસાર કરવામાં આવ્યો છે. કોંગ્રેસ (અમેરિકી સંસદ) હવે બજેટ રિકન્સિલિએશન પ્રક્રિયા દ્વારા તેના મર્યાદિત સ્વરૂપ પર વિચાર કરી રહી છે. આ સ્વરૂપ ફરજિયાત નિયમને બદલે ઇન્સેન્ટિવ (પ્રોત્સાહન) આધારિત પદ્ધતિ અપનાવે છે.
ડોનાલ્ડ ટ્રમ્પે શું કહ્યું
આ એક્ટને જરૂરી ગણાવતા અમેરિકી રાષ્ટ્રપતિ ડોનાલ્ડ ટ્રમ્પે પોતાના તાજેતરના નિવેદનમાં ભારતની ચૂંટણી વ્યવસ્થા અને મતદાર ID સિસ્ટમનો ઉલ્લેખ કર્યો છે. ટ્રમ્પે ટ્રુથ સોશિયલ પર લખ્યું કે ભારતના મુખ્ય ચૂંટણી કમિશનર જ્ઞાનેશ કુમારે અમારા વહીવટીતંત્રને પૂછ્યું હતું કે આખરે માન્ય ફોટો ID વિના અમેરિકામાં ચૂંટણી કેવી રીતે યોજાય છે.
ભારતની સામાન્ય ચૂંટણીનો ઉલ્લેખ કરતાં ટ્રમ્પે કહ્યું કે ભારતની છેલ્લી ચૂંટણીમાં 646,000,000 મતદારો હતા. તેમાંથી 1 ટકા કરતાં ઓછા લોકોએ મેઇલ દ્વારા મતદાન કર્યું અને દરેક મતદાર પાસે માન્ય ફોટો ઓળખ દસ્તાવેજ હોવો જરૂરી હતો. આ જ પ્રકારની વ્યવસ્થા માટે કોંગ્રેસે ‘SAVE America Act’ પસાર કરવા અંગે ગંભીરતાથી વિચારવું જોઈએ.
સેવ અમેરિકા એક્ટ શું છે?
સેવ અમેરિકા એક્ટ (સેફગાર્ડ અમેરિકન વોટર એક્ટ) એક પ્રસ્તાવિત ફેડરલ બિલ છે. તેનો મુખ્ય ઉદ્દેશ અમેરિકનો માટે મતદાન કરવા નોંધણી કરવાની પદ્ધતિમાં ફેરફાર કરવાનો છે. ડોનાલ્ડ ટ્રમ્પે ખાસ કરીને આ એક્ટને પોતાની મોટી ઇમિગ્રેશન ક્રેકડાઉન (પ્રવાસીઓ સામેના કડક પગલાં)ની નીતિના ભાગરૂપે પસાર કરાવવા પર ભાર મૂક્યો છે.
આ બિલને અમેરિકી સંસદના નીચલા ગૃહે મંજૂરી આપી છે. જો આ બિલ સેનેટમાંથી પણ પસાર થાય અને કાયદાનું સ્વરૂપ લે, તો અમેરિકામાં મતદાન કરતા પહેલાં મતદાર માટે માન્ય ફોટો ઓળખપત્રની સાથે અમેરિકી પાસપોર્ટ અથવા જન્મ પ્રમાણપત્ર રજૂ કરવું જરૂરી બનશે. આ બિલને લઈને અમેરિકી રાજકારણીઓમાં મતભેદ છે.
ભારત અને બ્રાઝિલ મતદાર IDને બાયોમેટ્રિક ડેટાબેઝ સાથે જોડે છે, જ્યારે અમેરિકા નાગરિકતા માટે સેલ્ફ-એટેસ્ટેશન (પોતાના દાવા) પર આધાર રાખે છે. જર્મની અને કેનેડામાં પેપર બેલેટનો ઉપયોગ થાય છે, જ્યારે ડેનમાર્ક-સ્વીડનમાં મેઇલ-ઇન વોટિંગની સુવિધા માત્ર એવા લોકો માટે છે, જેઓ પોતે જઈને મતદાન કરી શકતા નથી.- વ્હાઇટ હાઉસ
બિલનો વિરોધ કેમ
ઘણા નિષ્ણાતો લાંબા સમયથી આ પ્રસ્તાવિત કાયદાનો વિરોધ કરી રહ્યા છે. તેમનું કહેવું છે કે તેના કારણે લગભગ 2 કરોડ અમેરિકી મતદારો મતદાનના અધિકારથી વંચિત થઈ શકે છે. આ એવા લોકો છે, જેમની પાસે જન્મ પ્રમાણપત્ર અથવા અન્ય જરૂરી દસ્તાવેજો નથી. આ બિલનો ઉદ્દેશ કેટલાક વિશિષ્ટ કિસ્સાઓને બાદ કરતાં મેઇલ-ઇન બેલેટ (ટપાલ દ્વારા મતદાન)ને પણ બંધ કરવાનો છે. આ મુદ્દે પણ નિષ્ણાતો વાંધો ઉઠાવી રહ્યા છે.
US કોંગ્રેસની સત્તાવાર વેબસાઇટના બિલ ટ્રેકર અનુસાર, SAVE America Act (S.3752 H.R.7296) જાન્યુઆરીના અંતમાં રજૂ કરવામાં આવ્યો હતો. જુલાઈમાં US House of Representatives દ્વારા આ બિલને આગળ વધારવામાં આવ્યું હતું. આ મહિનાની શરૂઆતમાં બિલ પર મતદાનમાં અવરોધ આવ્યો હતો. આ દરમિયાન ડોનાલ્ડ ટ્રમ્પ સોશિયલ મીડિયા અને પોતાના નિવેદનો દ્વારા સતત તેની તરફેણ કરી રહ્યા છે.
પ્રસ્તાવિત કાયદો ટપાલ દ્વારા મોકલવામાં આવતા મતપત્રો (મેઇલ-ઇન બેલેટ) પર પ્રતિબંધ મૂકશે, જેથી તેનો ઉપયોગ માત્ર બીમારી, દિવ્યાંગતા, સૈન્ય સેવા અથવા મુસાફરી જેવા કિસ્સાઓમાં થઈ શકે. આ એક્ટ રાજ્યોને મતદાર યાદીમાંથી બિન-નાગરિકોના નામ દૂર કરવાનો નિર્દેશ આપશે.
વ્હાઇટ હાઉસનો તર્ક
વ્હાઇટ હાઉસે કહ્યું છે કે માત્ર અમેરિકી નાગરિકોએ જ અમેરિકી ચૂંટણીનો નિર્ણય કરવો જોઈએ. આ સુનિશ્ચિત કરવા માટે ‘SAVE America Act’ એક સમજદારીભર્યું અને બંને પક્ષોના સમર્થનવાળું બિલ છે. પ્રસ્તાવિત કાયદા હેઠળ મતદારોએ ફેડરલ ચૂંટણીમાં મતદાન કરવા નોંધણી કરતાં પહેલાં માન્ય ઓળખ અને નાગરિકતાનો પુરાવો આપવો પડશે.
